په‌كه‌كه رۆژانه ب دره‌و ده‌هان كۆماندۆیێن تركان دكوژه و ئه‌ره‌به‌یێن وان تێك دشكینه
ل ده‌مه‌كێ كوردستان ل همبه‌ر خه‌ته‌رییا داگیركه‌رییه‌كه نوویه و داگیركه‌ران ستاتۆیا وێ ب تۆپ، تانك و خائینان دۆرپێچ كرییه و به‌ر ب كه‌تنێ پالان لێ دخن، هه‌روه‌ها كورد هاوار دكن كو ده‌نگێ مه‌زلۆمییه‌تا خوه بگهینن جیهانێ، لێ به‌لێ په‌كه‌كه كو سه‌ده‌ما سه‌ره‌كه یێ ڤێ نه‌هامه‌تێ یه، ده‌ست ب سێرڤێس كرنا نووچه‌یێن نه‌راست كرییه، ب دره‌و رۆژانه ئه‌و ده‌هان جه‌ندرمه و كۆماندۆیێن تركان دكوژه و ئه‌ره‌به‌یێن وان تێك دشكینه، ب كورتی هه‌گه‌ر ئه‌ڤ دره‌وێن په‌كه‌كێ راست بن، پێویسته هه‌موو كورد ب ڤێ ئێریشا تركیێ كێفخوه‌ش بن، ژ به‌ر كو ئارته‌شا تركیێ ب پێین خوه هاتییه به‌ر ده‌ستێ گه‌ریلایان ژ بۆ كو وه‌رن كوشتن.
ل ده‌ستپێكێ پێویسته باس ل راستییه‌كێ بكین كو هه‌ر كورده‌كێ ب سه‌ركه‌تنا جه‌نگاوه‌رێن كورد ل همبه‌ر ئارته‌شا داگیركه‌ر كێفخوه‌ش نه، پێویسته ئه‌و گۆمانێ ژ كوردبوونا خوه بكه و وه‌كه د ئه‌ده‌بیاتێن كوردی ده هاتی، ئه‌ڤ كه‌س ب «كورده‌كی خۆ فرۆش» هاتنه ناڤ كرن.
له‌وما ئه‌ڤا كو دڤێ نڤیسێ ده هه‌یه، ناهێت وێ واتایێ كو ئه‌م دخوازن سه‌ركه‌تنێن گه‌ریلایان به‌رزه بكین، لێ به‌لێ پێویسته ئه‌م د هشیار بن كو نووچه‌یێن نه‌راست و به‌ره‌ڤاژ كرنا راستییان، پر جاران زرارێ ب دۆزا نه‌ته‌وه‌یا مه دگهینه و دبه سه‌ده‌ما هه‌ده‌ر دانا خوینا وان خۆرت و جوانێن كورد كو جانێ حوه ژ بۆ رزگاری و سه‌ربه‌رستییا كوردستانێ، فه‌دا كری.
هه‌ر وه‌ك هوون دزانن، ئێریشێن ده‌وله‌تا داگیركه‌را ترك ل سه‌ر باشوورێ ولات، ب هێنجه‌تا هه‌بوونا په‌كه‌كێ، ل رۆژێن رابووری ده‌ست پێ كر، ئێریشا هه‌وایی ب ناڤێ «په‌نجا بازێ» و یا به‌ژاهی ب ناڤێ «په‌نجا پلنگ»، ته‌نێ د 48 ده‌مژمێران ده، 5 هه‌مولاتیێن سڤیل شه‌هید كه‌تن، بژلی شه‌واتا ب ره‌ز و باغێن گه‌ل كه‌تی كو چاڤكانییا ژیارا وانه، گه‌ل راستی ترس، نه‌رهه‌تی و نه‌هامه‌تیێ هاتییه، سه‌روه‌رییا خاكا ولات بێ رومه‌ت كر، ئێریش كه‌رامه‌تا نه‌ته‌وه‌یا كورد هه‌ده‌ف دكه و ئامانج ژێ ژ ناڤ برنا تاكه په‌رچه‌یا ئازادا كوردستانێ یه.
ئاڤكێشا ئاشێ دوژمن
ئه‌م د ره‌وشه‌كه وها دا نه كو ئاشێ شه‌رێ داگیركه‌ران هنه‌ك مایه هه‌ستێن مه بهێره و هه‌ولێن هه‌ر كورده‌كی دلسۆز هه‌نه كو ده‌نگێ مه‌زلۆمییه‌تا نه‌ته‌وه‌یا خوه ژ خه‌ته‌را داگیركه‌رییه‌كه نوو ل سه‌ر خاكا ولات بگهینه جیهانێ، لێ به‌لێ په‌كه‌كه كو سه‌ده‌ما سه‌ره‌كه یا ڤێ نه‌هامه‌تیێ یه، ب سێرڤێس كرنا نووچه و ئاگاهیێن ب گۆمان ڤه مژووله، ئه‌و ڤێ ژ بۆ به‌رژه‌وه‌ندییا رێخستنا خوه دكه، ب گوتنه‌كه دن بوویه ئاڤكێشا ئاشێ دوژمن.
