زانیاریێن نە بهیستی ل سەر ئێریشا دەولەتا ترکیێ ل هاڤینگەها کونەماسی
چاڤکانیێن تایبەت یێن پێگەها دارکا مازی ل باشوورێ کوردستانێ زانیاریێن نەبهیستی ل سەر ئێریشا بالەفرێن دەولەتا ترکیێ بۆ سەر هاڤینگەها کونەماسی یا کو دکەڤیتە باژارۆکێ شارباژێر یێ سەر ب پارێزگەها سلێمانیێ ڤە ئاشکەرا دکەن و ددنە دیارکرن ئەڤ ئێریشە ب هاریکاری و ئاگەهداریا هندەک بەرپرسێن ئێکەتیا نیشتیمانی یا کوردستانێ (یەنەکێ) هاتیە ئەنجامدان.
چاڤکانیێن پیگەها دارکا مازی ئاشکەرا کرن کو کەسەکێ ب ناڤێ “باڤێل عبدولقادر” ل دەمژمێر 4ێ پاش نیڤرۆ رۆژا 26/6/2020ێ ئانکو دەمژمێرەکێ پێش ئیریشا بالەفرێن ترکیێ بۆ سەر گەریلایێن پەکەکێ ل هاڤینگەها کونەماسی، هەڤالێ خوە ئاگەهدار کریە کو ب چ رەنگان سەرەدانا ڤێ هاڤینگەهێ نەکەت.
پشتی کو ئێریش هاتیە ئەنجامدان کەسێ ب ناڤێ “باڤێل عەبدولقادر” کو دبیتە کورێ عەقید “عەبدولقادر حەفسە” بەرپرسێ دەستەیا ئاساییشا ئێکەتیێ ل تاخا ئازادی یا باژارێ سلێمانیێ، داخواز ژ هەڤالێ خۆ کریە کو ئەڤ بابەتە دناڤبەرا وان دا ب نهێنی بمینیت و بۆ چ کەسێن دین باس نەکەت.
ب ڤێ چەندێ ب زەلالی خۆیا دبیت کو بەرپرسێن سەر ب ئێکەتیا نیشتیمانی ڤە ئاگەهداری ڤێ ئێریشا دەولەتا ترکیێ بوونە و زانیاری ب ترکیێ دایینە.
دهێتە زانین کو ل رۆژا 26/6/2020ێ بالەفرێن ترکیێ گوندێ کونەماسی یێ سەر ب شارباژێر کو دکەڤیتە سنۆرێ پارێزگەها سلێمانیێ ئارمانج کر، و د ڤێ ئێریشێ دا چەندین چەکدارێن پەکەکێ بوونە قوربانی و چەند کەسێن سڤیل ژی بریندار بوون.
