زرارێن په‌كه‌كێ ل زاپێ پێتر دبن

زرارێن په‌كه‌كێ ل زاپێ پێتر دبن

ئێریشا ده‌وله‌تا تركیێ ئا ل دژی په‌كه‌كێ ل باشوورێ كوردستانێ ده‌وام دكه‌، هه‌ركو دچه‌ زرارێن په‌كه‌كێ ژی پێتر دبن.

ل گۆر ئاگاهیێن ده‌ستێ مه‌، ژ دوهـ رۆژا دوشه‌می 20/7/2020ان ڤه‌، باله‌فرێن بێ پیلۆت ئێن ده‌وله‌تا تركیێ هه‌ژماره‌كه‌ ئێریشان ل هه‌رێمێن باشوور پێكانینه‌، یه‌ك ژێ ل هه‌رێما زاپێ بوو و تێده‌ زرارێن مه‌زن ب گه‌ریلایێن په‌كه‌كێ كه‌تنه‌.

د ئێریشا دوهـ ده‌، 3 گه‌ریلا كه‌تن به‌ر مۆشه‌كێن باله‌فران و جانێ خوه‌ ژ ده‌ست دا، جیێن وان هاتن ئیمها كرن.

ژ رۆژا 19 ڤێ مه‌هێ ڤه‌، په‌كه‌كێ 6 گه‌ریلا ته‌نێ ل هه‌رێما زاپێ ژ ده‌ست دانه‌، ل همبه‌ر 2 ئه‌سكه‌رێن تركان ل ده‌ڤه‌را هه‌كاریێ ب ده‌ستێ په‌كه‌كێ هاتنه‌ كوشتن.

چاڤكانیێن پێگه‌ها «داركا مازی» ل باشوورێ كوردستانێ ئه‌شكه‌ره‌ كر، ژ رۆژا 18ی ڤێ مه‌هێ ژی ڤه‌، باله‌فرێن ده‌وله‌تا تركیێ 2 جاران جیێن په‌كه‌كێ ل چیایێ لینكی ل سینۆرێ ناڤچه‌یا دێرەلۆكێ ئا ل رۆژهەلاتا باژارێ ئامێدیێ بۆردۆمان کرنه‌.