ھەڤسەرۆکێ کەجەکێ جەمیل باییک د «ستێرک تیڤی» دا ھندەک داخویانی یێن کو پەیوەندیێن ناڤ مالا کوردی تەنگەزار دكه‌ن، دان. باییک، دیار کر کو ئامادەکاری یێن وان ژ بۆ هێرش کرنا سەر ھەرێما کوردستانێ ھەنە.
تشتێ بالکێش بەری چەند رۆژان، وەزیرێ دەرڤە یێ ترکیا، مەولود چاویشئۆغلۆ ژی هه‌مان گەف ل ھەرێما کوردستانێ كر بوون، ئەڤ گەفێن ھەردوو لایەنان جھێ شرۆڤەکرنێ نە.
جه‌میل باییك: دێ كادرێن ئاساییش، پاراستن، زانیاری كه‌ینه ئارمانج
د داخویانییا جەمیل باییک دا هنده‌ک رەھندێن سەربەند ھەنە مرۆڤ هه‌ست دكه‌ت کو ل پاییزێ پەکەکە دێ هێرشی حکومەتا ھەرێما کوردستانێ كه‌ت، ژبەر کو جەمل باییک د وێ داخویانییا خۆ دا ژبلی گەفێن کوشتنا کەسێن مەدەنی، گەفان ل ھەموو دەزگەھ و كادرێن ئه‌منی یێن ھەرێمێ دکەت، ب ئاشکرا دبێژیت: «ئەم دێ هێرشێ كه‌ین»، ئەڤه ب وێ رامانێ دهێت كو سبه، دوسبە پەکەکە ب به‌هانه‌یا كو ئەڤ کەسه ئاگاھییان دده‌نه دوژمنی، دێ ل دھۆکێ، ھەولێرێ چەند كادرێن ئاساییش، پاراستن و فەرماندارێن پێشمەرگەی كه‌ته ئارمانج و دێ كوژیت، دیسان کەسێن باجێ نەده‌ن و داخوازیێن پەکەکێ بجهـ نه‌ئینن دێ ب به‌هانه‌یا میتێ وان کەسان كوژن، بێگۆمان رەوشەکا وه‌ھا دێ ئالۆزیێ چێكه‌ت، دێ بیته جھێ بەرسڤدانێ، ئەڤ ژی دێ بیته شەرەکێ ناڤخۆیی.
گەر جەمیل باییک هنده ب زەلالی و بێ ترس ڤان تشتا بێژیت، پێدڤییه ئەم بزانین کو پیلانەکا پەکەکێ یا ب ڤی رەنگی ھەیە، هێشتا ل بھارێ پیلانەکا پەکەکێ ل دژی ھەرێما کوردستانێ دیار دبوو، ل دەردۆرێن کێشەیا زینی وەرتێ دڤییان تێگەھەکی ئاڤا بكه‌ن، لەورا ژی دەمەکێ درێژ د رۆژەڤا کوردان و یا ناڤدەولەتی دا ھێلا، ئەڤە ھەموو بەشەکێ ئامادەکاریێن ڤێ پیلانێ بوون، میناک، ئەندامێن پەکەکێ ل ئەورۆپا ژ بۆ زینی وەرتێ كه‌مپینه دروست کرن، ل ٢١ گولانێ ژ ژینەنەن ئوروگوای، کۆلۆمبیا، ئەفریقا باشوور نامە ھاتە رێکرن، ژ بۆ رایەدارێن ئالیێن سیاسی ل ھەرێما کوردستانێ، دیسان ژ بۆ گەلەک کەسێن ناس کری رێخستن کرن کو نامێ ل دژی حکوومەتا ھەرێما کوردستانێ ئیمزا بکه‌ن، کەجەکێ پشتەڤانییا نامەیێ کر، سپاسی ژی دان سیاسەتمەدارێن بیانی و ل ھەمان دەمی گۆتن کو ئەم دێ ل گۆر داخوازا هه‌وه تەڤگەرین و دگۆتن ئەم دێ تشتێ پێدڤی كه‌ین، ئانکو گەر شەرەکێ ناڤخۆیی روو بدەت ژ نھا ڤە ئامادەکاریێن ناڤخۆ و دەرڤە ھاتینە کرن دا کو بێژن ئەم بێ تاوانین.
پەکەکە ئەڤ دەمەکێ درێژە د ناڤا ئامادەباشیێ دایە، ژ سالا 2017ێ پەکەکە پیلانێن شەرەکی ل دژی ھەرێما کوردستانێ چێدکه‌ت، پێنگاڤا ئەول ژی ب به‌هانه‌یا شەرێ دژی داگیرکەرییا د ناڤا ئاخا باشوور دا گه‌له‌ك پرۆپاگندە کرن، ل سالا ٢٠١٧ ل ھەیڤا نیسانێ باھۆز ئەردال، ل ھەیڤا گۆلانێ ژی رزا ئالتون د راگھاندنا خۆ دا بەحسا ڤان ئاماده‌کاری و پیلانان کربوو، ب ئاشکرا دگۆتن: «پێدڤییه ھەرێما کوردستانێ ببیته مه‌یدانا شەر»، جەمیل باییک پێنگاڤەکا پێش هاڤێت و بێ کو بەحسا دەولەتا ترک بکەت راستەراست گەف ل ئەندامێن رێڤەبەرییا ھەرێما کوردستانێ کرن، ب به‌هانه‌یا کو گەلێ باشوور ئاگاھییان ددەته دەولەتا ترک و میتێ.
