رهفتارێن پارتییا كاركهرێن كوردستانێ و هێزێن گرێدای وێ ل دژی گهلێ ئێزدی ل دهڤهرا شهنگالێ بهردهوامن، ئێزدی دبێژن: «پهكهكه زارۆك، جوان و ژنێن مه د رهڤینیت».
قائمقامێ شهنگالێ مهحما خهلیل د داخویانییهكا نڤیسكی دا، بانگ ل حكوومهتا فهدهرال یا ئیراقێ كر سنۆرهكی بۆ كارێن پهكهكێ یێن ل دژی ئێزدییان دانیت، تایبهت پاش سهرهدانا ڤێ دوماهیێ یا بهرپرسیارێن سهربازی یێن ئیراقێ ژ بۆ دهڤهرا شهنگالێ.
قائیمقامێ شهنگالێ د داخویانیێ دا دبیژیت: «ل ڤێ دوماهیێ شاندێن سهربازی یێن حكوومهتا ئیراقێ سهرهدانا شهنگالێ كرنه كو ژ سهرۆك ئهركان، وهزیرێ ناڤخۆ و شێوهرمهندێ ئاساییشا نهتهوهیی و ههژمارهكا فهرماندارێن بهرز پێكهاتیبوو و ئهو ژ نێزیك هایداری رهوشا شهنگالێ بوون، لێ بهلێ ههتا نوكه وان چ ههنگاڤ ل دژی كریارێن پهكهكێ یێن د راستا گهلێ ئێزدییان دا دهێنه كرن، نههاڤێتینه».
دهست نیشان كر، پهكهكه و هێزێن گرێدای وێ ل ڤێ دوماهیێ دهست هاڤێتییه رهڤاندنا زارۆك و ژنێن ئێزدی و پاش رهڤاندنێ ژ بۆ زیندانێن نهێنی دهێنه ڤهگوهاستن.
قائیمقامێ شهنگالێ ههروهها ل دهربارا ئاوارهیێن شهنگالێ گۆت كو ئێزدی 90%ێ یا ئاكنجیێن شهنگالێ پێك دئینن، ئاوارهیێن شهنگالێ ب ئهگهرا پهكهكێ نهشێن ڤهگهرن مالێن خۆ و دهست نیشان كر كو پێویست بوو شاندێن ئیراقێ ل دهما سهرهدانا شهنگالێ كرین ڤێ ئازارا ئێزدییان ژ ریهسپی و بهرپرسیارێن ئێزدی یێن دهڤهرێ گوهـ لێ ببن.
قائمقامێ شهنگالێ پارتییا كاركهرێن كوردستانێ ب تێكدانا پێكهاتهیا جڤاكا شهنگالێ سووچبار كر و گۆت كو پهكهكه ئهگهرا سهرهكی یا ژ ناڤ چوونا شهنگالێ و نهئاڤهدان كرنا وێ یه.
ههر ل ڤێ دهربارێ دا ئهندامێ بهرێ یێ ئهنجوومهنا پارێزگهها نهینهوا ماجد شهنگالێ دبێژیت: پێویست بوو شاندێن حكوومهتا ئیراقێ ل دهستپێكێ سهردانا ههرێما باشوورێ كوردستانێ كربان ژ بۆ كو گازندێن گهلێ شهنگالێ یێن د كامپان دا د ژین گوهـ لێ ببان.
ههروهها ئهشكهره كر، 80% ژ ئاوارهیێن شهنگالێ ب ئهگهرا پهكهكێ نهشێن ڤهگهرێن مالێن خۆ.
ههروهها دهست نیشان كر كو ئهڤا نها ل شهنگالێ روو ددهت جینایهتهكه مرۆڤی یه حهشدا شهعبی و پارتییا كاركهرێن كوردستانێ ژێ بهرپرسیارن و پێویسته حكوومهتا ئیراقێ دوماهییهكێ ژ بۆ ڤێ جینایهتێ دانیت و شهنگالێ ژ دهست كۆمێن چهكداران دهربێخیت.
