سه‌رۆك وه‌زیرێ ئیراقا فه‌ده‌رال سوبه رۆژا پێنجشه‌مبێ دێ سه‌ره‌دانا هه‌رێما باشوورێ كوردستانێ كه‌ت، تێ پێشبینی كرن ل گه‌ل مه‌سعوود بارزانی سه‌رۆكێ پارتیا ده‌مۆكراتا كوردستانێ و رایه‌دارێن حكوومه‌تێ بجڤیت.
چاڤكانیێن پێگه‌ها «داركا مازی» ل به‌غدا یا پایته‌ختا ئیراقێ ئه‌شكه‌ره كر، وه‌ها تێ پێشبینی كرن سوبه رۆژا پێنجشه‌مبێ 10/9/2020ێ، مسته‌فا كازمی سه‌رۆك وه‌زیرێ ئیراقا فه‌ده‌رال، سه‌رۆكاتییا شانده‌كێ ئاست به‌رز ژ بۆ هه‌رێما باشوورێ كوردستانێ بكه‌ت، ئه‌ڤ سه‌ره‌دان دێ نێزی دوو رۆژان به‌رده‌وام بیت.
ده‌ست نیشان كر، مسته‌فا كازمێ دێ سه‌ره‌دانا هه‌ر یێك ژ هه‌ولێرا پایته‌ختا باشوورێ كوردستانێ، پارێزگه‌هێن دهۆكێ و سلێمانیێ بكه‌ت.
پێگه‌ها «داركا مازی» زانیاریێن هه‌ری تایبه‌ت ل ده‌ربارا ڤێ سه‌ره‌دانا سه‌رۆك وه‌زیرێ ئیراقێ و جڤینێن كو دێ ل باشوورێ كوردستانێ هێنه كرن ب ده‌ست خستن و یه‌كه‌م جڤینا كازمی دێ ل گه‌ل مه‌سعوود بارزانی سه‌رۆكێ پارتییا ده‌مۆكراتا كوردستانێ بیت، هه‌روه‌ها ل گه‌ل سه‌رۆكاتییا هه‌رێما باشوور و سه‌رۆكاتییا وه‌زیران دێ جڤین هه‌بن.
تێ زانین ئه‌ڤ سه‌ره‌دانا مسته‌فا كازمی ژ بۆ هه‌رێما باشوورێ كوردستانێ، پاش سه‌ره‌دانا چه‌ندین جاران یا شاندا حكوومه‌تا باشوور ژ بۆ به‌غدایێ دهێت كو ئه‌ڤ ده‌ما پێتری دوو مه‌هانه دانوستاندنێن چاره‌سه‌ر كرنا پرسگرێكێن ل نێڤبه‌را هه‌ولێر و به‌غدایێ ده‌ست پێ كرنه.
ل ڤێ داویێ د سه‌ره‌دانا مسته‌فا كازمی یا ئه‌مه‌ریكایێ ژی دا كو نوونه‌رێ هه‌رێما باشوورێ كوردستانێ ژی د گه‌ل دا بوو، كریزێن ل نێڤبه‌را هه‌ولێر و به‌غدایێ ب تایبه‌ت یێن ل ده‌ربارا بودجه‌یا گشتی یا وه‌لات و مافێن دارایی یێن هه‌رێما باشوورێ كوردستانێ، هاتبوون دانوستاندن كرن، ئه‌مه‌ریكایێ رۆله‌كا مه‌زن د لهه‌ڤنێزیكرنا هه‌ردو ئالییان دا هه‌بوو.
