په‌ڤچوونێن ل نێڤبه‌را پارتییا كاركه‌رێن كوردستانێ و ئارته‌شا تركیێ ده‌وام دكن، ل باكورێ كوردستانێ ئیرۆ سێ گه‌ریلا جانێ خوه ژ ده‌ست دانه، ل باشوور ژی عه‌سكه‌ره‌ك ترك تێ كوشتن.
ل گۆر چاڤكانیێن پێگه‌ها داركا مازی ل باكورێ كوردستانێ، ئیرۆ ئارته‌شا تركیێ وهێزێن جه‌ندرمه‌یان ل سینۆرێ شرنه‌خێ ئۆپه‌راسیۆنا ب ناڤێ یلدرم-11 دانه مه‌شاندن و د ئه‌نجامێ ده، 3 گه‌ریلا جانێ خوه ژ ده‌ست دانه.
ل همبه‌ر ناڤه‌ندا راگهاندن و چاپه‌مه‌نیێ یا هه‌په‌گێ بالێ له‌شكری یێ په‌كه‌كێ ب داخویانییه‌ك نڤیسكی ئه‌شكه‌ره كر كو وان ل ناڤچه‌یا حه‌فته‌نینێ یا باشوورێ كوردستانێ عه‌سكه‌ره‌ك ترك جه‌زا كرییه.
هه‌په‌گێ د داخویانییا خوه ده گۆت كو ئه‌ڤ عه‌سكه‌ر ل حه‌فته‌نینێ ل رۆژا 12 ئیلۆنا ئیسالێ ژ بال گه‌ریلایان ڤه هاتییه هه‌ده‌ف كرن و كوشتن.
ئارته‌شا تركیێ دوهـ رۆژا شه‌می ئاماره‌كه نوو ئا زرارێن په‌كه‌كێ ل باكور و رۆژئاڤا كوردستانێ راگهاند و ل گۆر وێ ئامارێ، د ده‌ما 10 رۆژێن رابووری ده، 23 گه‌ریلا و شه‌رڤانان جانێ خوه ژ ده‌ست داییه، لێ به‌لێ هه‌په‌گێ تو ئاگاهی ل ده‌ربارا ڤێ داخویانیێ پارڤه نه‌كرن.
هه‌ر یێك ژ ئارته‌شا تركیێ و پارتییا كاركه‌رێن كوردستانێ ل ناڤبه‌را چه‌ند رۆژا ئامارێن زرارێن جانی یێن هه‌ڤ پارڤه دكن، لێ به‌لێ ئه‌ڤ ئامار ژ بال تو ئالیێن دن ڤه نایێن پشت راست كرن، له‌وما دبه ئه‌ڤ به‌شه‌ك به ژ وێ جه‌نگا راگهاندنێ كو ئه‌و ل دژی هه‌ڤ ددن مه‌شاندن.
