وەک دوژمنێ خۆ لێهاتن رەوشەکا جڤاکناسی و دەروونی یە، مرۆڤ د ناڤا دەمی دا دچیت و دهێت، تشتێ کو گەلەک زێدە گلەیی و گازندان ژێ دکەت دوماهیێ دا وەکو وی تشتی لێ دهێت، د سیاسەتێ دا ژی ب ڤی رەنگی یە، میناک، پەکەکە د ھەر گۆتنەکێ دا دبێژیت: «فاشیزما ئاکەپێ و ھەڤپەیمانییا فاشیزما ئاکەپێ-مەھەپێ»، لێ هندی ده‌م دچیت پەکەکە ژی وەکو ئاکەپێ لێ دهێت و ل دوماهیێ ژ هەر لایەکێ ڤە، ئەو ب خوە دبیتە ئاکەپە، شێوازێ سیاسەتێ، شێوازێ دژمنکاری، نێچیرا جادێ و ته‌رزێ کێشە چارەسەر کرنێ ب دفن بلندی نێزیک دبیت، ئانکو ژ کیژ کونجێ بەرێ خۆ بدەینێ ئەم دێ ببینین کو د ناڤبەرا ئاکەپێ و پەکەکێ دا وەکو ئێک لێهاتن چێبوویە و وەکھەڤیەک ھەیە. ھەلویستێن ئەردۆگانی ێن تەهدیدکرن ل جیھانێ ھەمان شێواز د پەکەکێ دا ژی ھەیە. بێ رێزیکرن ب کەسێ بەرامبەری خوە، بێ دودلی دبێژن مرۆڤێ بەرامبەری خوە بێ ئەخلاق و بێ تەربیەت. لێ سەیرە کەسێ کو د بێژیت بێەخلاق، وەسا هزر دکەن کو وان چییا ئافراندینە ب ڤێ رووقایمی یێ رێڤەبەرێن پەکەکێ داخویانییان د دەن. ئەو ھەول ددەن کو بالانسێ بدەنە هەموو کەیسا، گەفان دکەن، گازی ھەستێن مرۆڤان دکەن، نرخێن جڤاکی و ژییانا مرۆڤان بێ رامان دکەن. ئەو خوە ب تنێ دیمۆکرات د بینن.
ھەر دو لایەن ژی ھەبوونا خوە یا رێخستنی پیرۆز دبینن و وەها دفکرن کو دخوازن ھەر کەس و ھەر تشت د خزمەتا ھەبوونا وان دا بیت. ئەو تنێ ل سەر ڤی تشتی نافکرن و ڤی تشتی ل سەر ھەر کەسەک دی ژی فەرز دکەن. وەکو ئەنجامەک، ھەر چەند ئەردۆگان و پەکەکە وەها بدەنە خویا کرن کو گەلەک ئێریشی ھەڤدو دکەن ژی، ئەو ھەردو ھەمان رێباز و ئامرازان بکار دئینن. ئەو رۆژ ب رۆژ پتر وەکو هەڤدو لێ دهێن.
بەسێ ھۆزات وەک پلنگێ ژ قەفەسێ رەڤیایی
بێ گومان، کەسێن کو ژ ڤێ لێکچوونێ بەهرا خوە وەردگرن ژی، ژنێن پەکەکێ نە. د ھەڤپەیڤینا کو بەسێ ھۆزات د ٣یی تەباخێ دا دگەل ستێرک تیڤی دا ئەنجام دابوو، وەکو زولامان گەف ل چەپ و راستا دکرن.
وێ سەدەمێن شەری ل دژی حکوومەتا ھەرێما کوردستانێ دەستنیشان کرن و گۆت؛ ئەڤە شەرەکی رەوا و پیرۆزە. وەکو ئەم ژنێن کورد دناسین دەما کو شەر دقەومیت، ژنێن کورد ژ بۆ بەرەڤانییێ دەستمالا خوە داڤێژن ناڤبەرا ھەر دو ئالیان دا کو شەر بهێتە راوەستاندن. لێ بەلێ بەسێ ھۆزات وەکو پلنگێ کو ژ قەفەسێ رەڤییا بیت ئێرشێ دکەتە سەر دەوروبەرا. بەسێ ھۆزات ب شێوازێ ئاخفتنا خوەیا گەفخوەر و بێشەرمییا خوە ڤە وەکو ئەردۆگان بوو. بەسێ ھۆزاتا گەنی هەر وەکو چیایێن بچووک ئافراندبن، ئەز د جیھانێ دا ژ ھەموو کەسی ھێژاترم بلا ھەر کەسەک پێش من ڤە رابیت ژ زلامەکێ زلامتر و ب زمانەکی دەستھلاتداری گەفێن شەرکرنێ ل رێڤەبەرییا باشورێ کوردستانێ کرن.