وه‌ختا مرۆڤ سه‌ردانا رۆپه‌لێن گرێدای په‌كه‌كێ دكه، یان د سۆشیال مه‌دیایێ ده رۆپه‌لێن وان ب به‌رچاڤ دكه‌ڤن، مرۆڤ وها هه‌ست دكه كو ئارته‌شا تركیێ ب ده‌ستێ خوه گۆرێن خوه كۆلانه، لێ به‌لێ وه‌ختا مرۆڤ راستییا ڤان ئاگاهییان له‌كۆلین دكه، ئه‌شكه‌ره دبه كو ئه‌ڤ نووچه سه‌ر و بن دره‌وه و نه‌راستن، به‌لكو ئه‌ڤ مالپه‌ر وها ساویلك و ده‌به‌نگ دره‌وان دنڤیسینن كو ب هنه‌كی سێرچ كرنێ ده‌ردكه‌ڤه كو ئه‌ڤ دیمه‌ن یێن بوویه‌رێن به‌رێ نه و پر جاران ده‌ردكه‌ڤه كو نه‌یێن كوردستانێ ژی نه.
وه‌كه دۆكیۆمه‌نت ژ بۆ ڤێ نڤیسێ، ئه‌مێ هنه‌ك ژ وان دیمه‌نان پارڤه بكین كو ل رۆژێن رابووری ئالیگر و مه‌دیا په‌كه‌كێ وها پارڤه كرنه كو یێن ئێریشا ڤێ داویێ یا تركیێ نه و تێده به‌حسا سه‌ركه‌تنا په‌كه‌كێ دكه، ئه‌مێ مێژو و جیێ ڤان دیمه‌نان ژی ل سه‌ر بنڤیسینن ژ بۆ كو خوه‌نده‌ڤانێن برێز بكارن د ئێنته‌رنێتێ ته سێرچ بكن و بگهن راستیێ.
ئامانجا په‌كه‌كێ ژ ڤان دره‌وان چیه؟
هه‌ر وه‌ك د به‌رێ ده مه ئاماژه پێ دایی كو په‌كه‌كه ب ئه‌نجام دایینا كاره‌ك وها، دخوازه ببه ئاڤكێشا ئاشێ شه‌رێ دوژمن، هه‌گه‌ر ئه‌م رۆپه‌لێن گرێدای په‌كه‌كێ د سۆشیال مه‌دیایێ ده ب شۆپینن، دێ وێ راستیێ بینین كو په‌كه‌كێ ب یه‌ك رسته ژی وه‌كه پرسه‌كه نه‌ته‌وه‌یی باس ل ڤێ پێڤاژۆیێ نه‌كرییه، لێ به‌لێ دخوازه ته‌نێ ڤێ ئێریشێ ژ بۆ ئامانجێن رێخستن و گرۆپێن خوه بكار بینه، ژ ئالییه‌كه دن دخوازه ناڤێ خوه ژ لیستا رێخستنێن ته‌رۆری ئیمها بكه، هه‌موه‌خت دخوازه ب رێیا مه‌شا هه‌ده‌پێ شكه‌ستنێن خوه د رێیا رزگاریخوازییا كوردان ده ب په‌چنه، هه‌روها دخوازه وه‌كه هه‌ر جار برۆپاگنده‌یان ل سه‌ر خوین، مال و حالێ گه‌لێ باشوور بكه، جوانێن شۆرشگه‌ر ژ په‌رچه‌یێن دن یێن كوردستانێ ل خوه كۆم بكه و ب ده‌ستێ داگیركه‌ران ب كوشتن بده.
