باله‌فرێن جه‌نگ یێن ده‌وله‌تا تركیێ ئێریشێن ئاسمانی ل چیایێ مه‌تینی ل باشوورێ كوردستانێ ئه‌نجام دان و ب وێ ئه‌گه‌رێ 5 گه‌ریلا ژیانا خوه ژ ده‌ست دا.
وه‌زاره‌تا پاراستنا نه‌ته‌وه‌یی یا تركیێ ئیرۆ رۆژا شه‌می 29/8/2020ێ ئه‌شكه‌ره كر، د ئێریشه‌كا ئاسمانی دا كو ل چیایێ مه‌تینی هاتییه ئه‌نجام دان، لڤینێن پارتییا كاركه‌رێن كوردستانێ هاتنه هه‌ده‌ف كرن و زیانێن جانی ب په‌كه‌كێ كه‌تنه.
ل گۆر داخویانییا وه‌زاره‌تا پاراستنا نه‌ته‌وه‌یی یا تركیێ، د ڤێ ئێریشێ دا، 5 گه‌ریلایێن په‌كه‌كێ ژیانا خوه ژ ده‌ست دانه.
ده‌وله‌تا تركیێ دو مه‌ه و نیڤه ئێریشا سه‌ر باشوورێ كوردستانێ ب ئه‌گه‌را په‌كه‌كێ ده‌ست پێ كری، د ڤێ ده‌مێ دا زیانا هه‌ره مه‌زن ب گوندێن باشوور ب تایبه‌ت یێن ل سنۆرێ پارێزگه‌ها دهۆكێ كه‌تییه، نێزیكی 50 گوندان هاتینه ڤالا كرن و په‌كه‌كه رۆژ بۆ رۆژێ لڤینێن خوه نێزیكی گوند و باژارۆكان دكه‌ت.
