جەمیل بایک ب ئاوایەک فەرمی و بێ پەردە شەر ل دژی مەزلووم کووبانی راگهاند

جەمیل بایک ب ئاوایەک فەرمی و بێ پەردە شەر ل دژی مەزلووم کووبانی راگهاند

جەمیل بایک هەڤسەرۆکێ کۆما جڤاکێن کوردستانێ – کەجەکێ د داخوەیانیەکێ دا ژ بۆ کانالێ ستێرک یێ پارتییا کارکەرێن کوردستانێ راگهاند کو ئە ئاگەهداری لهەڤهاتنا دناڤبەرا دەستهلاتداریا خوەسەر یا رۆژئاڤا کوردستانێ و شیرکەتا پەترۆلا ئەمەریکی نینە و ئەڤ یەک وەکو هەر کەسی د راگهاندنێ دە بهیستیە.

بایک د داخوەیانیا خوە دا ژ بۆ کانالێ تەلەفزیۆنی یێ پەکەکێ یێ ب ناڤێ ستێر، راگەهاند “هەموو چاڤکانیێن سروشتی یێن سەر ئەرد و ژێر ئەرد یێن سووریێ مولکێ دەولەت و خەلکێ سووریێ ب گشتی نە، کەسێ ئەڤ ماف نینە وان چاڤکانیان بکە یێن خوە و بازرگانیێ پێ بکەت.”

ئەڤ داخوەیانیا جەمیل بایک باشترین بەلگە یە ل سەر ڤێ یەکێ کو پەیوەندیێن دناڤبەرا رێڤەبەریا خوەسەر ل رۆژئاڤا کوردستانێ و رێڤەبەریا قەندیلێ دا ب ئاوایەک نە چاڤەرێ کری لاواز و قوت بوونە، ب رەنگەکی کو رێڤەبەریا پەکەکێ ل قەندیلێ ئاگەهـ ژ رێکەفتنەکا گرینگ یا ب ڤی رەنگی نینە.

جەمیل بایک ل سەر لهەڤهاتنا دناڤبەرا رێڤەبەریا خوەسەر و شیرکەتا “دەلتا کرێسینت ئینێرجی” ئا ئامەریکی راگهاند ئەو ئاگەهداری ڤێ رێکەفتنێ نەبوون و دبێژیت: “ئەم ب خوە ژی ب رێکا مەدیایێ دووڤچوونا هنەک مژاران دکین، ژ بەر ڤێ یەکێ ئەم ب تەمامی نزانین کو راستیا ڤێ رێکەفتنێ چییە. باس ل ڤێ یەکێ تێ کرن کو ب رێکا شیرکەتەک پەترۆلێ ریکەفتنەک هاتیە ئیمزا کرن، خوە ئێماژە ب ڤێ یەکێ ژی تێ کرن کو حکوومەتا سووریێ ژی ڤێ رێکەفتنێ قەبوول ناکە و ب کارەکی نە قانوونی ب ناڤ دکە و دبێژە پەترۆلا مە ددزن.”

بایک د داخوەیانیا خوە دا دبێژە پێویستە هەر تشت ب ڤەگەریان بۆ رێبەر ئاپۆ وەرە ئەنجامدان ژبەرکو یاکو ل باکورێ سووریێ ژ بۆ کوردان ب دەست هاتی ژ ئەنجامێ وێ کەد و خەباتێ یە یاکو ئاپۆ ل باکوورێ سووریێ ژ بۆ وان ئەنجامدای.

ئەڤ ئاخافتنا جەمیل بایک د دەمەکیدایە هەیاکو ئۆجەلان ل سووریێ بوو ب چ رەنگان رۆژئاڤا کوردستانێ وەکە بەشەکێ کوردستانێ حەساب نەدکر، بەلکو هەردەم دگۆت کوردێن رۆژئاڤا ل سووریێ پەنابەرن و ژ باکورێ کوردستانێ هاتینە و ئاخا رۆژئاڤا کوردستانێ ژی ب ئاخا سووریایا عەرەبی پیناسە دکر، ئەڤ سیاسەت و ئاخافتنا نها یا بایک ڤەرێژا ئاخافتن و سیاسەتا وێ دەمێ یا ئۆجەلانە.

ب سالایە د ناڤا رێڤەبەرییا رۆژئاڤا دا، ئەڤ یەک خوەیا بوویە کو سیاسەت و رێڤەبرن ل سەر شێوازێ کادرۆیێن پەکەکێ، ب تایبەتی کادرۆیێن گرۆپا دامەزرینەر ئا پەکەکێ «گرۆپا ئەنقەرێ» سەرکەتنێ نائینیت، دیار بوویە نە ب شیرۆڤەکرنا وان یا سیاسی و رێڤەبرنا وان یا پراکتیکی رۆژئاڤا ناهێتە برێڤەبرن و وان باش فێم کرییە ب ئەدەبیاتا کەلەجانی ولات نایێ برێڤەبرن، دخوازن سیاسەتەک بنگەهین و راست و دروست بهێتە بکارئینان، گرۆپەک وها هەیە کو ب تەنێ ب سلۆگانان و کەلەجان و بەرخوەدانا شکلی رازی نابە، بەلکو دخوازن سەرکەتنەک مسۆگەر ب دەست بینن، ل سەر ڤێ یەکێ شەخسیەتا کو پێتر ژ هەر کەسی دەردکەڤیتە پێش مەدیایێ کەسەکی وەکو جەنەرال مەزلووم کۆبانی «مەزلووم عەبدی» یە، یا راست ناکۆکیێن دناڤبەرا رێڤەبەرییا پەکەکێ یا ل قەندیلێ و رێڤەبەرییا خوەسەر یا رۆژئاڤا کوردستانێ ل سەر ڤی شێوازێ هزرکرنێ دەستپێکرن.

بەشەکێ دی ژ ناکۆکیێن دناڤبەرا مەزلووم کووبانی و رێڤەبەرییا خوەسەر دگەل جەمیل بایک و رێڤەبەرییا قەندیلێ ژ بۆ نێزیکبوونا دناڤبەرا رۆژئاڤا و باشوورێ کوردستانێ ڤەدگەرە، ئەڤ ژی ژبەر دو سەدەمان، یا یەکێ دەما کو نێچیرڤان بارزانی سەرۆکێ هەرێما باشوورێ کوردستانێ هنەک ئاموور و کەرەستەیێن پزیشکی ژ رۆژئاڤا رە شاندی و پاشان مەزلووم کۆبانی ژ بووی ڤێ یەکێ سپاسیا نێچیرڤان بارزانی کری، هەر وەها خالا ددویان و خالا سەرەکە رۆلا باشوورێ کوردستانێ د لهەڤهاتنا دناڤبەرا ئالیێن سیاسی یێن رۆژئاڤا کوردستانێ دە، ئەو لهەڤهاتنا بنگەها خوە ژ لهەڤهاتنا دهۆکێ یا د بن سەرپەرشتیا سەرۆک مەسعوود بارزانی وەرگرتی، دزڤرە، ژ بەر ڤان ئەگەران مەزلووم کۆبانی چەندین جاران داخوەیانی دان مەدیایێ و تێدە سپاسیێن خوە ئاراستەی مەسعوود بارزانی و نێچیرڤان بارزانی کرن، بێ کو باس ل پەکەکێ ر رێبەرێ وان یێ زیندان کری بکە، ئەڤ یەک ژ بۆ پەکەکێ پڕ نەخوەش بوو.