ئه‌رێ میتێ زێدەتر د ناڤ پەکەکێ دا یان ژی د ناڤ باشوور دا رێكخستن کرییە؟
دەولەتا ترک خودانا ئیستخباراتەکا جددی و بھێزه، د گەلەک وەلاتان دا رێكخستن کرییە، هه‌تا د ناڤ گه‌له‌ك پارتییان دا ژی جهێ خۆ كرییه، لێ ھەم د دیرۆکا رابووری دا ھەم ژی د رۆژا مە یا ئه‌ڤرۆ دا دیار دبیت کو میتا ترکان ھەری زێدە د ناڤ رێکخستنا پەکەکێ دا جهێ خۆ كرییه، دیسان پەکەکە ل گەل ھەموو ئیستخباراتێن ھەرێمی په‌یوه‌ندی هه‌نه، ب تایبەت ژی جەمیل باییک رۆژانە ل گەل ئیستخباراتا ئیرانێ ئیتیلاعاتێ د پەیوەندییان دایە، ل دژی ھەرێما کوردستانێ پیلانان ئاڤا دکه‌ن و ل ژێر پاراستنا ئیستخباراتا ئیرانێ ئیتیلاعاتێ ل سلێمانیێ و دەوروبەرا وێ دگەرن، ل ھەمان دەمی، پەیوەندیێن جەمیل باییک ل گەل موخابەراتا سووری ژی گه‌له‌ك دخۆشن و ڤێ راستیێ ھەموو کەس ژی دزانن، پشتی عەبدوللا ئۆجالان ھاتییه گرتن، ل شامێ ئەندامێن موخابه‌راتێ زێرەڤانێن قەسرا جەمیل باییکی بوون، نھا ژی پەکەکە ب پەیوەندیێن موخابراتا ئیراقێ د ناڤبەرا شەنگال، کەرکووک و مەخموور دا هاتن و چوونێ دكه‌ن، چەکان دەرباس دکه‌ن و بالەفرخانه‌یا بەغدا بکار دئینن.
په‌یوه‌ندیێن د ناڤبەرا عەبدوللا ئۆجالان و میتێ دا گه‌له‌ك و گه‌له‌ك خۆشن، د بیرا مە دایە دەما کو عەبدوللا ئۆجالان پەسنا سەرۆکێ میتێ ھاکان فیدان د دا، دگۆت «ھاکان فیدان» مرۆڤەک گه‌له‌ك ژیرە، پێدڤییه ئەم ھەمبەر رۆندكێن فه‌تحوللا گولەن وی بپارێزین، گەر ئەز نەبام دا وی «ھاکان فیدان» 7/2/2012 دەستەسەر کەن، لێ من رێ لێ گرت، «دیسان ئەندامێ مەکتەب سییاسی یا پەکەکێ سەبری ئۆک ئه‌ڤه 25 سالە ل گەل میتێ كار دكه‌ت و پێدڤییه ئەڤ مژارە باش بهێته لێکۆلین کرن».
گەفێن جەمیل باییکی یێن کوشتنا وان کەسێن کو ئەو ب میت ناڤ دکەن جھێ پێکەنینێ یە، ژ بەرکو ئەو بخۆ ل گەل سێدارەکارێن جوانێن کورد، ئانکو ئیتیلاعات و موخابراتێ دا د ناڤا ھەڤالبەندییان دایە، وی دەمی دێ ھەموو پەیوەندیێن جەمیل باییکی یێن ل گەل رێکخستنێن ئیستخباراتان دێ هێنه لێکۆلین کرن، پێدڤییه گەلێ کورد پەیوەندیێن جەمیل باییکی باش لێکۆلین بکه‌ت، پێدڤییه بەرسڤا رۆلێ میتێ د ناڤ پەکەکێ دا چییە بەرسڤ بدەت. ئەوێ کو ساکینا جانسز و ھەڤالێن وێ کوشتین، بلا بەرسڤا ڤێ کوشتنا پاریسێ ژ بۆ مللەتێ کورد بدەت، د بن سەرۆکاتییا جەمیل باییکی دا پەکەکە بوویە ھێلینا میتێ.
