ب سەدەما پەکەکێ جارەکە دن گوندێن دھۆکێ تێن ھەدەف کرن

ئێریشا دەولەتا ترکیێ ل دژی پارتییا کارکەرێن کوردستانێ، ل باشوورێ ولات دەوام دکە، ئیرۆ جارەکە دن گوندێن سینۆرێ دھۆکێ کەتن بەر ئێریشان. چاڤکانیێن پێگەھا «دارکا مازی» ل باشوورێ کوردستانێ ئەشکەرە کرن، ئیرۆ رۆژا پێنجشەمی 2020/7/2 ان بالەفرێن جەنگ یێن دەولەتا ترکیێ، د تەعقیبا حەرەکەتێن پەکەکێ دە ئێریشی دەڤەرا بەرێ گارە کرنە.

دەست نیشان کر، بالەفران ل ساعەت 10:40 خۆلەک مۆشەکەک ل چیایێ ب ناڤێ «زەنگلێ» یێ باکورێ گوندێ «سارکێ» گرێدای ناڤچەیا سەرسنکێ دانە.

ل گۆر دیمەنێن کو چاڤکانیێن مە شاندنە، دۆمانەکە پر ل جیێ ئێریشێ بەرز بوویە. دەولەتا ترک ل رۆژا 15 مەھا رابووری ئێریشا سەر باشوورێ ولات دەست پێ کر، ژ وێ دەمێ ڤە ھەژمارەک گوندێن ناڤچەیێ ھاتنە ڤالا کرن و بوونە ناڤچەیێن عەسکەری، گەلێ ناڤچەیێ ژی ژ پەکەکێ دخوازە خوە ژ گوندێن وان دوور بکە ژ بۆ کو نەکەڤن بەر ئێریشان، پەکەکە ژی ھەرکو دچە پێتر شەرێ خوە تێخە ناڤا گوند و نێزی باژارۆکان.