كه‌جه‌كێ ب ناڤێ ((براتییا گەلان)) هه‌رده‌م خزمەتا خەتەکا ئیستخباراتی یا ھەرێمی دکەت
كه‌جه‌كێ ل رۆژا 23ی ته‌باخا سالا 2020ێ، داخویانییه‌ك بەلاڤ كرییه و تێدا خواستییە شكه‌ستنێن چه‌ندین سالێن رابووری یێن سیاسی، جوگرافی و هزری و پێگه‌ها جه‌ماوه‌ری ل پارچهیێن دی یێن كوردستانێ بێخیته سه‌ر ملێن پارتییا دیمۆكراتا كوردستانێ، كو د بنەرەت دا گومان ل سه‌ر شێوازێ خه‌باتا كه‌جه‌كێ ل دەڤ كوردستانییان و ره‌ڤه‌ندا كوردی جهێ پرسیارێ بوویه و هه‌ردەم د ده‌مێ پێش بوویه‌ران دا ژ بۆ خزمه‌تا یارییەکا هه‌رێمی ده‌ستپێشخه‌ر بووینه بۆ دروست كرنا ئاسته‌نگان ل همبه‌ر پرسگرێكا كوردی.. ئه‌و هه‌ر ژ ده‌مێ ب زهنییه‌تا (چیا میتیگه‌هن) ل جهێ خه‌بات و تێكۆشینێ ژ بۆ سه‌رخوه‌بوونا كوردان ل باكورێ كوردستانێ، یان ژی (میتینگه‌هه ژ بۆ باكور) بكه‌نه په‌یره‌وێ خۆ یێ سیاسی، هه‌ردەم ل ژێر ناڤێ دیمۆکراتیک ژ بۆ گه‌لان، خۆ ل چیایێن باشوورێ كوردستانێ ئاسێ كرییه، ل شە‌نگالێ ژ بۆ پالپشتیكرنا حه‌شدا شه‌عبی هێزه‌ك ئاڤاكرییه و ژ لایێ هزری ڤه مه‌ژیكێ زارۆكان شووشتییه و زارۆكێن ژێر ته‌مه‌نێ 13 سالیێ چه‌كدار كرینه، ب ناڤێ براتییا گه‌لان، هه‌رده‌م خزمه‌تا خه‌ته‌كا ئیستخباراتی یا هه‌رێمی كرییه كو د ده‌ما 10 سالێن بووری دا ل چیایێن باشوورێ كوردستانێ ببوون ئه‌گه‌رێ راكێشانا هێزێن تركی بۆ ده‌ڤه‌رێن سنۆری یێن زاخۆ، ئامێدی و حه‌تا دگەهیتە سنۆرێ حاجی ئۆمه‌ران و قه‌ندیلی و ده‌ڤه‌رێن سنۆری یێن هه‌له‌بجه، وان ب ناڤێن جڤاكی ل كەمپا مه‌خموور چه‌ندین جاران مه‌رتالێن مرۆڤی بۆ پیلانگیری و دروست كرنا ئالۆزییان ل باژارێن باشوورێ كوردستانێ دروست كرینه، ل ده‌ما داگیركرنا ده‌ڤه‌رێن كوردستانی یێن ده‌رڤه‌ی ئیداره‌یا هه‌رێمێ ژی چاڤساغی بۆ راكێشانا حه‌شدێ كر و ل گه‌ل وان خۆ د شه‌نگالێ دا ئاسێ كر.
