هۆزێن كورد ئێن ل كه‌ركووكێ ب سه‌ده‌ما خه‌ته‌رییا ته‌عریب كرنا ناڤچه‌یێن وان، بانگه‌وازییه‌كه له‌زگین ددن و دبێژن: پێڤاژۆیا ته‌عریب كرنێ ده‌ست پێ كرییه.
سه‌رۆك هۆزێن كورد ئێن ل كه‌ركووكا باشوورێ كوردستانێ، ئیرۆ رۆژا پێنجشه‌می بانگه‌وازییه‌كه له‌زگین دانه هه‌رسێ سه‌رۆكتیێن ئیراقێ و تێده ب زه‌لالی به‌حسا خه‌ته‌رییا ته‌عریب كرنا ناڤچه‌یێن خوه كرنه ب ئاوایه‌كی كو شێنیێن عه‌ره‌ب ب زۆر تێن ل جیێن وان نیشته‌جی كرن.
د بانگه‌وازییا هۆزێن كورد ده وها هاتییه نڤیساندن: ب پشتگری و چاڤدێرییا پارێزگه‌رێ كه‌ركووكێ و ب ئامانجا كۆم كرنا ده‌نگان ژ بۆ هلبژاتنان، شینیێن هاورده ئێن عه‌ره‌ب ب زۆری ل هه‌رێمێ كوردان ل كه‌ركووكێ تێن نیشته‌جی كرن.
سه‌رۆك هۆزێن كورد دبێژن: كێشه‌یا سه‌ره‌كه ستاندنا باوه‌ریێ یه ژ تاكێ كورد و داگیركرنا خاك و مالێن وانه، ئه‌ڤ ژی سیاسه‌ته‌كه ژ سه‌رده‌ما ره‌ژیما رابووری ده‌ست پێ كرییه و هه‌یا رۆژا مه یا ئیرۆ ده‌وام دكه، ژبه‌ركو شێنیێن كورد ئێن ره‌سه‌ن ژ ناڤچه‌یێن خوه تێن ده‌رخستن و ل شوونا وان عه‌ره‌بێن هاورده تێن نیشته‌جی كرن.
پاش داگیركرنا كه‌ركووكێ ل 16 ئۆكتۆبه‌را سالا 2017ان كو ب ئالیكاری و پشتگرییا گرۆپه‌كه ده‌ست نیشان كری د ناڤا یه‌كێتییا نشتیمانی ده ئه‌ڤ یه‌ك هات ئه‌نجام دایین، ره‌وشا ئه‌وله‌هیێ ل كه‌ركووكێ و ناڤچه‌یێن وێ پر خه‌راب بوویه، هه‌موه‌خت ناڤچه‌یێن كوردان ب به‌رده‌وامی تێن ته‌عریب كرن.
