هه‌گه‌ر په‌كه‌كه نه‌بایه، نها ده‌مه‌ك پر درێژبوو ئالیێن رۆژئاڤا گه‌هشتبان رێككه‌فتنێ
رۆژئاڤا كوردستانێ هه‌تا نها نه‌شیاییه ب ئه‌گه‌را په‌كه‌كێ ببیته خودان لێڤه‌گه‌ره‌ك سیاسی كوو نوونه‌راتییا وێ د چاره‌سه‌رییا سیاسییا سووریێ دا بكه‌ت، به‌لكو په‌كه‌كه بوویه مه‌زنترین ئاسته‌نگ ل همبه‌ر دانوستاندنێن ئه‌نه‌كه‌سێ و رێڤه‌به‌رییا خوه‌سه‌ر كو ژ نیسانا ئیسالێ ده‌ستپێكرنه.
د ڤێ ده‌ربارێ دا، رێكخه‌رێ ته‌ڤگه‌را چاكسازییا كورد و ئه‌ندامێ ده‌سته‌یا سه‌رۆكاتییا ئه‌نه‌كه‌سێ فه‌یسه‌ل یووسف ژ بۆ پێگه‌ها «ئه‌لعه‌ره‌بی جه‌دید» دبێژیت: دانوستاندنێن نێڤبه‌را پارتیێن د ناڤا رێڤه‌به‌رییا خوه‌سه‌ر دا و ل پێشییا وان پارتییا یه‌كێتییا ده‌مۆكراتیك په‌یه‌دێ و پارتیێن د ناڤا ئه‌نجوومه‌نا نشتیمانییا كوردی دا وه‌ك پلان ژبۆ هاتییه دانا به‌رده‌وامن و ئه‌مه‌ریكا سه‌رپه‌رشتیێ لێ دكه‌ت، تشتا كو نها تێ كرن نرخاندنا به‌ندا دوویه‌مینه ژ لهه‌ڤهاتنا دهۆكێ كو ئه‌و ژی هه‌ڤبه‌شییا د ناڤا رێڤه‌به‌رییا خوه‌سه‌ر دا یه.
ئالیێن رۆژئاڤا لهه‌ڤهاتنا دهۆكێ یا 2014ێ ب بنگه‌هـ وه‌رگرتنه
قۆناغا یه‌كه‌مین یا نیقاشێن لهه‌ڤهاتنا ئالیێن رۆژئاڤا كوردستانێ كو مه‌زلووم عه‌بدی فه‌رماندارێ هه‌سه‌دێ بانگ ژ بۆ كری، ل مه‌ها نیسانا ئیسالێ ده‌ستپێكرنه و هه‌یا 17 خزیرانێ ده‌وام كرن، ئه‌ڤ قۆناغ ب سه‌ركه‌تی هات هه‌ژمارتن، ئالیێن رۆژئاڤا لهه‌ڤهاتنا دهۆكێ ب بنگه‌هـ وه‌رگرتن، ئه‌و لهه‌ڤهاتنا ل ده‌ما خوه مه‌سعوود بارزانی سه‌رۆكێ پارتییا ده‌مۆكرات ئا كوردستانی سه‌رپه‌رشتی كری.
د لهه‌ڤهاتنا دهۆكێ دا، خالا سه‌ره‌كی ئه‌ڤ بوو كو لێڤه‌گه‌ره‌ك سیاسی ژ بۆ رۆژئاڤا بهێته ئاڤاكرن، هه‌موو ئالییان تێدا بن و ئه‌ركا وێ دانانا ستراتیژییا گشتی و یه‌كهه‌لوه‌ستی بیت، هه‌موه‌خت چێكرنا هه‌ڤبه‌شیێ د ریڤه‌به‌رییا خوه‌سه‌ر دا و ته‌ڤلی كرنا هه‌موو پێكهاته‌یێن رۆژئاڤا د حوكمرانیێ دا.
لێ به‌لێ وها دیاره كو گه‌له‌ك ئاسته‌نگی كه‌تنه پێشییا دانوستاندنێن نێڤبه‌را ئه‌نه‌كه‌سێ كو ب به‌شه‌ك ژ ئۆپۆزسیۆنا سووریێ تێ هه‌ژمار كرن و پارتییا یه‌كێتییا ده‌مۆكراتیك ئه‌وا ب بالێ په‌كه‌كێ یێ رۆژئاڤا كوردستانێ تێ هه‌ژمار كرن.