رێبازا په‌كه‌كێ ئێدێ ل باکورێ کوردستانێ نەجهێ پەژراندنا گەلە و ل ئاستێ ناڤدەولەتی ژی رەد کرییە
كه‌جه‌كه زێده‌باری شكه‌ستنێن به‌رده‌وام د شێوازێن كاركرنێ دا، هه‌رده‌م وه‌ك ئامرازه‌ك ژ بۆ ئارمانجێن سیاسی و هه‌والگیری ل ناڤچه‌یێن سنۆری ده‌ركه‌تبوون، ژ روویێ هزری ڤه رێبازا وان یا ره‌د كرییه و جهێ په‌ژراندنا ناڤده‌وله‌تی و جه‌ماوه‌ری ژی نینه ل باكورێ كوردستانێ، به‌رده‌وام ل دووڤ وه‌هما سیاسی كه‌تینه و ژ وان ناڤێن كو ب وه‌هم ئێخستینه ناڤ مه‌ژیكێ تاكێن خۆ وه‌ك هه‌رێمێن حەفته‌نین، خنێره، ئاڤاشین و هه‌رێما قه‌ندیلێ و پاراستنا میدیا..چه‌ندین هه‌رێمێن دی د ده‌مه‌كی دا كو جهێ خه‌باتا خۆ ل باكور ب جهـ هێلایە و هاتینه ده‌ڤه‌رێن سنۆری خۆ ئاسێ كرینه، زێده‌باری وه‌رگرتنا باجێ ژ خەلکێ ده‌ڤه‌رێن سنۆری، وێرانكاری ژ به‌ر راكێشانا سوپایێ تركیا بۆ ده‌ڤه‌رێ، ره‌ڤاندنا خه‌لكی و هه‌روه‌ها هنده‌ك جاران دروست كرنا پێلا گوهۆرینا ئاراسته‌یا خوه‌پێشاندانان ل وان ده‌ڤه‌ران و ته‌قه كرن و ره‌ڤاندن و سڤكاتی كرن ب ئالایێ پیرۆزێ كوردستانێ، كه‌جه‌كه ژ نوو دهێت و توهمه‌تان بۆ پارتی دروست دكه‌ت و د راگەهاندنەکێ دا بێی هه‌بوونا ره‌هنده‌كێ دیرۆكی، لۆژیكێ سیاسی، جلکەکێ شه‌رعی بوونێ ئه‌و ب خۆ ل به‌ر خۆ دكەن و بێی كو ئه‌و بزانن كو وان ل گۆره‌ی سیسته‌مێ ده‌ستهلاتدارییا هه‌رێما باشوورێ كوردستانێ، شه‌رعییه‌تا قانوونی ل هه‌رێما كوردستانێ نینه و ب تنێ مالوێرانینه بۆ خه‌لكێ ده‌ڤه‌رێن سنۆری.
كه‌جه‌كێ دڤێت ژ بۆ خزمه‌تا پیلانێن هه‌رێمی وه‌ك ئالاڤەک بۆ ژ ناڤ برنا ئه‌زموونا باشوورێ كوردستانێ، پێش بوویه‌ران بكه‌ڤیت
پارتییا دیمۆكرات یا كوردستانێ، ژ لایێ هه‌ست كرن ب به‌رپرسیاری وه‌ك هانده‌ره‌كێ ئاشتیێ بۆ پرسگرێكا كوردی ل تركیێ ئه‌نجامێن باش بۆ خزمه‌تا ئاشتییا سیاسی ب ده‌ست ئێخستینه، لێ به‌لێ كه‌جه‌كێ پرسا ئاشتیێ ل وێ ده‌رێ ب چه‌ند بوویه‌ره‌كان ژێر ئاخ كر و جلکەکێ ب خوین ل به‌ر ئاشتیێ كر و هه‌ڤكێشه بۆ شه‌ری گوهۆ‌ری و پاش بۆ ئه‌گه‌ره‌ك كو گه‌لێ باكور بكه‌ڤنە ره‌وشه‌ك سیاسی یا نه‌خۆ‌ش ب ده‌ستێ په‌كه‌كێ و د نیازا په‌كه‌كێ گەهشتن كو ئەو به‌رژه‌وه‌ندیێن باكورێ كوردستانێ ناخوازن، ژ به‌ر ڤێ چەندێ هه‌ر زووی ده‌ستێ كه‌جه‌كێ ل وێرێ کەشف بوو و ب تێكده‌ر ناڤێ وان هاته برن و كوردێن باكور كه‌جه‌كه ره‌د كر، پارتییا دیمۆكراتا كوردستانێ هه‌ردەم هه‌ول دایه په‌كه‌كێ ژ شاشی یێن سیاسی راست بكەت داكو بشێت وه‌ك ته‌ڤگه‌ره‌كا مه‌ده‌نی خەباتێ بکەت، بشێت ئه‌و سلۆگانێن كو هه‌لگرتینه ژ بۆ ئازادییا گه‌لان ل باكورێ كوردستانێ جێبه‌جێ بكەت، لێ به‌لێ ئه‌ڤە هه‌ر دیسان دچن ژێر ڤی چه‌مكی “دڤێت ل ژێر ئایدۆلۆژیه‌ته‌كا بازنه‌یی سیاسه‌ت بهێتە كرن، نه ژبۆ سه‌رخوه‌بوونا كوردستانێ، ده‌وله‌تبوونا كوردستانێ، یان ژی ده‌ستكه‌فت ژ بۆ گه‌ل”، نها گه‌لێ باكور، باشوور، رۆژئاڤا و رۆژهلاتێ كوردستانێ ژی دزانن كو كه‌جه‌كه دخوازیت ل خزمه‌تا پیلانێن هه‌رێمی دا وه‌ك ئالاڤەک ژ بۆ تێكبرنا ئه‌زموونا هه‌رێما باشوورێ كوردستانێ پێش بوویه‌ران بكه‌ڤیت، پارتییا دیمۆکراتا كوردستانێ هه‌ردەم نه‌رینا وێ وه‌ها بوویه كو ل گۆره‌ی ره‌وشا سیاسی، جڤاكی و جوگرافی ل هه‌ر پا‌رچه‌یه‌كا كوردستانێ، ره‌سه‌ناتییا سیاسی و پارتیێن كوردی د چارچووڤه‌یا لۆژیكی دا بنیاتێ خه‌باتێ ل گۆر سیاسه‌ته‌كا ژیرانه و دیپلۆماتیك بێخیته خزمه‌تا كوردستانێ، ل گۆر ره‌وشا زاتی و بابه‌تی خه‌باتا نه‌ته‌وه‌یی رێك بێخیت و بشێت پارتیێن ب ده‌ستئێخستنا مافێن ره‌وا یێن گه‌لێ كوردستانێ بن، نەکو ته‌ڤگه‌ره‌ك ب ده‌هان ناڤ و ئالایێن چێكری و ب ناڤێ گه‌لێ كورد ببیته ئه‌گه‌رێ ژ ناڤ برنا ده‌ستكه‌فتان و ب توندییا سیاسی دۆزا كوردی ل ناڤه‌ندێن ناڤده‌وله‌تی وێنه بكه‌ت و د جیهانێ دا وێنه‌یێ كوردان نه‌شرین بكه‌ت.
کەجەکە ب رەنگەکی د ئاخڤیت هه‌ر وه‌ك ئه‌و حاكمێن ره‌ها نه و ب ده‌ڤه‌رێن باشوور ب ده‌ڤه‌رێن خۆ دزانیت و چ ئعتیباره‌كێ بۆ سه‌روه‌رییا باشوورێ كورستانێ نادانیت
كه‌جه‌كێ د داخویانییا خۆ دا ئاماژه ب وێ یه‌كێ كرییه كو پارتییا دیمۆكرات یا كوردستانێ پاش ئێریشێن تركیێ ل سه‌ر ده‌ڤه‌رێن سنۆری یێن هه‌رێما باشوور، په‌كه‌كێ ب ئه‌گه‌رێ ڤان ئێریشان دزانیت، ژ ڤێ ژی پتر بانگه‌شێ بۆ وێ یه‌كێ دكەت كو ئه‌و ده‌ڤه‌رێن هه‌رێما كوردستانێ كو نها چه‌كدارێن په‌كه‌كێ لێ هه‌نه و بوونه رێگر ل همبه‌ر ئاڤه‌دان كرنا ب سه‌دان گوندێن وان ده‌ڤه‌ران، ب رەنگەکێ د ئاخڤیت هه‌ر