هۆشەنگێ ئۆسێ نڤیسەر و چاڤدێرێ سیاسی یێ رۆژئاڤا کوردستانێ کو چەندین سالان د مەدیایا پارتییا کارکەرێن کوردستانێ دە کار کرییە، ئەشکەرە دکە کو جەمیل بایک، هەڤسەرۆکێ کۆما جڤاکێن کوردستانێ «کەجەکێ» نها ل باژارێ قامشلۆ یێ رۆژئاڤا کوردستانێ یە و دخوازە وەکە سالێن 90ان کو ئۆجەلان ل قامشلۆیێ بوو، ئەو ژی ڤەگەرە قامشلۆیێ.
هۆشەنگێ ئۆسێ نڤیسەر و چاڤدێرێ سیاسی د رۆپەلا خوە یا تایبەت د تۆرا جڤاکی یا فەیسبۆکێ دە ب زمانێ عەرەبی نڤیساندیە کو ل گۆر زانیاریێن بەردەستێ وی نها جەمیل بایک ل رۆژئاڤا کوردستانێ یە و ئاماژە ب ڤێ یەکێ دکە کو: “ل گۆر زانیاریێن گهیشتی دەستێ من، جەمیل بایک ل قامشلۆ یێ یە، گەر ئەڤ یەک راست بە کو بەهرا پێتر راستە، ئەڤە ب وێ واتەیێ تێ کو ناکۆکیێن دناڤبەرا پەکەکێ و مەزلووم کۆبانی و هەڤالێن وی گهشتیە قۆناغەکی کو ڤەگەرین ژ بۆ تونەیە، ئانکو جەمیل بایک هاتیە مژارێ ب ئاوایەکی یەکجاری یەکلا بکە. ئەڤ یەک ژی نایێ ئەنجامدان گەر ب هەماهەنگی و پشتەڤانییا رەژێما سووریێ نەبە.”
هەر وەها باس ل ڤێ یەکێ ژی دکە کو رەژیما ئەسەد ل پشت تەرۆرکرنا کەساتیێن عەشایری یێن ناڤچەیا جزیرێ یە، و دخوازن ب ڤێ یەکێ عەرەبا ل دژی مەزلووم عەبدی هان بدن. هەڤ دەم پەکەکە ژی ل پشت لەشکەرکرنا ب زۆر ئا زارۆکانە داکو مەزلووم عەبدی ل بەرامبەری سازی و ئالییێن ناڤدەولەتی ئیحراج بکن.
هۆشەنگێ ئۆسێ نڤیساندیە: “رەنگە جەمیل بایک خەونا ب ڤەگەرین بۆ دیمەشقێ و ل بن پارێزڤانییا رەژێما ئەسەدێ کور ببینیت، وەکە کو ئۆجەلان بەرا 20 سالان کری. بایک ل سەر وێ باوەرێ یە کو رەژێما ئەسەدێ کور ژ بال ئیران و رووسیایێ ڤە ئا پاراستی یە، رەوشا وێ باشترە ژ رەژێما حافز ئەسەد کو نەچار بوو ئۆجەلان ل سالا 1998ان ژ سووریێ دەر بکەت و لهەڤهاتنا ئەدەنە ئیمزا بکە و بازاری ل سەر لیوایا ئەسکەندەرۆن ژ بۆ ترکان بکت.”
ئەڤ نڤیسەرێ رۆژئاڤا کوردستانێ ئەشکەرە دکە کو “پارتیا پەکەکێ نەمایە، ب تەنێ چەند گرووپەک پڕ بچووک یێن گەریلایان ل چیایێن قەندیلێ مانە، ئانکو بۆردۆمانا ترکیێ یاریەکە ژ یاریان. پەکەکێ بەشەکی هەرە زۆر ئێ چەکدارێن خوە ژ بۆ رۆژهلاتێ کوردستانێ ڤەگوهاستینە و نها دەست درێژیێ ل سەر پارتیێن کوردی یێن رۆژهلاتێ کوردستانێ دکن. بەشەک دن ژ چەکدارێن پەکەکێ چوونە شەنگالێ و کەمپا مەخموورێ، سەرکرداتیا پەکەکێ ژی ب هەماهەنگی و بریارا رەژێما ئیرانێ نها ل ناڤچەیێن ژێر دەستهلاتا YNK دانە”.
