رێڤەبەریا خوەسەر یاسایا “پاراستن و رێڤەبرنا ملکێن کەسێن نەدیار” رادوەستینە

رێڤەبەریا خوەسەر یاسایا"پاراستن و رێڤەبرنا ملکێن کەسێن نەدیار" رادوەستینە

رێڤەبەریا خوەسەر یا باکور و رۆژھلاتێ سووریێ راگھاند: یاسایا “پاراستن و رێڤەبرنا مال و ملکێن کەسێن نەدیار” ھات راوەستاندن.

ل گۆر داخویانیا نڤیسکی یا رێڤەبەریا خوەسەر ئا باکور و رۆژھلاتێ سووریێ، یاسایا ھەژمارا ٧ئا سالا ٢٠٢٠ان کو ب “پاراستن و رێڤەبرنا مال و ملکێن کەسێن نەدیار” ھاتیە بناڤکرن، ھات راوەستاندن و دێ جار دن ل سەر ڤێ یاسایێ وەرە ئاخافتن، دا کو ل گۆر مافێن وەلاتی و گەلێن ھەرێمێ بە.

ھەروھا د داخویانیێ دە ھاتیە ئەشکەرەکرن: “ئەڤ بریار ژ بەر وێ یەکێ ھاتیە دایین کو ئەڤ یاسا ژ ئالیێ مەدیا، سازیێن سڤیل و جەماوەر و خەلکێ باکور و رۆژھلاتێ سووریێ یێن ل دەرڤەیی وەلات ڤە، خەلەت ھاتیە فێمکرن”.

دەما یاسایا “پاراستن و رێڤەبرنا مال و ملکێن کەسێن نەدیار” ھاتبوو راگھاندن، ژ ئالیێ کۆچبەرێن رۆژاڤایێ کوردستانێ و پارتیێن سیاسی ڤە رەخنە لێ ھاتبوو کرن، کو دھاتە گۆتن: “رێڤەبەریا خوەسەر دکارە دەستێ خوە دەینە سەر مال و ملکێن کۆچبەرێن کو مەرۆڤێن وانێن د پلەیا یەکەم و دویەم دە نینن.”

ل سەر ڤێ مژارێ، مافناس ردوان سیدۆ، ئەندامێ نڤیسگەھا یاسایییا ئەنکسێ ژ ک٢٤ێ رە راگھاندبوو؛ ئەڤ یاسایا نوویا رێڤەبەریا خوەسەر نە رەوایە و یاسایەکە پاشکەتییە. پێویست بوو ڤێ یاسایێ مەرۆڤێن کۆچبەران یێن د پلەیا سێیەم و چارەم ژی ل خوە بگرتا، یان ژی کەسێ نەدیار (کۆچبەر) بکارە ب رێیا وەکیلەکی مال و ملکێن خوە بپارێزە و ئیدارە بکە.