باله‌فرێن جه‌نگ یێن ده‌وله‌تا داگیركه‌را ترك، ئیرۆ د ته‌عقیبا حه‌ره‌كه‌تێن په‌كه‌كێ ده‌، ئێریشێ باشوورێ كوردستانێ كر و 3 هه‌مولاتیێن سڤیل شه‌هید كه‌تن.

چاڤكانیێن پێگه‌ها «داركا مازی» ل باشوورێ كوردستانێ ئه‌شكه‌ره‌ كرن، ئیرۆ رۆژا ئینی 19/6/2020ان، باله‌فرێن تركیێ ل ناڤچه‌یا نێروه‌ رێكان و به‌رواری بالا هه‌ده‌ف كرنه‌ و ب وێ سه‌ده‌مێ 3 هه‌مولاتیێن سڤیل ل نێزی گوندێن خوه‌ شه‌هید كه‌تن.

هه‌موه‌لاتیێن كو شه‌هید كه‌تنه‌، دو ژێ ل سینۆرێ گوندێ «سیدا» ب تایبه‌ت ل ناڤچه‌یا ب ناڤێ «ئاسته‌نگا سیدا» ل ده‌ڤه‌را نێروه‌ رێكان هاتنه‌ هه‌ده‌ف كرن.

 هه‌موه‌خت هه‌مولاتییه‌كێ دن ل ده‌ڤه‌را به‌رواری بالا،‌ ل سینۆرێ گوندێ «ده‌رگه‌لا میسا به‌گ» كه‌تییه‌ به‌ر ئێریشان و شه‌هید كه‌تییه‌.

ناڤێن شه‌هیدان ئه‌ڤن:

• ئازاد مه‌هدی مه‌م شاجی.

• ده‌مهات عومه‌ر ئۆره‌ماری.

• موخلس ئاده‌م كۆكه‌ری.

چاڤكانیێن پێگه‌ها داركا مازی ئه‌شكه‌ره‌ كرن، ل دره‌نگیێن شه‌ڤا ده‌رباسبوویی، باله‌فرێن جه‌نگ ل ده‌مژمێر 12:15 مۆشه‌كه‌ك ل ئاقارێ گوندێ ساركێ یێ گرێدای ناڤچه‌یا سه‌رسنك ل ده‌ڤه‌را «به‌رێ گاره»‌ دانه‌.

 ل سه‌رێ سبێ یا ئیرۆ ژی ب تایبه‌ت ل ده‌مژمێر 2:55 باله‌فران ئاقارێ گوندێ «بێسه‌پێ» ل ناڤچه‌یا شێلادزێ ل ده‌ڤه‌را نێروه‌ رێكان دانه‌.

به‌را ڤان ئێریشان ل رۆژا 17/6/2020ان هه‌مولاتییه‌كێ دن ژی ب ناڤێ «ئه‌مین سه‌لاح حه‌سه‌ن» گێلكی ل ناڤچه‌یا كانی ماسێ كه‌تبوو به‌ر ئێریشا باله‌فران و ئیرۆ ژ نووڤه‌ خه‌لكێ جه‌سه‌دێ وی ل سه‌ر كانیا گوند دیتنه‌ و ئه‌و جهه‌ ل ژێر كۆنترۆلا په‌كه‌كێ یه‌.

پارتییا كاركه‌رێن كوردستانێ ژ بۆ كو خوه‌ ژ ئێریشێن باله‌فران بپارێزه‌، حه‌ره‌كه‌تا گه‌ریلایێن خوه‌ خستنه‌ ناڤا گوندێن باشوورێ كوردستانێ ب تایبه‌ت ل ده‌ڤه‌رێن به‌رواری بالا، نێروه‌ رێكان و شێلادزێ و به‌رێ گاره‌ی، خه‌لكێ ناڤچه‌یێ ئه‌ڤ كارێ په‌كه‌كێ شه‌رمه‌زار كرنه‌ و ئه‌و دخوازن په‌كه‌كه‌ ژ گوندێن وان دوور بكه‌ڤه‌ ژ بۆ كو نه‌بن ئارمانجا ئێریشان.