چما سێرڤێس كرنا نووچه‌یێن نه‌راست ل ده‌ربارا ئێریشێن تركیێ زرارێ دگهینه گه‌لێ كورد؟
دبه هنه‌ك كه‌س باوه‌ر بكن كو په‌كه‌كه ب سێرڤێس كرنا نووچه‌یێن نه‌راست وه‌كه دیمه‌نێن حه‌فته‌نینێ و ناڤچه‌یێن دن كو پاشمایێن ئارته‌شا داگیركه‌ر لێ مانه، ژ بۆ به‌رز كرنا مۆرالا گه‌ریلایان به، لێ به‌لێ د راستیێ ده دو سه‌ده‌م هه‌نه و ئه‌م دكارین ئیسبات بكن كو ئامانجا رێڤه‌برییا په‌كه‌كێ ژ ڤان دره‌وان تو په‌یوه‌ندییا وێ ب گه‌ریلایان ڤه نینه، سه‌ده‌م ئه‌ڤن:
یێك: گه‌ریلا تو یێك ژ وان پرۆباگنده‌یێن د سۆشیال مه‌دیایێ ده تێن پارڤه كرن نابینه، ژ به‌ر كو گه‌ریلا د ره‌وشه‌ك وها ده‌نه كو خوه نكارن مۆبایله‌كه ئاسایی ژی بكاربینن، ڤێجا ب تو ئاوا وێ ده‌ستێ وان بگه‌هه ئێنته‌رنێتێ و سۆشیال مه‌دیایێ، ئه‌ڤ ژی ب وێ واتایێ تێ كو ئامانجا په‌كه‌كێ ژ سێرڤێس كرنا نووچه و ئاگاهیێن نه‌راست گرێدانا وێ ب به‌رز كرنا مۆرالا گه‌ریلایان ڤه تونه‌یه.
ددوو: دیرۆكێ و به‌لگه‌یێن دیرۆكی ته‌سبیت كرنه كو ل چ ده‌مه‌كێ ژیانا گه‌ریلایان ژ بۆ رێڤه‌برییا په‌كه‌كێ گرینگ نینه و رێڤه‌بریێ گه‌ریلا ته‌نێ وه‌كه خه‌تیره‌كێ ژ بۆ هه‌لكرنا ئاگرێ پیلانێن خوه بكار ئانینه، هه‌گه‌ر ب هووری ئه‌م ل ڤێ پرسێ ب نه‌رین، وێ ژ بۆ مه پر زه‌لال به كو قوربانی و مه‌زلۆمێن هه‌ری راستێن سیاسه‌تا دژه نه‌ته‌وه‌یی یا رێڤه‌برییا په‌كه‌كێ گه‌ریلانه، د قۆناغێن جودا یێن دیرۆكا په‌كه‌كێ ده، ب هه‌زاران گه‌ریلا ژ بۆ به‌رژوه‌ندییا رێڤه‌برێن په‌كه‌كێ و ژ بۆ ب جی كرنا پیلانێن ل گه‌ل داگیركه‌رێن كوردستانێ و ده‌هان پیلانێن سیاسی یێن شاش، جانێ خوه ژ ده‌ست دا نه.
پارڤه‌كرنا نووچه‌یێن دره‌و ل ده‌ربارا كوشتنا جه‌ندرمه‌یێن داگیركه‌رێن ترك، به‌را هه‌ر تشتی فكرا فاشێشتا و داگیركه‌را تركان ل همبه‌ری كوردان یه‌كگرتی و رادیكالتر دكه، ئه‌ڤ نووچه دبن سه‌ده‌م كو گه‌لێ ترك ب هه‌موو هێز و شیانێن خوه پشتگریێ بدن هه‌نگاڤێن حكوومه‌تا ئه‌ردۆگان یێن داگیركرنا به‌شه‌كا هه‌ری مه‌زن یا خاكا باشوورێ كوردستانێ.
لۆژیك دبێژه مه، هه‌بوونا ده‌رزه‌كی ل ناڤا ناسیۆنالیزما ترك وه‌كه نه‌ته‌وه‌یه‌كی بالا ده‌ست ل تركیێ چ ب سه‌ده‌ما ژێر پێ كرنا ده‌مۆكراسیێ به یان ره‌وشا خه‌راب یا ئابووری و كۆمه‌لاتی به، د به‌رژه‌وه‌ندییا نه‌ته‌وه‌یا كورد یا ژێر ده‌ست دا یه، په‌كه‌كه ب وه‌شاندنا ڤان نووچه‌یێن نه‌راست، ده‌ستێ خوه ل سه‌ر جیێ هه‌ری حه‌ساس یێ ناسیۆنالیزما تركان دانایه و ژ تركان ره دبێژه، كورد رۆژانه یێ ب ده‌هان جوانێن هه‌وه قه‌تل دكن، ئه‌ڤ ژی دبه سه‌ده‌م كو ته‌خ و چینێن جڤاكا تركان هه‌ڤ هه‌لوه‌ست بن و وێ ده‌رزا ل ناڤا خوه ده پر بكن، ب گۆتنه‌كه دن ل دژی كوردان یه‌ك بگرن.
هه‌گه‌ر ده‌نگه‌كی نه‌رازی ب سه‌ده‌ما ره‌وشا ئابووری یا خه‌راب یا تركیێ و مه‌زاختنێن هه‌ری زۆر یێن ئێریشێن تركیێ ل سه‌ر په‌كه‌كێ هه‌به ژی، په‌كه‌كه ب ڤان نووچه‌یێن نه‌راست وان ده‌نگان بێده‌نگ دكه و وان ژی تێخه پال حكوومه‌تا فاشیستا ئه‌نقه‌رێ.
