وەلاتی گازندان ژ بلندبوونا بوهایێ کەلووپەلان دکەن

وەلاتی گازندان ژ بلندبوونا بوهایێ کەلووپەلان دکەن

بلندبوونا بوهایێ کەلووپەلان د ناڤا بازارێن رۆژئاڤایێ کوردستانێ دا هەر کو دچیت پتر دەنگێ وەلاتییان بلند دکەت، رۆژ ب رۆژ بوهایێ کەلووپەلان ل رۆژئاڤا بلند دبیت و وەلاتی گلەیی و گازندان ژ رێڤەبەرییا رۆژئاڤا دکەن ژبەرکو چاڤدێری ل سەر بازاری ناکەن.

گلەیی و گازندێن وەلاتیێن رۆژاڤایێ کوردستانێ دەربارێ بلندبوونا بوهایێ کەلووپەلان رۆژ ب رۆژ زێدەتر دبن. د دەما کو خەلک دبێژن چاڤدێری نینە، فرۆشگەر ئەگەرێن بلندبوونا بوهایێ کەلووپەلان ژ بۆ چەندین سەدەمێن جودا ڤەدگەرینن، ل گۆر فرۆشیاران ئێک ژ وان سەدەمان ئەڤەیە کو ئەو گەلەک پارەیان ل سەر ڤەگوھەستنا کەرەستەیان دمەزێخن. ھەروھا دبێژن کو نرخێ لیرەیا سووری گەلەک کێم بوویە.

زەحمەتیێن ئابۆری ل رۆژاڤایێ کوردستانێ ب دوماهی ناهێن، نرخێ کەلووپەلان بلندن و شیانێن وەلاتیان ژی ژ بۆ کرینا وان گەلەک کێمن. ل بازارێن رۆژئاڤا کوردستانێ تەڤگەرا کرینێ گەلەک کێم بوویە. ژ بەر بلندبوونا بوهایێ کەلووپەلان گەلەک جاران وەلەتی دەستڤالا ڤەدگەرن مالێ و نەشێن چ تشتەکێ ژ بۆ خوە بکرن. پرانیا وەلاتیان گازندان ژ نەبوونا چاڤدێریێ دکەن و دبێژن ھەر فرۆشیارەک کەرەستەیان ب نرخەکێ جودا دفرۆشیت.

هەرچەند کو گەلەک کەرەستە و پێدڤیێن رۆژانە ژ ناڤخۆیێ سووریێ دەرباسی ھەرێمێن رۆژئاڤا دبن، لێ نرخێ وان بلندە. فرۆشیار دەربارێ ڤێ یەکێ دا دبێژن، دەستێ وان د بلندبوونا بوهایێ کەلووپەلان دا نینە. لێ ژ بەر سەپاندنا باجەیێ ل سەر ڤەگوھەستنا کەلووپەلان، ئەو نەچار دبن نرخان زێدە بکەن. خەلکێ رۆژاڤایێ کوردستانێ کو ب پرانیا خوە کارکەر و فەرمانبەرن دبێژن، بارێ وان گەلەکی گران بوویە و ئەگەر رەوش ب ڤی رەنگی بمینە، پێلا کۆچبەریێ جارەکە دی دێ دەست پێ کەت.