پەکەکێ قادرۆیەکی یەنەکێ کوشت

پەکەکێ قادرۆیەکی یەنەکێ کوشت

چاڤکانیێن پێگەها دارکا مازی ل باشوورێ کوردستانێ راگهاند کو ئیرۆ قادرۆیەکێ یەنەکێ ژ ئالیێ چەکدارێن سەر ب رێخستنا پەکەکێ ڤە ل گوندێ کەشانێ د ناڤا رەزێ وی دە هاتیە کوشتن و پشترە جەنازەیێ وی ل چوولێ هاتیە ئاڤێتن.

ئیرۆ رۆژا چارشەمی 24/6/2020ان قادرۆیێ یەنەکێ ئێ ب ناڤێ “عبدال عبدالله عبدال” ژ دایک بوویێ سالا 1973ان ل گوندێ کەشانێ ئێ سەر ب ناحیا باتووفا ل قەزا زاخۆ ب دەستێ چەکدارێن پەکەکێ ڤە ب 6 گولەیان هاتیە کوشتن.

ئەڤ قادرۆیێ یەنەکێ سەرێ سبێ ژ بۆ سەخبێریکرنا رەز و بیستانێن خوە دەرکەتبوو لێ بەلێ ژ ئالیێ چەکدارێن پەکەکێ ڤە رێ لێ هاتبوو گرتن و ژێ هاتبوو خواستن رەزێ خوە بجی بهێلە، پشتی ناڤبووری فەرمانا پەکەکێ رەت کری، پەکەکێ ب شەش گولەیان بەرسڤا وی دا و ئەو د جی دە کوشت.

پاش کوشتنا ڤی هەم ولاتیێ باشوورێ کوردستانێ، پەکەکێ جەسەدێ وی ئاڤێتن ئاقارێ گوندێ “خێزاڤا”، ئەڤ گوند ژی دکەڤە نێزی گوندێ کەشانێ.

تێ زانین کو نها گوندێ کەشانێ هاتیە چوولکرن ژبەرکو بوویە ناڤچەیەکا سەربازی و نها تو گوندیەک ل وی گوندی نینە، بەلکو بوویە جیێ چەکدارێن پەکەکێ.

پێش نها ژی پێگەها دارکا مازی د نووچەیەکێ دە باس ل هەبوونا چەکدارێن پەکەکێ د ناڤا ڤی گوندی دە کربوو کو ببوونە سەدەما وێ یەکێ کو گوند ژ ئالیێ تۆپخانەیێن ترکیێ ڤە بێ تۆپبارانکرن.