بالەفران 3 گەریلا ل رەشانکێ ھەدەف کرن

بالەفرێن دەولەتا ترک ئیشەڤ ئێریشی ئەرەبەیەکا پەکەکێ ل سینۆرێ دھۆکێ کر، 3 گەریلا تێدە بوون و جانێ خوە ژ دەست دا.

چاڤکانیێن پێگەھا دارکا مازی ل باشوورێ کوردستانێ ئەشکەرە کر، ئیرۆ رۆژا پێنجشەمی 2020/8/13ان، بالەفرێن ترکیێ ئەرەبەیەکا پەکەکێ ل سەر جاددەیا گشتی ئا ناڤچەیا رەشانکێ ل سینۆرێ پارێزگەھییا دھۆکێ ھەدەف کر.

دەست نیشان کر، 3 گەریلایێن پەکەکێ د ئەرەبەیێ دە بوون و جانێ خوە ژ دەست دانە، شەوات ژی ب ئەرەبەیێ کەتییە و تەڤاھی ژناڤچوویە.

ل گۆر چاڤکانیێن دارکا مازی، ئێریش ل ساعەت 10:10ی شەڤ چێبوویە.
دیمەنێن ئێریشێ وھا خوەیا دکن کو ئەڤ ئێریش ل نێزی جیێن نیشتەجیبوونێ نە و ب ڤێ سەدەمێ ترس ل جەم شێنیێن ناڤچەیێ چێبوویە.

ئەڤ دبە نێزی حەفتییەکێ، ئێریشێن دەولەتا ترک ل سەر باشوورێ کوردستانێ دژوار بوونە، ھەری کێم د ڤێ دەمێ دە 13 گەریلا جانێ خوە ژ دەست دانە، شێنیێن گوندێن باشوور ب تەیبەت ئێن سینۆرێ دھۆکێ پڕ ژ پەکەکێ عاجزن، ئەو دخوازن گەریلا نێزی گوندێن وان نەبن ژ بو کو گوندێن وان نەکەڤن بەر ئێریشێن بالەفران.