ئێریشا تركیێ ئا ل سه‌ر باشوورێ كوردستانێ كو ب سه‌ده‌ما په‌كه‌كێ ل 15 مه‌ها خزیرانێ ده‌ست پێ كر بوو، د دۆمه و عه‌سكه‌ره‌كێ ترك هات كوشتن.
ل گۆر داخوه‌یانییا وه‌زاره‌تا پاراستنا نه‌ته‌وه‌یی ئا تركیێ كو ئیرۆ رۆژا پێنجشه‌می 6/8/2020ان پارڤه‌كرییه، عه‌سكه‌ره‌كێ ترك ل باشوورێ كوردستانێ ل هه‌رێمێن ئۆپه‌راسیۆنێن په‌نجا پلنگ ژ بال په‌كه‌كێ ڤه هات هه‌ده‌ف كرن.
د داخوه‌یانیێ ده وها هاتییه: ل هه‌رێمێن ئۆپه‌راسیۆنێ شه‌ر ل گه‌ل په‌كه‌كێ قه‌ومی، گوندپارێزه‌ك بریندار كه‌ت و پشتره ل نه‌خوه‌شخانێ كو دهاته ته‌داوی كرن ل به‌ر خوه نه‌هات و جانێ خوه ژ ده‌ست دا.
ده‌وله‌تا تركیێ ل 15 مه‌ها خزیرانا رابووری، مه‌زنترین ئێریشا سه‌ر باشوورێ كوردستانێ ل دژی په‌كه‌كێ دا مه‌شاندن، ژ وێ ده‌مێ ڤه، په‌كه‌كێ هنه‌ك ناڤچه‌یێن دن ئێن كو ل ژێر كۆنترۆلا وێ ده بوون ژ بۆ ئارته‌شا تركیێ ب جی هشتن، هه‌ركو دچه ژی په‌كه‌كه شه‌ری نێزی باژارۆكان دكه.
ب سه‌ده‌ما ڤێ ئێریشێ، ژ ده‌ما ده‌ست پێ كرنا وێ هه‌یا ئیرۆ، نێزی 50 گوندێن باشوور هاتنه ڤالا كرن، هه‌ژماره‌كه شێنیێن سڤیل ژی شه‌هید كه‌تنه.
