ل چلیا ژۆرا ناڤچەیا ئەبەخێ لەشکەران زارۆکێ ب ناڤێ ئازاد باگایێ یێ ١٥ سالی گولەباران کر ئەو ب گرانی بریندار کرن.
ل گوندێ چلیا ژۆرا گرێدایی ناڤچەیا ئەبەخێ (پایزاخا)یا وانێ لەشکەران گولە ل زارۆکێ ب ناڤێ ئازاد باگایێ ١٥ سالی کو ل بەر پەز بوو رەشاندن. ھات گۆتن گولە ل پشتا ئازاد باگا کەتنە و ب گرانی بریندار بوویە. گوندیان باگا ب ئامبولانسێ راکرن بنگەهێ ساخلەمیا دورسون ئۆداباش یا زانینگەھا یوزونجویلێ ئا وانێ و تێ گۆتن رەوشا وی گرانە و تێ دەرمانکرن.
پشتی بوویەرێ مالباتا ئازاد باگایێ چوو بەر نەخوەشخانەیێ. دایکا لاوکێ بچووک دەربارێ بوویەرێ دە ئاگاھی دان و گۆت: “کورێ من ل گوندێ چلیا ژۆر شڤانیێ دکر. لەشکەران سەرێ سبێ گولە لێ رەشاندینە و گولە ل پشتا وی کەتنە. مە ژی پشت رە بوویەر بھیست و ئەم ھاتن نەخوەشخانەیێ. ئەم دخوازن ژ مەسەلەیێ فێم بکن. رەوشا وی گرانە. دەربارێ رەوشا وی دە ئاگاھی نەدانە مە.”
کۆمەلەیا مافێ مرۆڤان ئا شاخا وانێ ژی بوویەر ل سەر حەسابا خوە ئا تویتەرێ بەلاڤ کر و گۆت ئەو بوویەرێ دشۆپینن. مالباتا باگا سەری ل کۆمەلەیێ دا و خوەست کو کۆمەلە پشتەڤانیا حقووقی بدە وان.