وه‌كو ئه‌و حاكمێن ره‌ها بن و ب ده‌ڤه‌رێن خۆ پێناسه دكه‌ت و چ ئعتیباره‌كێ بۆ شكو و سه‌روه‌رییا هه‌رێما باشوورێ كورستانێ نادانن، سه‌باره‌ت ب ڤێ چەواشەکرنێ، ب ئا‌شكرا دبێژین، هه‌رێما كوردستانا ئیراقێ، هه‌رێمه‌كا ئیعتراف پێ كری و ده‌ستووری یه، د چارچووڤه‌یا ده‌ستوورێ بنگه‌هین یێ ئیراقێ دا و خودان پەرلەمان و حكوومه‌ت و سازیێن شه‌رعی یه، ژ به‌ر ڤێ یه‌كێ هه‌ر هێز و ئالییه‌كێ سیاسی یێ پارچهیێن دی یێن كوردستانێ كو ب نه‌چاری و ژ به‌ر وێ ره‌وشا تایبه‌ت یا ولاتێن وان ب خۆ دهێنه هه‌رێما كوردستانێ، پێدڤییه ئه‌و رێزێ ل سه‌روه‌ری و قانوونێن هه‌رێما كوردستانێ بگرن و د چارچووڤه‌یێ وان رێكارێن ژ بۆ وان دهێنە دیار كرن، خه‌باتا خوه یا سیاسی بكەن و هه‌رێما كوردستانێ وه‌كو قەوارەیەکێ سیاسی و ده‌ستووری روو ب رووی پرسگرێك و ئالۆزییان دگه‌ل ده‌وله‌تێن جیران نه‌كەن…
پەکەکە ل جهێ کو هاریکارییا هەرێما کوردستانێ بکەت بەره‌ڤاژی زەمینێ بۆ دەستوەردان و ئێریشێن ترکیێ خۆش دکەت
ژ ڤی لایی ڤه، ده‌مێ ده‌وله‌تا تركیێ ب بەهانەیا هه‌بوونا چه‌كدارێن په‌كه‌كێ سنۆرێن هه‌رێما كوردستانێ و ئیراقێ دبه‌زینیت و ئێریشی دكه‌ته سه‌ر گوند و سنۆرێن مه، سه‌ركرداتییا په‌كه‌كێ ل جهێ كو هاریکارا پەرلەمان و حكوومه‌تا هه‌رێما كوردستانێ بیت و چ بەهانەیەکێ بۆ تركیێ نه‌هێلیت، بەره‌ڤاژی زه‌مینێ ژ بۆ ده‌ستوه‌ردان و ئێریشێن تركیێ زێده‌تر دكەت كو ئه‌ڤە ژی د هیچ ده‌وله‌ته‌كا ڤێ جیهانێ دا ناهێتە قه‌بوول كرن و شێوه‌یه‌كه ژ خوه فه‌رز كرنێ ل سه‌ر شكو و سه‌روه‌رییا وێ ده‌وله‌تا ئه‌و تێدا.
هه‌گەر پەکەکێ بڤێت بەرخودانێ بکەت، پێدڤییه ڤی کاری ل باکورێ کوردستانێ بکەت
د به‌شه‌كێ دی یا داخویانییا كه‌جه‌كێ دا هاتییه، وه‌ها دیار دبیت كو ئه‌ڤ داخوازێن شه‌رعی یێن پەرلەمان و حكوومه‌تا كوردستانێ ژ بۆ رێزگرتن ل قانوونێن هه‌رێما كوردستانێ ئاراسته‌ی وێ هێزێ كری، وه‌ها هه‌ژمارتییه كو ئه‌ڤە ب وێ واتایێ دهێت کو: (ده‌ست ژ بهرخودانا خۆ ل دژی كۆمارا تركیێ هه‌لبگرن؟)