شەڤا 15ێ تەباخێ، هێرشەک ل سەر نڤیسینگەها پارتییا دەمۆکراتا سووریێ ل قامشلۆ چێبوو، ئالایێ کوردستانێ هاتە رەشکرن و سلۆگان لسەر دیواران هاتن نڤیساندن، پشتی هێرشێ بەردەڤکێ راگهاندنا قەسەدێ مستەفا بالی، ئەڤ کریارە شەرمەزار کر، گەلۆ ئەڤ هێرشە تشتەکی لۆکال بوو یان ژی د ناڤ دا هندەک پەیامێن سیاسی هەنە؟ بێ گۆمان پەیامێن سیاسی هەبوون، ئەڤ پەیامە د هەڤپەیڤینا 7ی تەباخێ یا کو تەلەفزیۆنا ستێرک د گەل جەمیل بایک دا چێکری هەبوون، ل سەر ڤێ هەڤپەیڤینا جەمیل بایک ب تایبەتی بابەتێ ل سەر رەخنەگرتنا رۆژئاڤا، گەلەک لایەنان نەرازیبوونا خۆ دابوو دیار کرن، د راستی دا د هەر پاراگرافەکێ دا پەیامەک هەبوو، د ناڤا ڤان پەیامان دا ژ بۆ کادرێن پەکەکێ یێن رۆژئاڤا ژی پەیام هەبوو.
رۆژنامەڤانێ کو هەڤپەیڤین ئەنجامدای پرسیارەک ژ جەمیل بایک کر “ل رۆژئاڤا هەولدانێن ئێکەتیا نەتەوەیی تۆ چەوا دبینی؟”، لێ مخابن جەمیل بایک ل سەر مژارا ئێکەتییا نەتەوەیی پر نیگەتیڤ ئاخفت و ئەڤ بەرسڤە دا: “پێویستە هەر کەس ل دەستپێکێ سپاسیا رێبەر ئاپۆ بکەت، گەر سپاسی نە ل رێبەر ئاپۆ بەلکو ل هندەک کەسێن دن بهێتە کرن ئەڤە خەلەتیەک مەزنە، ڤێ رەوشێ کەس قەبوول ناکەت، گەلێ رۆژئاڤا ژی قەبوول ناکەت، ب تایبەتی ژن و جوانێن رۆژئاڤایی قەبوول ناکەن، ژبەرکو ئەو د گەل رێبەر ئاپۆ گەهشتن راستیێ، ئەو دەستکەفتێن هاتی وەرگرتن ب خێرا رێبەر ئاپۆ چێبوونە”. ئەڤ شرۆڤەیا جەمیل بایک ب تایبەتی ژ بۆ هەموو رۆژئاڤا، کادر و لایەنگرێن پەکەکێ تەعلیماتەک بوو، جەمیل بایک گۆت: “خەباتێن رۆژئاڤا یێن ئێکەتییا نەتەوەیی ل دەرڤەیی مە دهێن ئەنجامدان، مە پەیوەندی پێڤە نینە، ئەم دژی نە، ل وێرێ خەلەتیەک هەیە، پێویستە بزاڤا ژن و جوانان هەلویستا خوە دیار بکەن و ڤێ رەوشێ قەبوول نەکەن”. دیار دبیت کو بزاڤا جوانان، هێرشا ل سەر نڤیسینگەهێن پارتیا دەمۆکراتا سووریێ ب بریارا جەمیل بایک ئەنجام دایە. هەر تشتێ ب سەرێ ئەنەکەسێ بهێت پەکەکە ژێ بەرپرسیارە.
