چاڤکانیێن مافێن مرۆڤان ل باژارێ سنە، رۆژھلاتێ کوردستانێ، رۆژا سێشەمێ (١٤ێ تیرمەھێ) راگھاند کو زەھرا محەمەدی، چالاکڤانا چاندی و مامۆستەیا زمان، ژ ھێلا دادوەریا کۆمارا ئیسلامی یا ئیرانێ ڤە ل باژارێ سنە ژبەر دەرس دایینێ ب زمانێ کوردی ب ١٠ سالان زیندان کرنێ ھات سزا دان.
ل گۆر زانیاریێن د دەست رێخستنا مافێن مرۆڤان ئا “ھەنگاو”، زەھرا محەمەدی، مامۆستەیا زمانێ کوردی و سەرۆکا ئەنجوومەنا چاندی-جڤاکی یا نۆژین، ٧ مەھان پاش ئازادیا دەمکی ژ ھێلا دەستەیا دادوەری یا ئیرانێ ڤە ب ١٠ سال زیندان کرن ھات سزادان.
چاڤکانیێن ئاگاھدار ژ “ھەنگاو”ێ رە راگھاند کو ئەڤ بریار ژ ئالیێ دادگەھا شۆرەشا ئیسلامی یا ئیرانێ ڤە ل باژارێ سنە، ب سەرۆکاتیا دادوەر “سەعیدی”، ب تاوانا ساز کرنا گرووپەکی ل دژی ئەولەھیا نەتەوی ھاتە دەرخستن.
چاڤکانیێن ھەنگاوێ ئەڤ یەک ژی دیار کر کو بریارا دادگەھێ رۆژا سێشەمێ ژ پارێزەرێ زەھرا محەمەدی رە ھاتە راگھاندن.
دەرکرنا بریارا ١٠ سال زیندان کرنا زەھرا محەمەدی، ژ ھێلا دادگەھا کۆمارا ئیسلامی یا ئیرانێ ڤە ب تاوانا ساز کرنا گرووپەکی ل دژی ئەولەھیا نەتەوەیی یا ئیرانێ د دەمەکی دەیە کو زەھرا محەمەدی ب تەنێ ئەندام بوویە د ئەنجوومەنا “نۆژین” دا و د دادگەھێ دە تو سووچبار کرنەک ب ڤێ تاوانێ ل سەر ڤێ ئەنجوومەنێ نەھات ئیسبات کرن.
زەھرا محەمەدی و دو ئەندامێن دن یێن ئەنجوومەنا نۆژین رۆژا پێنجشەمێ، ٢٣ێ گولانا ٢٠١٩، ژ بال ھێزێن ئەولەھیا ئیرانێ ڤە ھاتن گرتن، پشتی کو سازیا ئیستخباراتا ئیرانێ ئاڤێتی سەر مالا وێ، و د داویا ھەمان سالێ دە ب کەفالەتا ٧٠٠ میلیۆن تیمەنێن ئیرانی سەربەست ھاتە بەردان.
زەھرا محەمەدی ٢٨ سالی یە و ب ئەسلێ خوە ژ گوندێ “سرڤالە دەھگۆلان”ە و ل باژارێ سنە دژی. زەھرا د قادا ژەئۆپۆلیتیکێ دە خوەدی ماستەرە و ل زانینگەھا بیرجەند ئەڤ ماستەر وەرگرتیە.