، ئه‌ڤ ئاخفتنە ب ئاسته‌کێ وه‌ها نزم هاتییه نڤیسین هه‌ر وه‌ك كو چه‌كدارێن په‌كه‌كێ شیابن ل ناڤا ئاخا كوردستانا تركیا پێگه‌هه‌كی بۆ خۆ ئازاد بكەن و ل وی جهی خه‌باتا چه‌كداری بكەن، و یێن كو رێ ناده‌نە وان خه‌باتا چه‌كداری ل چیایێن كوردستانا تركیێ بكەن، پارتییا دیمۆكراتا كوردستانێ یه… سه‌باره‌ت ڤێ بانگه‌شه‌یا ئاست نزم ئه‌م دبێژین: گه‌لۆ كێ رێک لێ گرتییه کو ئه‌و خه‌باتا خۆ ل كوردستانا تركیێ بكەن و ب جامێرانه به‌شه‌كێ ژ وان ده‌ڤه‌ران بۆ خۆ ئازاد نەكەن و ل وی جهی به‌رده‌وامیێ ب خه‌بات و چالاكیێن خۆ بدەن، پرسیار ل ڤێرە ئه‌ڤەیە، ئایا ل ناڤ ئاخا هه‌رێما كوردستانێ به‌رخو‌دانێ دژی كۆمارا تركیێ دكەن و ل ڤێرە داكۆكیێ ل مافێن ره‌وا یێن كوردێن باكورێ كوردستانێ دکەن؟ یان ژی هوون نەشێن خه‌باتا چه‌كداری ل كوردستانا تركیێ بكەن و د بنەرەت دا ژ بۆ دروست كرنا سه‌رئێشێ بۆ گه‌ل، په‌رله‌مان، حكوومه‌ت و ژ ناڤ برنا ئه‌زموونا هه‌رێما باشوورێ كوردستانێ هوون ل ڤێرەنە، گه‌ر هوون هندە جامێرن كو به‌رخۆ‌دانێ ل دژی كۆمارا تركیێ به‌رده‌وام بكەن، ل ڤی ده‌می پێدڤییه ل ناڤا ئاخا كوردستانا تركیێ وێ بانگه‌شێ بكەن، نه ل جهه‌كێ دی كو ب سه‌دان كیلۆمه‌تران ژ كوردێن كوردستانا تركیێ دووره.
په‌كه‌كه ب چ لۆژیك ڤی مافی ددەته خۆ كو د چارچووڤێ سنۆرێ قانوونی و ده‌ستووری یێ باشوورێ كوردستانێ دا، سنۆران بۆ لڤاندنا هێزا پێشمه‌رگه‌ی دیار بكەت
هه‌ر د ڤێ راگەهاندنێ دا، كه‌جه‌كه باس ل بنه‌جهكرنا هیزه‌كا پێشمه‌رگه‌ی ل زینی وه‌رتێ دکەت، د ڤێ مژارێ ژی دا گەلەک ب بێ منه‌تی ب رەنگەکێ د ئاخڤن وه‌كو كو زینی وه‌رتێ به‌شه‌ك نەبیت ژ ئاخا باشوورێ كوردستانێ و وه‌ها نیشان ددەن بجهكرنا پێشمه‌رگه‌یان ب بریارا حكوومه‌تا كوردستانێ ل وێ ده‌ڤه‌رێ بن پێ كرنا مافێ وان بیت! ب گۆتنه‌كا دی سه‌ركرداتییا په‌كه‌كێ ب چ لۆژیك ڤی مافی ددەته خۆ كو د چارچووڤه‌یا سنۆرێ قانوونی و ده‌ستووری یێ هه‌رێما باشوورێ كوردستانێ، سنۆران بۆ لڤاندنا هێزا پێشمه‌رگه‌ی دیار بكەن، ئه‌ڤ بانگه‌شه هه‌ڤده‌ك دگەل بێ بها كرنا سیاسه‌ت و ستراتیژییا ئێکەتییا نه‌ته‌وه‌یی یا د ناڤ كوردان دا، د هه‌مان ده‌می دا خۆ فه‌رز كرنه‌كا دیار و به‌رچاڤه کو چ جاران ناهێتە قه‌بوول كرن و گه‌لێ باشوورێ كوردستانێ ب ڤان ئاخفتنێن ته‌یسۆك و خەلەت ناهێتە خاپاندن و دزانیت ئاراسته‌یا راست یا بوویه‌ران ب چ رەنگ و چاوا دچیتە پێش.