ژ دەستپێکا پێڤاژۆیا سیاسی یا رۆژئاڤایێ کوردستانێ و هێڤە، پەکەکێ گەلەک کادرێن خوە ل وێرێ ب جیهـ کرن، ل دەستپێکا پێڤاژوویێ دا ب تایبەتی پەکەکێ کادرۆیێن خوە یێن هەرێمێ یێن ئیدۆلۆژیک، پەروەردەیی، ئابووری، لەشکەری و دیبلۆماسی د ئاستا هەری بلند دا ل رۆژئاڤا ب جی کرن. پشتی خەبات ل رۆژئاڤا پێشکەتی ب تەڤلیبوونا کادرۆیێن رۆژئاڤایی د چالاکیان دا گرانییا کادرۆیێن پەکەکێ یێن باکوری کێم بوو، چالاکڤانێن پەکەکێ یێن ئەساسی خوە د گەل چالاکڤانێن ژن و جوانان رێخستن کر، چالاکڤانێن جوانان و ژنان هەموو ژ وان کادرێن توندرەو پێک دهێن و ئەڤ کادر هەموو دخوازن ئەمرێ رێخستنێ و یێ ئۆجەلان پەیڤ ب پەیڤ جێبەجێ بکەن، ئەڤ هەر دو هێزە ئەرکێ پیرۆز دیتنا عەبدولا ئۆجەلان پێک تینن، دیسا ب تایبەتی د ناڤ هێزێن تایبەت ئانکو HATدە پر کادرێن هێزێن تایبەت یێن پەکەکێ جیهـ دگرن، پەکەکێ د جیهـ کرنا ڤان کادران دا دو ئارمانجێن هەبوون، یا یەکێ ب رێیا کادرێن باکوری ڤە زەختێ ل سەر رێڤەبەرییا رۆژئاڤا بکەت و چاڤدێریێ ل سەر بکەت، یا دویەمین ب رێیا ڤان کادران ژ بۆ رێڤەبەرییا رۆژئاڤا ئەلتەرناتیڤ و پارالێل رێڤەبەری ئاڤاکرن بوو، دیار دبیت کو ئەرکەکی دی یێ ڤان کادرێن پەکەکێ ئەوە کو ئێرشی سەر وان کەسێنن وەکو دژبەرێن پەکەکێ دهێن دیتن بکەن و وان تەسفیە بکەن.
هەرچەند هێرشا ل سەر پەدەکەسێ بچووک بهێتە دیتن ژی لێ بەلێ پەیامەکا وەکو ڤێ مجت هەیە، وەکو د مانشێتێ دا ژی مە دیار کری ئەڤ کارە ب ئەمرێ جەمیل بایک هاتیە ئەنجامدان ب ڤی کاری ئەڤ پەیامە هاتیە دان کو رێڤەبەرییا رۆژئاڤا بزانە ئەم کەنگی چ بخوازین ئەم دشێین ئەنجام بدەین یا دی ژی ئەنەکەسە بلا بزانیت کو نە د ئەولەویەتێ دا یە.
دەما کو ئەنەکەسە ل رۆژئاڤا هاتیە دەرئێخستن ژی هەر وێ هێزێ، واتە ریخستنا جوانێن شۆرەشگێر ئەڤ کارە ئەنجام دابوو ب جلوبەرگێن لەشکەرێن رەژیمێ، دژبەر هاتبوون لێدان، جام هاتبوون شکاندن، مرۆڤ هاتبوون کوشتن، وی دەمی ژی ئەو کەسێن ئەڤ کارە ئەنجامدای د ئەرکیدابوون، پشتی ڤێ هێرشێ گەر هێرشەک ل سەر پارتیێن ب سەر ئەنەکەسێ ڤە یان ژی کەس و لایەنێن وان چێببیت ب راستەقینە پەکەکە بەرپرسیارێ ڤێ هێرشێ یە.
بەردەڤکێ قەسەدێ مستەفا بانی، ئەڤ بوویەرە شەرمەزار کر، ئەڤە وەکو پێنگاڤا یەکێ تشتەکێ باش بوو، ئەم هێڤی دکەین رێڤەبەرییا رۆژئاڤا د ڤێ بوویەرێ دا ب بریار هەلسوکەوتێ بکەت و کەسێن ئەنجامدەر بهێنە دادگەهکرن، رێڤەبەرییا رۆژئاڤا خوە ب چ هیجەتان ڤە مژوول نەکەت و دژی فشارا پەکەکێ ژی ب قانوونێ کار بکەت، ژبەرکو گەلەک جاران پەکەکە کریارێن خوە ب ناڤێن جور ب جور قەبوول ناکەت، میناک وەکو TAK و زارۆکێن ئاگری چالاکیێن کو پەکەکێ ب وان جوانان ددان ئەنجامدان پشتی هنگی ژی دگۆت ئەم نە ئاگەهدارین و ل گوهێ خوە نادەنە مە، بلا رێڤەبەرییا رۆژئاڤا ژی نەبێژیت ئەم د بن گڤاشتنان داینە و گوهێ خوە نادەنە مە، مسەعدا مە بکەن، بلا ب ڤان هەلویستان نێزیکی ڤێ بوویەرێ نەبن، ئەڤ هەلویستە ناهێتە قەبوول کرن، ب ڤێ هێرشا ل سەر پەدەکەسێ هاتیە کرن دیار بوو کە نە بەس تنێ دەولەتێن هەرێمی یێن داگیرکەر ئێکەتییا نەتەوەیی یا کوردان ناخوازن، بەلکو د ناڤا پەکەکێ دا ژی بالەک ب هێز یێ کو ل دژی ئێکەتیا نەتەوەیی د راوەستیت هەیە و پێویستە ئەم ڤێ راستیێ ببینین، ئەم دێ ل بەندا فەرمانا کو جەمیل بایک دایە کادرێن خوە بمینین.
