ده‌وله‌تا تركیێ ئێریشێن ل سه‌ر پارتییا كاركه‌رێن كوردستانێ ل باكورێ ولات دژوار كرنه، ئیرۆ ژی سینۆرێ ڤان ئێریشان ژ بۆ پارێزگه‌هێن مووشێ و چه‌ولیگێ، به‌رفره‌هـ كرنه.
وه‌زاره‌تا كارێن ناڤخۆ یا تركیێ ئه‌شكه‌ره كر، ئیرۆ رۆژا پێنجشه‌میێ 3/9/2020ان، ئۆپه‌راسیۆنه‌كه مه‌زن ل دژی رێخستنا په‌كه‌كێ، ل سینۆرێ مووشێ و چه‌ولیگێ ده‌ست پێ كر، ئۆپه‌راسیۆن دبه قۆناغا نه‌هه‌مین ژ ئۆپه‌راسیۆنا یلدرم كو د مه‌ها رابووری ده هاتییه مه‌شاندن.
هه‌روه‌ها ئه‌شكه‌ره كر، هه‌زار و 22 عه‌سكه‌ر، جه‌ندرمه و گوند پارێز د ڤێ ئۆپه‌راسیۆنێ ده به‌شدارن و ژ بۆ ده‌ما چه‌ند رۆژان دێ به‌رده‌وام بیت.
وه‌زاره‌تا ناڤخۆ ده‌ست نیشان كر، د قۆناغێن 1 هه‌تا 8 یا ئۆپه‌راسیۆنا یلدرم دا كو ل لجێ یا ئامه‌دێ، ئاگری مێردینێ و ده‌ڤه‌را هه‌كاریێ بوون، 38 گه‌ریلا جانێ خۆ ژ ده‌ست دانه.
ناڤه‌ندا چاپه‌مه‌نی و راگه‌هاندنێ یا هه‌په‌گێ بالێ سه‌ربازی یێ په‌كه‌كێ، ئاگاهی ل ده‌ربارا ڤان ئێریشان به‌لاڤ نه‌كرنه، لێ به‌لێ ل رۆژێن رابووری كوشتنا 9 عه‌سكه‌رێن ترك ل ناڤچه‌یێن كو ئۆپه‌راسیۆنا یلدرم لێ هاتییه كرن راگه‌هاندبوو.