كه‌جه‌كه نه‌شێت ب ئاشكرایی بێژیته رایا گشتی یا کوردستانێ کو ئەوان نه‌هێلا ئێزدی ل کۆجۆ بهێن رزگار کرن؟
ئه‌گه‌ر هوون راست دبێژن كو هه‌وه به‌ره‌ڤانی ژ كوردێن ئێزدی كرییە بۆچێ پشتی رزگار كرنێ هوون شه‌نگالێ ژ بۆ ئێزدییان ناهێلن، بۆچی هوون جاره‌كا دی وان دكەنە قوربانیێن مه‌به‌ستێن خۆ یێن خراب؟
د درێژییا راگەهاندنێ دا، كه‌جه‌كه دبێژیت: ئه‌م د هەوارا كوردێن ئێزدی یێن ده‌ڤه‌را شه‌نگالێ دا چووین، ئه‌ڤە د ده‌مه‌كێ دا یه كو هێزێن پێشمه‌رگه‌یێن كوردستانێ پلان دانابوو كو ل گه‌ل هێزێن هه‌ڤپه‌یمانان بچنه ناڤا گوندێ كۆجۆ و كوردێن ئێزدی ژ دۆرپێچا تیرۆریستێن داعشێ رزگار بكه‌ت، پرسیار ل ڤێرە ئه‌ڤەیە، ئایا كه‌جه‌كه دشێت ب ئاشكرایی بۆ رایا گشتی یا كوردستانێ بێژیت: چ هێزه‌ك بوو كو نەهێلای ئه‌ڤ ئۆپه‌راسیۆنا هه‌ڤبه‌ش یا هێزێن پێشمه‌رگه‌ی و هه‌ڤپه‌یمانان بۆ رزگار كرنا كوردێن ئێزدی ل كوجۆ بهێتە ئه‌نجام دان، ژ ڤێ ژی زێده‌تر د جهێ خۆ دایه ڤێ یه‌كێ ژی ب رایا گشتی یا كوردستانێ رابگەهینین، كو ئه‌و هێزا ئۆپه‌راسیۆنا ئازاد كرنا شه‌نگالێ چه‌ندین جاران پاشئێخستی، هه‌ر چه‌كدارێن په‌كه‌كێ بوون ل وێ ده‌ڤه‌رێ و پشتی كو ب قاره‌مانییا هێزێن پێشمه‌رگه‌یێ شه‌نگال هاتییه رزگار كرن، په‌كه‌كێ به‌شه‌ك ژ شه‌نگالێ دابری و كانتۆن تێدا راگەهاند و ده‌ستێ خۆ كره د ده‌ستێ حه‌شدا شه‌عبی دا و ل جهێ ئالایێ كوردستانێ ئالایێ په‌كه‌كێ بلند كر دا كو گازی سوپایێ تركیا بكەن و جاره‌كا دی كوردێن ئێزدی بهێنە كۆمكوژ كرن.
هێزا پێشمه‌رگه‌یێ كوردستانێ كو ئه‌ركێ سه‌ر ملێن وانه به‌ره‌ڤانیێ ژ هه‌ر بوهۆسته‌كا ئاخا كوردستانێ بكه‌ن و چ جاران ڤێ یه‌كێ ناكەتە منه‌ته‌ك ل سه‌ر وه‌لاتیێن خۆ، لێ بۆ میناك ده‌مێ هێزێن پێشمه‌رگه‌یێ كوردستانێ د هاوارا كۆبانێ چووین، پشتی رزگار كرنا كۆبانێ ئایا هیچ به‌شه‌ك ژ باژاری دابری، یان ژی پشتی كو ئه‌ركێ خۆ یێ نشتیمانی ب سه‌ربه‌رزی ئه‌نجام دای ڤه‌گه‌ریا هه‌رێما كوردستانێ؟، پرسیار ئه‌ڤەیە ئه‌گه‌ر هوون راست دبێژن كو هه‌وه به‌ره‌ڤانی ژ كوردێن ئێزدی كرییە بۆچێ پشتی رزگار كرنا شنگالێ، شه‌نگالێ بۆ ئێزدییان ب جهـ ناهێلن، هوون بۆچی جاره‌كا دی وان دكەنە قوربانیێن مه‌به‌ستێن خۆ یێن خراب؟
چاوا چێدبیت په‌كه‌كه باس ل یەکێتییا نەتەوەیی بکەت و هه‌ڤده‌م ئالایێ کوردستانێ بسوژیت، ما نە ھەر په‌كه‌كه بوو ئاستەنگ بۆ کۆنگرەیا نەتەوەیی چێکرین و نه‌هێلا ئه‌و ئەنجوومەن دروست ببیت؟
