ئۆپه‌راسیۆنا په‌یاده‌ یا تركیێ ژشه‌رانشێ ده‌ستپێكر

سوپایێ تركیێ ئیرۆ ئێریشا په‌یاده‌ ل باشوورێ كوردستانێ ل دژی په‌كه‌كێ ده‌ست پێ كر، عه‌سكه‌رێن ترك ل گوندی شه‌رانشێ ده‌ست ب لڤینێ كرن و به‌ر ب گوندێن دی ڤه‌ تێن.

 چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره‌ كر، ئیرۆ رۆژا پێنجشه‌می 3/9/2020ان، عه‌سكه‌رێن ترك ده‌ست ب ئۆپه‌راسیۆنا په‌یاده‌ ل گوندێن سینۆرێ باژارێ زاخۆ كر، لڤینا عه‌سكه‌ران ژ گوندێ شه‌رانشێ ڤه‌ ده‌ست پێ كرییه‌.

هه‌روه‌ها ده‌ست نیشان كر، ژبلی گوندێ شه‌رانشێ و دۆربه‌را گوند، ژ گوندێ شاقۆلێ ژی عه‌سكه‌ران ده‌ست ب حه‌ره‌كه‌تێ ب ئاراسته‌یا لیڤانێ  و گوندێ بۆسه‌لا نوو كرنه‌.

ل گۆر دیمه‌نێن ڤێ ئێریشا په‌یاده‌ كو ژ چاڤكانیێن پێگه‌ها مه‌ ل باشوور هاتییه‌ شاندن، ده‌نگێ ته‌قه‌ و شه‌ر و په‌ڤچوونان ل گوندێ شه‌رانشێ تێ گوهلێبوون، هه‌روه‌ها دۆمانه‌كا مه‌زن تێ دیتن.

ده‌وله‌تا تركیێ ل رۆژا 15 مه‌ها رابووری مه‌زنترین ئێریشا سه‌ر باشوورێ كوردستانێ، ب سه‌ده‌ما په‌كه‌كێ ده‌ست پێ كر، ژ وێ ده‌مێ ڤه‌ سوپایێ تركیێ پێتری 28 نوقته‌یێن خوه‌ ل باشوور ب تایبه‌ت ل گوندێن دووربه‌را زاخۆ زێده‌ كرنه‌، په‌كه‌كێ ژی رۆژ بۆ رۆژێ شه‌رێ خوه‌ و تركیێ نێزی گوند و باژارۆكان دكه‌ت و ب وێ سه‌ده‌مێ پێتری 50 گوندان ژ هاتنه‌ ڤالا كرن.