بۆ تێكبرنا دانوستاندنان په‌كه‌كێ كادرۆیێن خوه درێڤه‌به‌رییا خوه‌سه‌ر ده چاندنه
د ڤێ ده‌ربارێ دا، عیماد به‌رهۆ ئه‌ندامێ ئه‌نه‌كه‌سێ ل پێنجشه‌مییا رابووری ژ بۆ پێگه‌ها «باسنیۆز» گۆتبوو كو په‌كه‌كه و ئالیێن گرێدای وێ، نها ته‌نێ ئاسته‌نگییان ژ بۆی دانوستاندنان چێدكن و هه‌گه‌ر په‌كه‌كه نه‌بایه، نها ئالیێن رۆژئاڤا به‌ریا چه‌ندین سالان گه‌هشتبان رێككه‌فتنێ.
ناڤبووری هه‌روه‌ها ده‌ست نیشان كر، لێ د سه‌ر ئاسته‌نگیێن په‌كه‌كێ را، ئالیێن دانوستا‌ندكار گه‌هشتنه رێككه‌فتنا داویێ و ئه‌ڤ رێككه‌فتن دێ چاره‌سه‌رییان ژبۆ مه‌له‌فێن سیاسی، له‌شكری و ئیداری ده‌ست نیشان بكه‌ت.
لێ به‌لێ هنه‌ك چاڤكانیێن خوه‌جهی یێن باژارێ حه‌سه‌كێ كو ناڤێ خوه ئه‌شكه‌ره نه‌كرنه ژ بۆ پێگه‌ها «ئه‌لعه‌ره‌بی جه‌دید» گۆتنه كو رێڤه‌به‌رییا قه‌ندیلێ ژ مێژیه كادرۆیێن خوه د ناڤا رێخستن و رێڤه‌به‌رییا خوه‌سه‌ر دا چاندنه، ئه‌ڤ كادرۆیێن په‌كه‌كێ پرانی ژێ ئالیگرێن پێكهاته‌یا عه‌له‌وی نه و گرێدای ره‌ژیما سووریێ و ئیرانێ نه و كارێ وان ته‌نێ چێكرنا پرسگرێك و كریزانه ژ بۆ كو رێككه‌فتنا داویێ یا ئالیێن رۆژئاڤا بهێته پاشخستن.
وان چاڤكانییان گۆت كو رێڤه‌به‌رییا قه‌ندیلێ ده‌ست ل گه‌ل ره‌ژیما سووریێ هه‌یه و ئه‌و دخوازه ره‌ژیما سووریێ ل سه‌ر ده‌ستهلاتێ بمینه ژ بۆ كو به‌رژه‌وه‌ندیێن وان نه‌هێن تێك برن، چونكه هه‌گه‌ر رێككه‌فتنا كوردی چێبوو و لێڤه‌گه‌را كوردی هات ئاڤاكرن، ل وێ ده‌مێ تو رۆله‌كا په‌كه‌كێ ل رۆژئاڤا كوردستانێ نامینه.
چاڤكانیێن حه‌سه‌كێ ئاگاهی دان كو مه‌زلووم عه‌بدی نها كار ژ بۆ بێ باندۆر كرنا په‌كه‌كێ ل رۆژئاڤا كوردستانێ دكه‌ت و ئه‌مه‌ریكا ژ بۆ ڤێ مه‌به‌ستێ پشتگریێ دده‌ته مه‌زلووم، هه‌ر ئه‌ڤ ژی سه‌ده‌ما سه‌ره‌كی ئا تووره‌بوونا رێڤه‌به‌رییا قه‌ندیلێ یه ژ مه‌زلووم عه‌بدی.
پارتییا كاركه‌رێن كوردستانێ، دخوازه ل جیێ لهه‌ڤهاتنا ئه‌نه‌كه‌سێ و رێڤه‌به‌رییا خوه‌سه‌ر، لهه‌ڤهاتنا رێڤه‌به‌رییا خوه‌سه‌ر ل گه‌ل پارتییا ئیراده یا قه‌دری جه‌میل كو پارتییه‌كا ب فكرا لینینی ماركسی یه و ل ڤێ مه‌هێ ل مۆسكۆیێ هاتبوو ئیمزا كرن، ببیته بنگه‌ها چاره‌سه‌ریێ.