هۆشەنگێ ئۆسێ دبێژە ناڤچەیێن کوردی ل رۆژئاڤا کوردستانێ گهشتینە قۆناغەکە گەرم و ئێکلاکەر، “هەبوونا جەمیل بایک ل رۆژئاڤا ب ڤێ واتەیێ تێ کو هەموو هەولدایینێن سەبری ئۆک، موراد قەرەیلان و دوران کالکان ژ بۆ رازیکرنا مەزلووم کۆبانی ژ بۆ ڤەگەرینا وی بۆ ناڤ چارچووڤێ پەکەکێ و پابەندبوون ب بریار و ئەجیندایێن وێ، شکەستن ئانییە. جەمیل بایک ل رۆژئاڤا یە داکو مژارێ ب یەکجاری یەکلا بکە، خوە گەر ڤێ یەکێ پێویستی ب چارەسەریەکە سەربازی و ب خوین بە.”
سەبارەت ئەگەرا بکارئانینا هێزێ و چارەسەرییا سەربازی ل همبەر کەسەکی وەکە مەزلووم عەبدی، ئەڤ نڤیسەرە ب پشت بەستن ب گفتوگۆیەک رۆژنامەڤانی ئا کریس کۆچێرا، رۆژنامەڤانێ فەرەنسی د گەل ئۆجەلان ل سالا 1999ان دکە کو د کۆڤارا «الوسط» ئا لەندەنی دە هاتیە بەلاڤکرن و مەهەکێ بەرا بهێتە دەستەسەرکرن، ئۆجەلان، جەمیل باییک ب ڤێ یەکێ سووچبار دکە کو فەرمانا کوشتنا هەڤالێن خوە یێن بریندار دەرکرییە و ئەو کوشتینە. ژ بەر ڤێ یەکێ ” ل گۆر ڤان سووچبارکرنێن ئۆجەلان بە، بایک تاوانبارێ جەنگە، هەر کەسەک بریارا کوشتنا بریندارێن دوژمنی بدە تاوانبارێ جەنگە، ئەڤجا کەسەک کو بریارا کوشتنا هەڤالێن خوە بدە؟”.
د داوییا نڤیسینا خوە دە ئۆسێ دبێژە: “کەسێن کو دکارن ڤێ مژارێ یەکلایی بکن، نوورەدین سۆفی، باهۆز ئەردال، ئیلهام ئەحمەد، فەوزە یوسف و کەسێن دنن، ئالدار خەلیل ژی یەکلا بوویە کو زلامێ جەمییل باییکە. مەزلووم عەبدی و کەسێن د گەل وی دە، ب قۆناغەکە گران و هەستیار دە دەرباس دبن، قۆناغەک وەها کو وێ هەبن یانژی نابن، ئەڤ یەک ژ بۆ جەمیل بایک و زلامێن وی ل رۆژئاڤا ژی دبە”.
تەکەز کر: “ئاخافتنێن ڤێ داوییێ یێن جەمیل باییک تەکەز ل گەلەک تشتان کر کو مە پێش نها باسکرن. هەر وەها نووچەیا چوونا باییک ژ بۆ رۆژئاڤا و ئەگەرا چوونا وی ژ بۆ دیمەشقێ یان ژی دیدارا وی دگەل بەرپرسێن ئەولەهی یێن سووریێ ل بالەفرخانەیا قامشلۆ، ئەگەرەک پڕ بهێزە”.
ئەڤ یەک د دەمەکیدایە کو پێش نها جەمیل بایک ب فەرمی دژاتیا خوە ژ بۆ لهەڤهاتنا رێڤەبەرییا رۆژئاڤا کوردستانێ و شیرکەتێن ئامەریکی د بیاڤێ پەترۆلا رۆژئاڤا کوردستانێ دە راگهاندبوو.
