هەڤسەرۆکێ هەدەپێ یێ سێرتێ ل سلێمانیێ تێ رەڤاندن

هەڤسەرۆکێ هەدەپێ یێ سێرتێ ل سلێمانیێ تێ رەڤاندن

نوونەرێ پارتییا دەمۆکرات ئا گەلان هەدەپێ، ل هەرێما باشوورێ کوردستانێ راگهاند کو یەک ژ قادرۆیێن وان ئەڤ دەما 15 رۆژانە ل سلێمانیێ هاتییە رەڤاندن و هەیا نها تو زانیارییەک ل سەر رەوشا وی نەهاتییە هین بوون.

عابد ئیکە، نوونەرێ هەدەپێ ل باشوورێ کوردستانێ د داخوەیانییەکێ دە راگهاند، عەلی کایار سەرۆکێ شاخا سیرتێ یا باکورێ کوردستانێ، ئەڤ دەما 15 رۆژانە ووندایە و ژ بۆ هین بوون ژ چارەنڤیسا وی، وان سەردانا ئاساییش و سازیێن دن یێن ئەولەهیێ ل سلێمانیێ کرییە، لێ بەلێ وان سازییان بێ ئاگاهییا خوە ژ چارەنڤیسا ڤی قادرۆیێ وان دیار کرنە.

ژ بال خوە ڤە پۆلیسێن سلێمانیێ ژی د داخوەیانییەکێ دە راگهاند، «تو تشت ب دەستێ وان نینە و ئەم بێ ئاگەهین ژ وێ یەکێ کا چ ب سەرێ ڤی قادرۆیێ هەدەپێ هاتییە».

ل گۆر داخویانییا عابد ئیکە، پێش نها هنەک چەکدارێن نەناسکری د ناڤا باژارێ سلێمانیێ دە تەعقیبا عەلی کایار کرییە، و ئەو گۆمانێ ژ وێ یەکێ دکن ل سلێمانیێ ئالیکارییا میتا ترکیێ هاتبە کرن ژ بۆ رەڤاندنا عەلی کایار، ژ بەر کو قەت نەلۆژیکی یە د ناڤا وان هەموو هێزێن ئەولەهیێ دە ئەڤ قادرۆیێ وان وەرە رەڤاندن و تو کەسەکی زانیاری ل سەر وی نەبن و ئەو نەدیتبە.

عابد ئیکە دبێژە: «ئەم گۆمان دکین هنەک کەسان د ناڤا سلێمانیێ دە ئالیکارییا میتا ترکیێ کربە، ژ بەر کو فەرمانا دەستەسەرکرنا عەلی کایار ل ترکیێ دەرچوویە، نوونەرێ هەدەپێ ل باشوورێ وەلات داخواز ژ حکوومەتا هەرێما کوردستانێ کر لیژنەیەکا لەکۆلینێ ژ بۆ دیار کرنا چارەنڤیسا قادرۆیێ وان وەرە پێکئانینن».