گونده‌كێ پارێزگه‌ها دهۆكێ هات بۆردۆمان كرن

گونده‌كێ پارێزگه‌ها دهۆكێ هات بۆردۆمان كرن

باله‌فرێن ده‌وله‌تا تركیێ، ئیرۆ حه‌ره‌كه‌تێن په‌كه‌كێ ل گونده‌كێ سینۆرێ پارێزگه‌ها دهۆكێ ل باشوورێ كوردستانێ بۆردۆمان كر و زرار نه‌هاتنه‌ زانین.

چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره‌ كر، ئیرۆ رۆژا چارشه‌می 19/8/2020ێ باله‌فرێن ده‌وله‌تا تركیێ د دووڤچوونا لڤین وته‌ڤگه‌رێن په‌كه‌كێ دا، ئێریشی ئاقارێ گوندێ كانی مه‌زنێ ل سینۆرێ ناڤچه‌یا كانی ماسێ یا ل ده‌ڤه‌را به‌رواری بالا كر.

د ئێریشێ دا كو ل ده‌مژمێر 11:00 سپێدێ چێبوویه‌، باله‌فران 2 مووشه‌ك ل خالێن په‌كه‌كێ ل ئاقارێ گوندێ كانی مه‌زنێ داینه‌، لێ به‌لێ زیان هێژان دیار نه‌بوونه‌.

ل گۆر دیمه‌نێن ئێریشان، ئه‌ڤ بۆردۆمان ل نێزی گوندی و جهێن ئاكنجیبوونا گوندییان چێبوویه‌ و دۆمانه‌كا مه‌زن ل جهێ كه‌تنا مووشه‌كان بلند بوویه‌.

ئه‌ڤ پێتری دوو مه‌هانه‌ ئێریشا تركیێ یا ل سه‌ر باشوورێ كوردستانێ به‌رده‌وامه‌، ژ وێ ده‌مێ ڤه‌، ب ده‌هان گوندێن باشوورێ كوردستانێ ب تایبه‌ت ل سینۆرێ پارێزگه‌ها دهۆكێ هاتنه‌ ڤالا كرن، په‌كه‌كه‌ لڤینێن خوه‌ ئێخستنه‌ ناڤا گوندان و ب ئاوایه‌كێ سیسته‌ماتیك شه‌رێ خوه‌ نێزی گوند و باژارۆكان دكه‌ت.