په‌كه‌كه‌ ل سه‌ر وێرانكرنا گوندێن باشوور به‌رده‌وامه‌

په‌كه‌كه‌ ل سه‌ر وێرانكرنا گوندێن باشوور به‌رده‌وامه‌

پارتییا كاركه‌رێن كوردستانێ ئه‌ڤ پێتری دوو مه‌هانه‌ ب ئاوایه‌كی پر ئه‌شكه‌ره‌ لڤین و ته‌ڤگه‌رێن گه‌ریلایێن خوه‌ نێزی سینۆرێ گوند و باژارۆكێن باشوورێ كوردستانێ كرنه‌ و ب ڤێ یه‌كێ به‌هانه‌یان دده‌ته‌ ده‌ستێ تركیێ كو ئێریشی وان گوند و باژارۆكان بكه‌ت.

ئیرۆ رۆژا سێشه‌می 8/9/2020ان، باله‌فرێن جه‌نگ یێن ده‌وله‌تا تركیێ و تۆپهاڤێژێن ئارته‌شا وێ، ھەژمارەک ژ گوندێن سەر ب باژارۆکێ کانی ماسێ ڤە ل سینۆرێ پارێزگەھا دھۆکێ بۆمبەباران کرن، گوندێ بازێ و دۆربه‌را گوندێ بێدوهێ كه‌تن به‌ر ئێریشان، هه‌موه‌خت زنارا كێسته‌.

چاڤكانیێن خوه‌جهی ل باژارۆكێ كانی ماسێ ده‌ست نیشان كر، ژ بەر بۆمبەبارانێ تەنێ شووشەیێن پەنجەرەیێن گوندێ بازێ شکەستنە و چ زرارێن دی نەبووینه‌.

ئێریشا سه‌ر گوندێ بازێ ب باله‌فرێن جه‌نگ پێكهاتییه‌ و ئێریشا سه‌ر گوندێ بێدوهی و زنارا كێسته‌ ب تۆپهاڤێژان بوویه، ب ته‌ڤاهی ئێریشان ل ساعه‌ت 9:30 هه‌یا دۆربه‌را 10:30 ده‌وام كرن.

‌ده‌وله‌تا تركیێ ل 15 مه‌ها خزیرانا ئیسالێ ئێریشا ئاسیمانی و په‌ژاهی یا به‌رفره‌هـ ل دژی پارتییا كاركه‌رێن كوردستانێ په‌كه‌كێ ل باشوورێ كوردستانێ ده‌ست پێ كر، ژ وێ ده‌مێ ڤه‌ پێتری 50 گوندێن باشوور ب تایبه‌ت ل سینۆرێ پارێزگه‌ها دهۆكێ هاتنه‌ ڤالا كرن و هه‌ژماره‌ك ولاتیێن سڤیل شه‌هید كه‌تنه‌.

په‌كه‌كه‌ ژ ده‌ستپێكا ڤێ ئێریشێ ڤه‌، ب ئاوایه‌كی سیسته‌ماتیك حه‌ره‌كه‌تا گه‌ریلایێن خوه‌ خستنه‌ ناڤا گوند و باژارۆكان، ژ بۆ كو ببنه‌ مه‌یدانا شه‌ر و ژ هه‌مولاتییان بهێنه‌ ڤالا كرن، ئه‌ڤ یێك ژی بوویه‌ سه‌ده‌ما دلگرانییه‌كه‌ هه‌ر زێده‌ ل جه‌م شێنیێن گوندان.