كۆمێن چه‌كداران 6 وه‌لاتیێن عه‌فرینێ ره‌ڤاندن

كۆمێن چه‌كداران 6 وه‌لاتیێن عه‌فرینێ ره‌ڤاندن

د به‌رده‌وامییا ئالۆزیێن ئێمناهیێ ل هه‌رێما عه‌فرینێ یا رۆژئاڤایێ كوردستانێ، ئیرۆ كۆمێن چه‌كداران 6 وه‌لاتیێن دی ره‌ڤاندن.

ل گۆر نه‌رینگه‌ها سووری یا مافێن مرۆڤان، ئیرۆ رۆژا پێنجشه‌مبیێ 20/8/2020ان، كۆمێن چه‌كدارێن گرێدای تركیێ، ب سه‌ر هه‌ژماره‌كا مالێن گوندێ عه‌ره‌ب شێخۆ دا گرتنه‌ و 6 وه‌لاتی ژێ ره‌ڤاندنه‌.

پاش چه‌ند ده‌مژمێران، كۆمێن چه‌كداران 3 ژ وان كه‌سێن ره‌ڤاندی سه‌ربه‌ست به‌ردان، 3 یێن دی بۆ جهه‌كێ نه‌دیار برنه‌.

چاڤكانیێن پێگه‌ها داركا مازی ل رۆژئاڤا كوردستانێ ده‌ست نیشان كر، كه‌سێن كو هاتینه‌ به‌ردان، ب هه‌زارێن دۆلاران فدیه‌ دانه‌ چه‌كدارن، كه‌سێن مایی برنه‌ بنگه‌ها پۆلیسێن له‌شكری یێن گرێدای تركیێ.

د ڤێ حه‌فتیێ دا، كۆمێن چه‌كداران 18 وه‌لاتی كو گه‌نج و كاله‌مێر بوون، ژ عه‌فرینێ و دۆربه‌را وێ ره‌ڤاندنه‌ و ژبۆ سه‌ربه‌ست به‌ردانا وان، داخوازا فدیێ ژ مالباتێن وان كرنه‌.