بزانه‌ لاڤرۆڤ چ سۆز ب ئیلهام ئه‌حمه‌دێ دا

بزانه‌ لاڤرۆڤ چ سۆز ب ئیلهام ئه‌حمه‌دێ دا

شاندێن ئه‌نجوومه‌نا سووریایا ده‌مۆكراتیك و پارتییا ئیراده‌یا گه‌ل یا سووریێ كو پارتییه‌كه‌ك ئۆپۆزسیۆنه‌، ئیرۆ ل مۆسكۆیێ ل گه‌ل وه‌زیرێ كارێن ده‌رڤه‌ یێ رووسیایێ جڤییان و پرسێن لهه‌ڤهاتنێ، بهێزكرنا سه‌روه‌رییا سووریێ و یه‌كپارچه‌ییا وێ هاتن نیقاش كرن.

د چارچووڤه‌یا سه‌ردانا شاندا مه‌سه‌دێ ب سه‌رۆكاتییا ئیلهام ئه‌حمه‌دێ ژ بۆ رووسیایێ، ئیرۆ رۆژا دوشه‌می 31/8/2020ان، جڤینه‌ك ل نێڤبه‌را شاندا مه‌سه‌دێ و پارتییا ئیراده‌یا گه‌ل ب سه‌رۆكاتییا قه‌دری جه‌میل و سێرگی لاڤرۆڤ وه‌زیرێ كارێن ده‌رڤه‌ یێ رووسیایێ هاته‌ ل دار خستن.

پاش جڤینێ سێرگی لاڤرۆڤ د داخویانییه‌كێ دا ئه‌شكه‌ره‌ كر كو پرسێن گرێدایێ چاره‌سه‌رییا سیاسی یا ره‌وشا سووریێ ژ بۆ گه‌هشتن ب چاره‌سه‌رییه‌كا گشتگیر ل نێڤبه‌را ئالیێن سووریێ، ل ژێر رۆناهییا بریارا 2254 یا ئه‌نجوومه‌نا ئه‌وله‌هیێ هاتن نیقاش كرن.

هه‌روه‌ها ده‌ست نیشان كر ل ڤی ده‌ربارێ دا، هه‌لوه‌ستا رووسیایێ هاته‌ ته‌كه‌ز كرن كو وێ پشتگریێ بده‌ته‌ دانوسته‌ندنێن ژ بۆ بهێز كرنا سه‌روه‌رییا سووریێ و یه‌كپارچه‌ییا خاكا وێ و هه‌روه‌ها خۆشكرنا زه‌مینه‌سازیێ ژبۆ پێكڤه‌ژیانا ل نێڤبه‌را هه‌موو پێكهاتیێن ئۆلی و نه‌ته‌وی.

ئیلهام ئه‌حمه‌دێ و قه‌دری جه‌میل، وه‌زیرێ رووسی هایدار كر كو وان به‌را جڤینێ لهه‌ڤهاتنه‌ك ل نێڤبه‌را مه‌سه‌دێ و پارتییا ئیراده‌ دا ئیمزا كرییه‌.

ل ده‌ربارا ئه‌نجامێن جڤینێ، ئه‌ندامێ شاندا مه‌سه‌دێ حكمه‌ت حه‌بیب گۆت: «وەزارەتا کارێن دەرڤە یا رووسیایێ پشتراست کر کو وێ پشتگرییا بەشدارییا نوونەرێن مه‌سه‌دێ و رێڤەبەریا خوەسەر د چارەسەرییان دا بکەت، رایەدارێن رووسیایێ د وێ باوەریێ دا نە کو بێی بەشدارییا گەلێ سووریێ  چارەسەرییا سیاسی سه‌رناگریت».

هه‌روه‌ها ده‌ست نیشان كر كو د ھەمان دەمێ دا ئاکتیڤ کرنا دیالۆگا سووری – سووری ژی ھاتە نیقاش کرن.

حەبیب دا زانین کو وەزارەتێ پشتراست کرییە کو ئەو دێ پشتگرییا بەشدارییا باکور و رۆژھلاتێ سووریایێ بکه‌ن، چ ل سەر ئاستا مه‌سه‌دێ بیت یان ژی ل سەر ئاستا رێڤەبەرییا خوەسەر.