لهه‌ڤهاتنا «هاكان فیدان و مسته‌فا كازمی» ل دژی باشوورێ كوردستانێ
ده‌وله‌تا تركیێ ژێر ب ژێر لهه‌ڤهاتنه‌ك ل گه‌ل سه‌ر وه‌زیرێ نوو یێ ئیراقێ مسته‌فا كازمی كرییه، ئه‌ڤ لهه‌ڤهاتن «بكارئانینا په‌كه‌كێ یه ژ بۆ لاواز كرنا پێگه‌ها كوردستانێ».
ل گۆر ئاگاهیێن هه‌ری تایبه‌ت یێن پێگه‌ها «داركا مازی»، هاكان فیدان سه‌رۆكێ سازییا ئیستخباراتا ده‌وله‌تا تركیێ «میت»ێ ل رۆژا 11/6/2020ان، سه‌ردانا به‌غدا یا پایته‌ختا ئیراقێ كرییه و دوو جڤینێن نهێنی ل گه‌ل مسته‌فا كازمی سه‌ر وه‌زیرێ نوو یێ ئیراقێ و فالح فه‌یاز، شێوه‌رمه‌ندێ ئه‌نجوومه‌نا ئه‌وله‌هییا نه‌ته‌وه‌یی ئیراقێ پێكئانینه.
پێگه‌ها «داركا مازی» كاری ناڤه‌رۆكا نیقاش و لهه‌ڤهاتنا ڤان جڤینان ب ده‌ست خوه بخه و ل گۆر وێ، پیلانه‌كه دن یا قرێژ ل دژی باشوورێ كوردستانێ هاتییه دارێتن.
هاكان فیدان د جڤینا د گه‌ل كازمی ده ئه‌ڤ داخوازی كربوون:
رازیبوونا ئیراقێ ژ بۆ لێدانا په‌كه‌كێ ل باشوورێ كوردستانێ.
ئیراق كۆردینات ئانكو جهـ و مه‌كانێن هه‌رێمێن په‌كه‌كێ بده تركیێ ب تایبه‌ت ل ناڤچه‌یێن شه‌نگال و مه‌خموورێ.
مسته‌فا كازمی ل سه‌ر ڤان هه‌ردو خالان رازی بوویه و نها ئیراق ل سه‌ر دو خه‌تان ڤێ ئه‌ركێ ب جی تینه، یا یه‌كه‌م ئالیكارییا تركیێ دكه و جیێن په‌كه‌كێ ژ بۆ تركیێ ئه‌شكه‌ره دكه، یا ددویان ژی ب ئاوایه‌كی هه‌ڤالبه‌ندییا خوه ل شه‌نگال و مه‌خموور ل گه‌ل په‌كه‌كێ به‌رده‌وام دكه ژ بۆ كو نه‌كه‌ڤه ژێر گۆمانێ.
هه‌ر ل ڤێ ده‌ربارێ ده حكوومه‌تا ئیراقێ ده‌مه‌ك پر درێژه مووچه‌یێن هه‌ژماره‌كه هه‌ری زێده یا گه‌ریلا و رێڤه‌برێن په‌كه‌كێ ژبۆ دابین دكه ب تایبه‌ت ئه‌وێن ل قادێن شه‌نگال و مه‌خموورێ.
هاكان فیدان و مسته‌فا كازمی لهه‌ڤ كرنه كو په‌كه‌كێ وه‌كه به‌هانه‌یه‌ك ب كار بینن ژ بۆ كو باشوورێ كوردستانێ لاواز بكن و ب وێ یه‌كێ، حكوومه‌تا باشوور د نیقاش و لهه‌ڤهاتنێن ل گه‌ل ئیراقێ ده داخوازییا تو ئیمتیاز و مافان نه‌كه.
ده‌وله‌تا تركیێ ب 4 رۆژان پاش سه‌ردانا هاكان فیدان ژ بۆ به‌غدایێ، ئێریشا سه‌ر باشوورێ كوردستانێ ده‌ست پێ كر و ل شه‌ڤا 15/6/2020ان ناڤچه‌یێن شه‌نگال و مه‌خموورێ هه‌ده‌ف كرن و پێتر ژ 81 جیێن په‌كه‌كێ ئیمها كرن.
په‌كه‌كه ژی ژ بۆ كو خوه ژ وان ئێریشان بپارێزه ب ئاوایه‌كی سیستماتیك خوه نێزی گوند و باژارۆكێن باشوورێ ولات دكه ژ بۆ كو ببن ناڤچه‌یێن سه‌ربازی و ئه‌و گوند وه‌رن ڤالان كرن، ئه‌ڤ یه‌ك ژی چێبوو كو ژ 15 ڤی مه‌هێ ڤه 18 گوندێن باشوور ب ته‌مامه‌تی هاتنه ڤالا كرن.
ب سه‌ده‌ما په‌ڤچوونێن په‌كه‌كێ و ئارته‌شا ده‌وله‌تا تركیێ ل سه‌ر خاكا باشوورێ كوردستانێ، هه‌یا نها پێتر ژ 450 گوندان هاتنه ڤالا كرن.
ب هه‌مان ئاوایی لهه‌ڤهاتنه‌كه ب هه‌مان ئاوایی ل ناڤبه‌را ئیراقێ، ئیرانێ و په‌كه‌كێ ده ژ بۆ ناڤچه‌یێن سینۆری یێن رۆژهلاتا و باشوورێ كوردستانێ هه‌یه و داركا مازی وێ ل ده‌مه‌كه نێز هۆرگلیێن وێ لهه‌ڤهاتنێ ژی پارڤه بكه.
