فەتوایا جیهادا خومەینی ل دژی کوردان، هەولەک داگیرکەرانە ژ بۆ قڕ کرنا نەژادی

فەتوایا جیهادا خومەینی ل دژی کوردان، هەولەک داگیرکەرانە ژ بۆ قڕ کرنا نەژادی

ل 28ی گەلاڤێژا سالا 1979ان دا، “خومەینی” ب گۆتنا «اشد علی الکفار رحمها بینهم» خوینا کوردێن رۆژهلاتێ کوردستانێ حەلال کر و فەتوایا جیهادا دژی نەتەوا کورد دەرکر، پشتی 41 سالان هێشتا رۆژهلاتێ کوردستانێ د دەستێ داگیرکەراندایە، خوین ژێ دچیت.

فەتوایا جیهادا خومەینی ل دژی کوردان، هەولەک داگیرکەرانە ژ بۆ قڕ کرنا نەژادی

د دەستپێکا هاتنە سەر کارا رژێما ئیسلامی ل تەهرانێ، بەروڤاژی رۆژهلاتێ کوردستانێ، ل پایتەخت و جیهێن دن یێن ئیرانێ دا، ژ بەر هزرا کەڤنەشۆپی یا کۆمەک مەلایان و فاشیزمێن نەتەوی- مەزهەبی، شێواز و ژیان و حالێ خەلکی ب ئاوایەک لەز بەر ب پاشڤە دچوو، ژن دهاتنە بەردبارانکرن، ئازادیێن خەلکی ژێ دهاتنە ستاندن، دەنگێ کەسێن هزر جیاوز و دژەبەر بێدەنگ دکر، مافێ کەمینەیێن ئۆلی و نەتەوەیی دهاتە پێشێلکرن و قەلەمێن ئازا و سەربخوە دهاتنە شکاندن و رۆژنامە و کۆڤار و چاپەمەنی ئێک ل دیڤ ئێک دهاتنە قەپاتکرن. لێ هەر د وی دەردەمی دا رۆژهەلاتا کوردستانێ بەروڤاژی ناڤچەیێن دی یێن ئیرانێ ل بن سیبەرا هێزا پێشمەرگەیێن کوردستانێ وەکو گزیرتەیەک ئارام و سەقامگیر، رۆژ ب رۆژ د وارێ سیاسی، ئابووری و جڤاکی دا بەر ب پێش دچوو. گەلێ کوردستانێ سەردەمەک نوو ژ ئازاد ژیانێ و پێکڤە ژیانا کوردستانیانە و دیمۆکراتیانە ئەزموون دکر. جڤاتێن گوند و باژاران و رێخستنێن نە حکوومی هاتبوون ئاڤاکرن و خەلکی ب ئازادانە ئیدارەیا وەلاتێ خوە دکر.

رۆژهلاتێ کوردستانێ ب سەدەما کلتوورێ پێشکەتی یێ نەتەوایەتی و فەلسەفەیا خوە نەچەماندنێ ل همبەر ستەمکاران و داگیرکەران، بووبوو سمبۆلا بەرەڤانی کرنێ ژ ماف و ئازادیێن مرۆڤان و ناسناڤا “مەترێزیا بەرەڤانیکرن ژ ئازادیێ” ل سەر هاتبوو دانان. گەلێ کورد ل رۆژهلاتێ کوردستانێ تاکە نەتەوە بوو کو کولاڤێ مەلایێن نەچووبوو سەرێ وان و دەنگ ب رژێما ئیسلامی یا ئیرانێ نەدابوو.

فەلسەفەیا ئازادیخوازی و رزگاریخوازی یا کوردان ژ لایێ رژێما تۆتالیتار و داگیرکەر یا نووی ل تەهرانێ نەدهاتە قەبوول کرن. ژبەر ڤێ چەندێ ل رێکەفتی 18/8/1979ان دە و د دەمەکی دە کو ب تنێ 9 مەهـ ل سەر هەرفاندنا رژێما پاشایەتی دەرباس بووبوو، “خومەینی” وەکو دامەزرینەرێ رژێما ئیسلامی ل ئیرانێ، فەتوایا جیهادێ ل دژی نەتەوا کورد دەرکر و ب گۆتنا «اشد علی الکفار رحمها بینهم» فەرمان دا هێزێن خوە یێن چەکدار داکو ب توندترین شێوە رۆژهلاتێ کوردستانێ بێ دەنگ بکن.

