ئارته‌شا تركیێ و هێزێن گرێدای وێ ل رۆژئاڤا كوردستانێ، پێتری 75 هه‌زار دۆنه‌م زه‌ڤیێن چاندنیێ ل سینۆرێ عه‌ین عیسا و گرێسپیێ شه‌وتاندنه.
چاڤكانیێن پێگه‌ها «داركا مازی» ل رۆژئاڤا كوردستانێ ده‌ست نیشان كر، ته‌ڤگه‌رێن ئارته‌شا تركیێ و هێزێن گرێدای وێ ل سینۆرێ باژارۆكێن عه‌ین عیسا و گرێسپیێ ده‌وام دكن و زرارێن مه‌زن ب ڤێ سه‌ده‌مێ ب گه‌لێ ناڤچه‌یێ و زه‌ڤیێن وان یێن چاندنیێ كه‌تنه.
ل گۆر ته‌خمینا ئالیێن ده‌ستهلاتێ ل رۆژئاڤا ولات، ب سه‌ده‌ما ئێریشێن تركیێ و ته‌ڤگه‌رێن له‌شكری، ب قاسی 73 هه‌زار دۆنه‌م زه‌ڤی ل سینۆرێ عه‌ین عیسایێ و پێتر ژ 2500 دۆنه‌م ل سینۆرێ گرێسپیێ هاتنه شه‌وتاندن.
چاڤكانیێن پێگه‌ها «داركا مازی» دیار كرنه، ئارته‌شا تركیێ و هێزێن گرێدای وێ ب ئاوایه‌كی سیسته‌ماتیك خال و نوقته‌یێن خوه ل ناڤچه‌یا ب ناڤێ هه‌رێما ئه‌وله‌هیێ زێده كرنه، هه‌ژماره‌كه هه‌ری زێده یا دبستانان ژی وه‌كه قه‌رقوولێن له‌شكری كرنه.
تێ زانین هه‌ر چه‌ند كو لهه‌ڤهاتنه‌كه ئاگربه‌ستێ هه‌یه، لێ به‌لێ ئارته‌شا تركیێ ل رۆژێن رابووری 38 خال و نوقته‌یێن له‌شكری ل سینۆرێ گرێسپیێ و عه‌ین عیسایێ ئاڤا كرنه.
