چەکدارەکێ سەر ب ترکیێ ڤە گەفان ل مالباتەکا عەفرینێ دکەت و دخوازیت ب زۆری کەچا وان ل خوە مەهر بکەت.
ل عەفرینێ ئەندامەکێ بەرێ یێ داعشێ کو نھا ئەندامێ گرووپا ئەحرار ئەل-شەرقیێ یە، گەفان ل مالباتەکا کورد دکەت و دخوازیت ب زۆری کەچا وان ل خوە مەهر بکەت.
رێخستنا مافێن مرۆڤان یا عەفرین – سووریێ راگھاند، کو گرووپێن چەکدار ھندەک مالباتێن کورد نەچار دکەن کەچێن وان ب زۆرێ ب چەکدارێن گرووپێن سەر ب ترکیێ ڤە هەڤژینیێ پێک بینن.
ل گۆری وێ رێخستنێ، چەکدارێ ب ناڤێ راد ئەمرۆ کو ئەندامێ گرووپا ئەحرار ئەل-شەرقیێ یە، گەف ل مالباتەکا کورد کرن، کو ئەگەر کەچا خوە نەدن وی، ئەو دێ وان کوژیت، د دەمەکێ دا کو کەچک وی ناخوازیت و دەستگرتیا کەسەکێ دی یە.
ل گۆری ھەمان چاڤکانیێ، ئەو چەکدار ئەندامەکێ بەرێ یێ داعشێ بوو ل دێرە زۆرێ.
ھەرێما عەفرینێ یا رۆژاڤایێ کوردستانێ ١٨ێ ئادارا ٢٠١٨ان د ئەنجاما ئێرشەکا بەرفرەھ دا کەتبوو دەستێ لەشکەرێن ترکیێ و گرووپێن چەکدارێن سەر ب وی وەلاتی ڤە.