فەتوایا جیهادا خومەینی ل دژی کوردان، هەولەک داگیرکەرانە ژ بۆ قڕ کرنا نەژادی

هەر کەس دزانیت کو کورد، نەتەوەیەک موسلمانن و د راستی دا دەرکرنا ڤێ فەتوایا ئۆلی سەدەمێن سیاسی ل پشت بوون. ب کورتی داگیرکەران جارەکا دی ژ بۆ قڕ کرنا کوردان ئۆل وەکە ئامراز بکار ئینا.

پشتی کو خومەینی، کورد وەکە کافر ب ناڤ کری و رێتنا خوینا گەلێ کورد ب حەلال دا زانین، کاربدەستێن دی یێن ڤێ رژێمێ ژی ب هزرا رەگەزپەرەستانە، فاشیستانە و داگیرکەرانە یا فارسان هێزێن خوە شاندن کوردستانێ و قڕکرن و ژناڤبرنا نەتەوا کورد خستە وارێ جێبەجێکرنێ دا.

فەتوایا جیهادا خومەینی ل دژی کوردان، هەولەک داگیرکەرانە ژ بۆ قڕ کرنا نەژادی

“خەلخالی” وەکو حاکمێ شەرعی یێ “خومەینی” ل کوردستانێ دەست ب کۆمکوژی یا گەلێ کورد ل رۆژهلاتێ کوردستانێ کر. جوانێن کورد ل باژارێ سنە، پاوە و مەهاباد و بۆست ب بۆستا رۆژهلاتێ کوردستانێ، ب تنێ ب تاوانا داخوازکرنا مافێن خوە یێن رەوا کۆم ب کۆم هاتن سێدارەدان و گولەبارانکرن. خەلک و پارتیێن نەتەوی یێن رۆژهلاتێ کوردستانێ کو داخوازا دەستپێکی ترین مافێن خوە یێن نەتەوی و ئینسانی دکرن، ژ لایێ پاسدارێن فارس ڤە ب توندترین شێوە هاتنە تەپەسەرکرن.

جەماوەرێ خوە راگرێ رۆژهەلاتێ کوردستانێ و هێزێن پێشمەرگەیێن کوردستانێ ژ بۆ بەرەڤانیکرن ژ وان دەستکەفت و بهایێن نەتەوی یێن خوە بریارا بەرخوەدانێ دا و ب دەستپێکی ترین ئاموورێن لەشکری سینگێ خوە کر مەرتالێ گەلێ خوە و ل دژی سوپایێ خومەینی شەر کر. د ڤێ بەرخوەدانا رەوا دا کو ب بەرخوەدانا ب خوین ئا 24 رۆژی یا باژارێ سنە دا گەهشتە گۆپیتکا خوە د ئەدەبییاتا رۆژهەلاتێ کوردستانێ دا ب «بەرگرییا گەلێ کوردستانێ ل شەرێ سێ مەهی» دهێتە ناسکرن، رژێم هات نەچارکرن گۆتوبێژان بکەت و گوهدارییا نوونەرێن گەلێ کوردستانێ بکەت. هەرچەند کو گۆتوبێژ کرنێ دەرفەتەک ژ بۆ ب دەستڤە ئانینا دەمی بۆ ئیرانێ چیکر و پشتی هنگی ب هێزێ و چەکی کوردستان داگیر کر و حەتا نها ژی بەردەوامە.

فەتوایا جیهادا خومەینی ل دژی کوردان، هەولەک داگیرکەرانە ژ بۆ قڕ کرنا نەژادی

ل 41 سالی یا فەتوایا جیهادا خومەینی ل دژی نەتەوا کورد دا هەرچەند ئەڤ فەتوایە بەردەوامە و رۆژهلاتێ کوردستانێ ب دەستێ رەژێما ئیسلامی یا ئیرانێ یە و هێژان ژی خوین ژێ دچیت، لێ بەلێ ئیرادەیا رزگاریخوازانە یا نەتەوەیی د ڤێ پارچەیا کوردستانێ دا ب هیچ رەنگەکی لاواز نەبوویە و جوانێن کورد ل رۆژهلاتێ کوردستانێ ب باوەرتر ژ هەر دەمەکێ ژ بۆ ب دەستڤەئانینا مافێن خوە یێن نەتەوی و رزگارکرنا کوردستانێ ئامادەی تێکۆشین و جانفیدائیێ نە.