بەسێ ھۆزات وەلاتپارێز نینە
بەسێ ھۆزات گۆت کو گەر پەکەکە-پەدەکە شەری بکەن، ئەڤ شەرە نابیتە شەرێ “براکوژی”، ئانکو نە شەرێ د ناڤبەرا خویشک و برایانە. دیارە، بەسێ ھۆزات ب خوە ناسنامەیا کوردایەتیێ بچووک دبینە و کوردا وەکو کێمە نەتەوە بناڤ دکەت، ب مەژییە کی کەمالیست کوردا دبینیت. لەوما ژی ھەلویستەکێ وەلاتپارێزیێ ئەم ژ بەسێ ھۆزات ھێڤی ناکەین. بەسێ ھۆزات شەربەتا کەمالیزمێ ڤەخوارییە و دخوازیت کوردان بچووک بکەت. بەسێ ھۆزات نە وەلاتپارێزە، ئەو مریدا پەکەکێ و ئاپۆیە. ل گۆری بەسێ ھۆزات پەکەکە ژ کوردستانێ مەزنترە و عەبدولا ئۆجەلان ژ نەتەوەیا کورد مەسترە. دڤێت ھەر کەسەک پابەندی ڤان ھەر دو ھێزان بیت. بەسێ ھۆزات خوە ب ئەنداما پەکەکێ دبینیت، خوە مریدا ئاپۆ دبینیت، خوە ژن دبینیت، خوە عه‌له‌وی دبینیت، خوە دێرسمێ دبینیت، لێ بەلێ ب چ رەنگا خوە کورد نابینیت.
دهێتە دیتن کو بەسێ ھۆزات ژ سیاسەتا رۆژانە بێ ئاگەهە. ل گۆری بەسێ ھۆزات، ھەمی دەولەت و ھێزێن ل جیھانێ بونە ئێک و دخازن پەکەکێ ژناڤ ببەن. لێ بەلێ، هەر ئەو بەسێ ھۆزات د ھەڤپەیڤینەکێ دا کو وێ ل 17 شباتا 2014ێ ب كه‌نالێ جه‌زیره دابوو گۆتبوو: “یێن کو دبێژنە مە جوداخواز خەلەتن. ئەم نە خۆدانێن ستراتیژیک یێن کوردستانا سەربخوەینە. مە د سالا 2000 ێ دا دەولەت – نەتەوە ژ بەرنامەیا خوە دەرخستیە. گەر ئەڤ کێشەیە تنێ ل ھێڤییا ترکییێ مابا، نها مە زوو چارەسەر کربا. ئەمریکا و ئەورۆپا ناخازن کێشەیا کوردا بهێتە چارەسەر کرن. ژ بەر کو سیاسەتێن ھەرێمی ل سەر ترکیایێ دمەشینن. ژ بەر ڤێ چەندێ ئەو ب بەردەوامی پارانۆیا “سیناریۆیا” جوداخوازییێ چێدکەن. “
پێویستە بەسێ ھۆزات ب ڤی مەژییێ خوەیێ ژەنگی ڤە ب ناڤێ کوردا سییاسەتێ نەکەت. و ھەمان دەم بەسێ ھۆزات دبێژیتە رایەدارێن پەدەکێ : “یا کو ھوون دکەن تاوانەک نەتەوەیی یە، ھوون دێ د دیرۆکێ دا هێنە دادگەھکرن”. لێ بەلێ، ئەگەر دادگەهەک ھەبیت، دێ بەسێ ھۆزات هێتە دادگەهکرن. بەسێ ھۆزات کۆردیناتۆرا شەرێ خەندەکان بوو. زەرەرەک گەلەک مەزن گەھاند گەلێ کورد و بوو سەدەما وێرانکرنا باژێرێن کوردان.