هه‌موه‌خت ئه‌م د بینن كو كو كورد هه‌موو هه‌وله‌كێ وان هه‌یه ژ بۆ كو باندۆرێ ل جڤاكا رۆژئاڤایی و ولاتێن زلهێزێن جیهانێ بكه، ژ بۆ كو د هاوارا كوردستانێ وه‌رن، لێ به‌لێ وه‌شاندنا ڤان نووچه‌یێن دره‌و یێن پێگه‌هـ و رۆپه‌لێن په‌كه‌كێ و ب چه‌ندین زمانێن جیهانی، بوونه سه‌ده‌م كو جادده‌یا ئه‌ورۆپا، ئه‌مه‌ریكا و رۆژئاڤا ب گشتی ب گۆمان ل راستییا ڤان هه‌ول و داخوازیێن كوردان ب نه‌رن.
ب سێرڤێس كرنا نووچه‌یێن دره‌و،په‌كه‌كه راستییان به‌رزه دكه و كوردان وه‌كه دره‌وین ل پێش چاڤێن جڤاكا ناڤده‌وله‌تی پێشان دده، مه‌زلۆمیه‌تا كوردان كێم وێنه دكه و تركێن داگیركه‌ر وه‌كه مه‌زلۆم و خوه‌دی حه‌ق نیشان دده، جادده‌یا رۆژئاڤا وها كرییه كو ببێژن: ماده‌م كوردان هێز هه‌یه و دكارن به‌رگریێ ژ خوه بكن، چما ئه‌م ولاتێن خوه و به‌رژه‌وه‌ندیێن خوه بخن ژێر خه‌ته‌ریێ.
یا راست تو هێڤیه‌ك ژ رێڤه‌برێن په‌كه‌كێ نایێ دیتن كو ل شوونا ئه‌و فكر ل نووچه‌یێن نه‌راست بكن، فكره‌كی راست ل وان زراران بكن كو د پرسا نه‌ته‌وه‌خوازییا كوردی دا دهێن دایین، لێ به‌لێ مه هێڤی هه‌نه كو رۆشه‌نبیرێن كورد، جوان و كه‌ساتیێن نه‌ته‌وه‌یی كو ده‌ستێ وان دگه‌هه ده‌ست رێڤه‌برێن په‌كه‌كێ هه‌موو هه‌ولێن خوه ب كار بینن ژ بۆ كو ئه‌ڤ سیاسه‌تا شاش و دره‌و راست بكن، ئه‌و سیاسه‌تا بنگه‌ها خوه ژ ئیمرالیێ وه‌ردگره و دگه‌هه قه‌ندیلێ و دۆمانا وێ دچه چاڤێ گه‌لێ كوردستانێ و رزگاریخوازێن كورد.
خوه‌زی دره‌وێن په‌كه‌كێ راست بان و رۆژانه ب هه‌زاران كه‌س ژ ئارته‌شا تركیێ هاتبان قه‌تل كرن
خوه‌زی دره‌وێن په‌كه‌كێ راست بان و رۆژانه هه‌زاران كه‌س ژ ئارته‌شا تركیێ هاتبان قه‌تل كرن، خوه‌زی دره‌وێن په‌كه‌كێ راست بان و عه‌فرین، گرێ سپی، سه‌رێ كانیێ ب وی ئاوایێ هۆڤ نه‌هاتبان داگیر كرن، خوه‌زی دره‌وێن پێش نها یێن په‌كه‌كێ راست بان و ل باكورێ كوردستانێ شوونده نه‌ڤه‌كشابان و ئه‌ڤ كارێ وان تاكتیك بایه و بریارا ئیمرالیێ و لاوازییا له‌شكری نه‌بایه، خوه‌زی په‌كه‌كێ باوه‌ری ب مافێ سه‌رخوه‌بوونا یه‌كجار یا نشتیمانێ كوردان و سه‌رخوه‌بوونا كوردستانێ هه‌بایه و خوینا ڤان هه‌موو جوانان ژ بۆ به‌رژه‌وه‌ندییا داگیركه‌ران نه‌هاتبا رێشتن، خوه‌زی و هه‌زار خوه‌زی گه‌ریلا و ئه‌ندام و ئالیگرێن په‌كه‌كێ ل شوونا رادیكالبوونێ ب ئاوایه‌كی لۆژیكی سیاسه‌ت، گۆتار و بریارێن رێخستنێ هه‌لسه‌نگاندبان و ل مه‌ره‌ما راستین یا رێڤه‌بر و سه‌روكانییا سه‌ره‌كه یا بریاران «ئیمرالیێ» تێگه‌هشتبان.