د به‌شه‌كێ دی یا راگهاندنێ دا، كه‌جه‌كه ئاماژه ب ئێکەتییا نه‌ته‌وه‌یی دكەت، ب راستی جهێ پیکەنینێ یە كو ئه‌و ڤی مافی ب خوه بدەن كو باس ل ئێکەتییا نه‌ته‌وه‌یی یا كوردان بكەن، ل ڤێرە گرنگه گەلەک ب ئا‌شکرا رایا گشتی ئاگه‌هدار بكەین و بپرسین، ئایا هه‌ر په‌كه‌كه نه‌بوو ئاسته‌نگ بۆ كۆنگره‌یا نه‌ته‌وه‌یی دروست كرین و نه‌هێلای ئه‌ڤ ئه‌نجوومه‌نا نه‌ته‌وه‌یی ئاڤا ببیت؟، ئایا هه‌ر په‌كه‌كه نینه كو ئالایێ كوردستانێ د سۆژیت و ئه‌و كه‌سێن ڤی ئالای بلند دكەن دئێشینیت و سڤكاتیێ پێ دكەت؟ پرسا هه‌ره گرنگ ل ڤێرە ئه‌ڤه‌یە، ئایا ئالایێ كوردستانێ ئالایێ پارتییا دیمۆکراتا كوردستانێ یه كو هوون ئاگری بەرددەنێ؟ ئایا ئه‌ڤ ئالایه به‌ری دامه‌زراندنا كۆمارا كوردستانێ ل سالا 1946ێ، سه‌مبول و هێڤییا نه‌ته‌وه‌یه‌كا داگیركری و بێ ده‌وله‌ت نه‌بوویه و بۆ یه‌كه‌مین جار ل كۆمارا كوردستانێ بلند نه‌بوویه؟
گونەھا پارتی چییە کو کوردستانیێن باکور و رۆژئاڤا، ل باشوور و رۆژھلات ماسکا سەر روویێ كه‌جه‌كێ ھلدانە و تێگه‌ھشتینە کو ئەڤ کۆما ب ناڤێ جڤاک بۆ ئەجێندایەکە دەرەکی خه‌باتێ دكه‌ت
چه‌واشه‌كاریێن د ناڤا داخویانییا كه‌جه‌كێ دا ب ئاسته‌كی ژ بوهایێن نه‌ته‌وه‌یی و نشتیمانی ڤالایه كو پێویست بوو په‌رده ل سه‌ر چه‌واشه‌كارییان بهێتە هه‌لگرتن و رایا گشتی ژ راستییان ئاگه‌هدار بكەین، ژ به‌ر ڤێ چەندێ ل دوماهیێ ب تنێ ڤێ دبێژینە کەجەکێ، هێزه‌كا سیاسی خۆ ب كورد وێنه بكەت و ب كریار ئالایێ كوردستانێ بسۆژیت و سه‌رئێشێ و ئاشۆپێ بۆ نه‌ته‌وه‌یا خۆ دروست بكه‌ت، پێدڤییه شه‌رم بكەت باس ل ئێکەتییا نه‌ته‌وی یا كوردان و بهرخودانا داكۆكی كرن ل مافێن ره‌وا یێن كوردستانێ بكه‌ت و دوماهی جار ژی گونه‌ها پارتی چی یه كو كه‌جه‌كه شكه‌ستنا هزری و پێگه‌ها جه‌ماوه‌ری یا خۆ ل ناڤا پارچهیێن كوردستانێ دئێخیتە ستۆیێ پارتی؟ گونه‌ها پارتی چی یه كو كوردستانییان ل باكور و رۆژئاڤا، ل باشوور و رۆژهلات ماسكا سه‌ر روویێ كه‌جه‌كێ راکرییە و ئێدی تێگەهشتینه كو ئه‌ڤ كۆما ب ناڤێ جڤاكێ هندی د به‌رژه‌وه‌ندییا ئه‌جێندایه‌كا ده‌ره‌كی دا خه‌باتێ دكەت، هند ژ بۆ پرسا كوردان وه‌ك هێزه‌كا ره‌سه‌ن یا كوردستانی خه‌باتێ ناكه‌ت.
به‌شێ چاپه‌مه‌نیێ یێ ده‌زگه‌هێ رۆشنبیری و راگه‌هاندنێ
پارتییا دیمۆكرات یا كوردستانێ
24ی تەباخا 2020ێ
