باله‌فرێن جه‌نگ یێن ده‌وله‌تا داگیركه‌ر یا تركیێ ئیرۆ ئێریشی ناڤچه‌یه‌كه باشوورێ كوردستانێ كر و سینۆرێ خه‌لێفانێ هه‌ده‌ف كر.
چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره كرن، ئیرۆ رۆژا شه‌می 13/6/2020ان، باله‌فرێن تركیێ د ته‌عقیبا حه‌ره‌كه‌تێن په‌كه‌كێ ده، گوندێ ب ناڤێ خه‌لێفان یێ ده‌ڤه‌را برادۆستی هه‌ده‌ف كر و زرار گهاندن گه‌لێ ناڤچه‌یێ.
د ئێریشێ ده كو ئێڤارا ئیرۆ پێكهاتییه و هنه‌ك مۆشه‌ك ب سینۆرێ گوند كه‌تنه، هه‌ژماره‌كه سه‌رێن په‌زی یێن گوندییان بریندار كه‌تنه.
ل ده‌ما مه‌هێن رابووری پارتییا كاركه‌رێن كوردستانێ ژ بۆ كو گه‌ریلایێن خوه ژ ئێریشێن باله‌فران بپارێزه، حه‌ره‌كه‌تێن خوه خستنه ناڤا گوندێن باشوورێ كوردستانێ، هه‌مولاتیێن گوندێن باشوور ژی ژ ڤێ هه‌نگاڤا په‌كه‌كێ دلگرانن و دخوازن په‌كه‌كه ژ گوندێن وان دوور بكه‌ڤه ژ بۆ كو نه‌كه‌ڤن به‌ر ئێریشێن باله‌فران.
