پەکەکە دیسان دبە سەدەما بۆردۆمان کرنا گوندەکێ دێرەلۆکێ

بالەفرێن جەنگ یێن دەولەتا ترکیێ، ئیرۆ جارەکە دن د تەعقیبا حەرەکەتێن پەکەکێ دە، گوندێن دەڤەرا بەرێ گارەی بۆردۆمان کرن.

چاڤکانیێن پێگەھا «دارکا مازی» ل باشوورێ کوردستانێ راگھاندن کو ئێڤارا ئیرۆ رۆژا سێشەمی 7/7/2020ان بالەفرێن ترکیێ، دەڤەرا بەرێ گارەی ل سینۆرێ پارێزگەھییا دھۆکێ بۆردۆمان کر.

ھەر وھا دەست نیشان کر، بالەفران ل ساعەت 7:30ێ پاش ئێڤارێ مۆشەکەک ل ئاقارێ گوندێ ب ناڤێ «سپیندارا خەلفۆی» یێ گرێدای باژارۆکێ دێرەلۆکێ دانە.

ل گۆر دیمەنێن کو ژ بۆی پێگەھا «دارکا مازی» ھاتنە شاندن، دۆمانەکە پر ل جیێ کەتنا مۆشەکێ بلند ببوو.

ئێریشا دەولەتا ترکیێ ل سەر باشوورێ کوردستانێ ب سەدەما پەکەکێ، ل 15ی مەھا رابووری دەست پێ کربوو، ژ وێ دەمێ ڤە و ژبەرکو پەکەکێ خوە نێزی گوند و باژارۆکان کرییە، ھەرکو دچە خەتەر ل سەر شێنییان پێتر دبە.