سه‌رۆكێ پارتییا ده‌مۆكرات ئا كوردستانی، د سالڤه‌گه‌را دامه‌زراندنا پارتیێ ده دبێژه: «ل هه‌موو قۆناغێن خه‌باتێ، په‌ده‌كه بوویه ئارمانجا پلانێن ناهه‌ز و نه‌یارێن گه‌لێ كوردستانێ».
مه‌سعوود بارزانی، ئیرۆ رۆژا یه‌كشه‌می 16/8/2020ان كو دبه سالڤه‌گه‌را 74ان ئا دامه‌زراندنا په‌ده‌كی داخویانی دا، ئه‌مێ هنه‌ك ژ گرینگترین گۆتنێن بارزانی بێخن به‌رچاڤ.
بارزانی دبێژه: «دامەزراندنا په‌ده‌كێ چەرخەکە گرینگ بوو ل دیرۆکا تەڤگەرا رزگاریخوازییا کوردستانێ و بوویە خوەندنگەھەکە نشتیمانی ژ بۆی خەباتگێر و تێکۆشەرێن کورد، ئارمانجا دامەزراندنا په‌ده‌كێ زندی ھشتنا گیانێ خەباتا سیاسییا گەلێ کورد و بھێزکرنا باوەری ب خوەبوونا تاکە کەسێ کورد بوو ل سەردەمەکە سەخت و دژوار دا».
بارزانی وها ده‌وام كر، «پارتی ھەردەم ل ھەموو قۆناخان دا ئامرازەک بوویە ژ بۆ بەرەڤانیکرنا ل مافێن رەوا یێن گەلێ کوردستانێ و ئالیێ سەرەکیێ داکۆکیکارێ وان مافان بوویە و ئەو ژی ب کرداری نیشاندایە، ژ بۆ وێ یەکێ پارتی ھەردەم جھێ ھێڤییا گەلێ کوردستانێ بوویە و ل ھەمان دەمێ دە ژی ھەردەم پارتی بوویە نیشان و ئارمانجا پلانا ناھەز و نەیارێن گەلێ کوردستانێ».
بارزانی وه‌كه هه‌رتم هه‌لوه‌ستا خوه ئا ته‌كه‌ز كرنێ ل سه‌ر پێكڤه‌ژیانی ئانی زمان و دبێژه: »ل ڤێ سالڤەگەرێ دا تەکەز ل پەیاما پێکڤەژیان و فرەھ ئالی و ئاشتیخوازیا ناڤا خەلکێ کوردستانێ دکین و ئەو یەک ژ ئەرکێ سەرەکیێ پارتیە کو پێکڤەژیانا د ناڤبەرا پێکھاتێن ئۆلی و نەتەوەیی ێن کوردستانێ و ئاشتییا سیاسی و جڤاکی کوردستانێ بپارێزێ».
سه‌رۆك بارزانی د به‌شه‌كا دن ئا داخویانیێ ده گۆت كو پارتی ل ئەنجاما دەرز و دوبەرەکیێ ژ دایک نەبوویە، ژ بۆ وێ یەکێ پارتی ھێما و ناڤەندەکە ژ بۆ یەکگرتن و یەکرێزیا ئیرادەیا گەلێ کوردستانێ.
ھەر ل ڤی واری دە پارتی ھەردەم ئامادەیە ژ بۆ برایەتی و ئاشتی و یەکرێزیێ ژ بەر کو باوەرییا وی ب وێ یەکێ ھەیە کو ھەر چ سەرکەفتن و دەستکەفتەک کو ژ بۆ گەلێ کوردستانێ ھەبوویە ل سایا یەکرێزی و تەبایی و برایەتییا د ناڤبەرا ئالیێن کوردستانییان پێکھاتییە، داخواز ژ پارتی و ئالیێن سیاسیێن کوردستانێ دکم کو ب رووھ و گیانێ برایەتی و بەرپرسیارانە ب پێکڤە کار بکن ژ بۆ دەرباسکرنا ڤان گەف و گرفتێن کو بوونە گەفەک ل سەر ھەرێما کوردستانێ.
سه‌رۆكێ په‌ده‌كێ ل داوییا داخویانیێ به‌حسا هێزێن سیاسی ئێن په‌رچه‌یێن دن ئێن كوردستانێ دكه و دبێژه: «داخوازێ ژ ھێزێن سیاسیێن کورد ل پەرچەیێن دن دکم کو رەوشا ھەرێما کوردستانێ ل بەر چاڤ بگرن و نەبن سەدەما وێ یەکێ کو زیانێ ل ھەرێما کوردستانێ بێ دایین، ژ بەر کو ئێدی خەلکێ ھەرێما کوردستانێ نکارن تەھەمولا زیان و بۆمبەباران و کێشەیێن دن بکن، ھەرێما کوردستانێ ب خوە گرفت و کێشەیێن دن ھەیە و نکارێ خوە ل بەر زیان و ئێشێن زێدەتر بگرە، ژ بۆ وێ یەکێ داخواز ژ وەلاتێن جیران و ھێزێن کوردی دکین رێزێ ل سەروەرییا ھەرێما کوردستانێ و ئیراقێ بگرن و ھەرێما کوردستانێ نەکن قادا گەنگەشەیێن خوە».