پێدڤییە کو بەسێ ھۆزات ژ گەلێ جزیرێ و خیزانێن گەنجێن ھاتینە شەوتاندن لێبۆرینێ بخوازیت
بەسێ ھۆزات بەرپرسیارا وان کەسانە کو ب فەرمانا وان د ژێرزەمینێن جزیرێ دا هاتینە شەوتاندن. ئەو ژی هندی دەولەتا ترک بەرپسە ژ ڤێ کۆمکوژیێ. وان گەنجان دەرفەت ھەبوو کو ژ وان ژێرزەمینان دەرکەڤن. دبیت کو ئەو نھا ساخ بن. دەولەتا ترک ئامبولانس فرێکربون وێ دەرێ. ئەو دشییان دەرکەڤنە دەرڤە، دبیت کو ئەو د زندانێ دا مابان، لێ ئەوێ دا ساخ مینن. گاڤا کو ئەڤ ئیحتیمالە ژ بەسێ ھۆزات را دهێتە گۆتن، بەسێ ھۆزات وھا دبێژیت: “ئەم ل سلۆپی پاشڤە ڤەکێشیاین، و ئەگەر ئەم ل جزیرێ ژی پاشڤە ڤەکێشین، دێ ناڤوودەنگێن مە تێک چن. بەرخوەدان کرن رێکا ژ هەموویان باشترە.” دزانن کو شەرێ ل باژێری دێ ھەلوەشینەک گەلەک مەزن چێکەت. ئەو گەلەک ب زەلالی دزانن کو ئەو د شەرەکی ب ڤی رەنگی دا سەرناکەڤن، گەلۆ بۆچی یاری ب ژیانا ھندە مرۆڤان کر؟! دووڤ دا وێ مرنا مرۆڤێن کو ب بریندارییا خوە نەشییابوون خوە خلاس بکەن ئەرێ کر. پشتی کو ئەڤە ھەموو قەومین، بەسێ ھۆزاتێ د ھەڤپەیڤینەکێ دا د بھارا ٢٠١٥ێ دا گۆت: ئاکەپێ وندا کر، بەرخوەدانا جزیر و سوورێ بسەر کەت. دەما کو جەنازە ھێژ ل ئەردی بوون و ل جزیرێ بێھنا کەلەخێن مرۆڤان دھات، بەسێ ھۆزات باس ل بەرخوەدانێ دکر. ھەمان ئەو بەسێ ھۆزات نووکە رابوویە دبێژیتە پەدەکێ: ھوون بێ ویژدان و بێ ئەخلاقن.
بەسێ ھۆزات، ژ بۆ “پیلانێن ئازادکرنا سەرۆکێ خوە، تەڤگەرا شۆرەشگەری یا بێ داوی” زارۆکێن ڤی گەلی ب بێشەرمیێ فرێدکەتە بەردەم مرنێ لەوما ژی ئەم دبێژین بەسێ ھۆزات نە خۆدان ویژدانا ژنێ یە. ئەو نەشێت دگەل کەسێ باس ل ئەخلاقی بکەت، ویژدان یان ژی سیاسەتێ بکەت. بلا ئەو دەستپێکێ ژ بەر کریارێن خوەیێن شەرێ خەندەکا داخوازا لێبۆرینێ ژ وان خێزانێن زارۆکێن وان هاتیە شەهیدکرن و ل جزیرێ گەنجێن وان ھاتیە شەوتاندین بکەت.
پێدڤییە کو بەسێ ھۆزات و سەرۆکێن دی یێن پەکەکێ دەست ژ ڤێ ھەلویستا خوە یا بێشەرم بەردەن. شوونا کو ئەو ھەر کەسەکی وەکو شریکێن ئاکەپێ و ترکییێ ببینن، د دەسپێکێ دا پێویستە رێیا خوە ژ رێیا دەولەتا ترک جوودا بکەن، و دەست ژ سەلیقا ئەردۆگانی د ئاخفتنێ دا بەردەن.