ترك ب تنی د شێن ناڤێن گه‌ریلایێن كوشتی ژ په‌كه‌كێ بزانن
خالەکە دی ژی، ئەو ئەندامێن پەکەکێ یێن د ترۆمبێلی دا و شکەفتان دا دهێنه کوشتن چەوا دهێنه تەسبیت کرن. فرۆکە لێدده‌ن و ناڤێ وی کەسێ کوشتی ژی دبێژن، ئەڤه چەوا چێدبیت، پەکەکە دبێژیت مللەتێ ھەرێمێ یێن سڤیل ئیستخباراتێ ددەنه دەولەتێ، ب چ دەلیل ئەڤ تاوانه دهێته کرن، ژ بۆ کو میتا ناڤخۆیی پەکەکێ ڤەشێریت خه‌لكێ ھەرێمێ دهێنه تاوانبار کرن، تەکنیکا دوژمنی یا بالەفرێن درۆن دکارن پشیکێ ل ئەردێ کەشف بکەن، دوژمن ئیستخباراتا کەسێن ترۆمبێلێ دا و ناڤێ وان تنێ دکاریت ژ ناڤ پەکەکێ ب ده‌ست خۆ بێخیت، وان ھەرێمێن وەک بەھدینان، مەتینی، گارە، گەلیێ زاپێ، ئاڤاشین و خواکورکی چ گەلێ ھەرێمێ لێ ناژین، وێرێ ژ بۆ ھاتن-چوونا سڤیلان قه‌ده‌غه‌یه.
نە جەمیل بایک گورگە نە ژی گەلێ کورد بەرخکە
گورگ و بەرخ ل ره‌خێ رووباره‌كی ئێك و دوو دبینن
گور دبێژیته بەرخکی: تو ئاڤا من شێلی دکەی.
بەرخک ژی بەرسڤ ددەت: ئەز ل ژێری مە تو ل ژۆری، ئەز چەوا ئاڤا تە شێلی دكه‌م؟
پشتی دەمەکێ گورگ دبێژیت: تە پار دزی ژ مالباتا من کربوو.
بەرخک دبێژیت: سالا پار هێشتا ئەز نەببووم.
گورگ دراوه‌ستیت و دبێژیت: من بریارا خوە دایە ئەز دێ تە خوەم.
داخوویانییا جەمیل باییکی و ھەموو ھەولدانێن پەکەکێ یێن دژی ھەرێما کوردستانێ وەک بریارا، گورگی یە. پەکەکێ بریارا خۆ یا شەر ل دژی ھەرێما کوردستانێ دایە، لێ ژ بۆ خۆ دڤێت به‌هانه‌یان پەیدا بکەت، دبێژیت ژبۆ چ بارەگەھێن دەولەتا ترک ل ھەرێما کوردستانێ ھەنە؟ ئەز دێ شەرێ هه‌وه كه‌م.
بەرسڤ: ئەڤ بارەگاھیێن ناتۆیێ نە ئزن نە د دەستێ مە دایە.
ژ بۆ چ هوون فرۆکه‌یێن ترکان نا راوه‌ستینن؟ ئەز دێ شەرێ هه‌وه که‌م.
بەرسڤ: سنۆرێ ھەوایی دبن کۆنترۆلا بەغدایێ و ئامەریکا دایە.
پەکەکە: پێدڤییه ھوون ژ زینی وەرتێ دەربکەڤن ھەکە ئەز دێ شەرێ هه‌وه که‌م.
بەرسڤ: زینی وەرتێ ب فەرمی ئاخا ھەرێما کوردستانێ یە ئەم دەرناکەڤین.
ئانکو پەکەکێ بریارا شەر دایه ئەو ژی وەک چیرۆکا گورگی و بەرخی، وەکی گورگی به‌هانه‌یان دگریت.
جەمیل باییکی و مەولوود چاوشئۆغلوی ب ھەڤدەمی گەف ل ھەرێما کوردستانێ كرن.
ھەلبەت پێدڤییه جەمییل باییک ڤێ بزانیت ژیان و سیاسەت نە وەک پرۆپاگندەیا ھوون ژ بۆ شەرڤانێن خۆ یێن نوو دکه‌ن، نە، نە ھوون گورگن نە ژی یێن دەرڤەیی هه‌وه بەرخکن و گەلێ کورد ژی نە ئەو کۆما لاینگرێن هه‌وه‌یه، یێن کو ھوون ھەرۆژ ل سەر کۆلانان سلۆگانان پێ ددنە گۆتن، گەر ھوون خەیالێن ئالۆزکرنا ھێلینا ھەموو کوردان ئانکو ھەرێما کوردستانێ دکه‌ن، بزانن کو دێ بەرسڤەکی گه‌له‌ك دژوار هێته دانێ.
ھەموو رەوشەنبیرێن کورد، پارتی و بزاڤێن کوردستانی و کەسێن خودان ھشمەندییا نەتەوەیی، پێدڤییه ھەمبەر ڤێ داخویانییا جەمیل باییکی یا بەحسا هێرشا ل سەر ھەرێما کوردستانێ و گەفێن کوشتنا سڤیلان دکەت، بێ دەنگ نەمینن و خودان ھەلوەستەک نشتیمانی، بن.
