مالباته‌كه سێ كه‌سی یا كورد دایك، باب و كه‌چ كو ل به‌غدایێ ژیان دكر، ب ئاوایه‌كی هه‌ری هۆڤ هاتنه كوشتن، بوویه‌ر ل شه‌ڤا ده‌رباسبوویی چێبوویه و ئه‌ڤ مالبات هاتنه سه‌ربرین.
هه‌ر یێك ژ «شیلان دارا ره‌ئووف، دارا ره‌ئووف بابێ وێ و عالیا ره‌شید» دایكا شیلانێ، ل شه‌ڤا ده‌رباسبووی ل تاخا مه‌نسوور یا رۆژئاڤا به‌غدایێ ب ئاوایه‌كی هه‌ری هۆڤ ژ بال هنه‌ك چه‌كدارێن نه‌ناس كری ڤه هاتنه كوشت كو سه‌رێن وان هاتنه برین.
چاڤكانیێن ئه‌وله‌هیێ ئه‌شكه‌ره كرنه كو هنه‌ك چه‌كدارێن نه‌ناس كری ب سه‌ر مال شیلانێ دا گرتنه و پاش كو ده‌ستدرێژی ل سه‌ر كری، تاوان ئه‌نجام داییه.
تێ زانین شیلان ده‌رمانساز بوو ل به‌شا په‌نجه‌شێری یا كۆمه‌لگه‌ها پزیشكی یا به‌غدایێ، چاڤكانیێن ئه‌وله‌هیێ ژی ل سه‌ر ڤێ تاوانا هۆڤ گۆتنه كو ئه‌ڤ بوویه‌ر نه ته‌رۆریستی بوو، به‌لكو ل سه‌ر دزیێ چێبوویه.
ل گۆر پێگه‌ها كوردستان 24، ئه‌ڤ مالبات ب نیاز بوو مالا خوه ڤه‌گوهێزن باژارێ سلێمانیێ، لێ به‌لێ قه‌ده‌رێ نه‌هشت و نها جه‌سه‌دێن وان دێ ژ بۆ سلێمانیێ وه‌رن ڤه‌گوهاستن.
تێ زانین ژ داوییا سالا رابووری و ئیسالێ ژی، هه‌ژماره‌كه تاوانێن هۆڤ ل به‌غدا یا پایته‌ختا ئیراقێ چێبوونه، چه‌ندین نۆژدار و چالاكڤانێن دیار یێن ژن هاتنه ته‌رۆر كرن.
تاخا مه‌نسوور یا رۆژئاڤا به‌غدایێ، ب جیه‌كێ هه‌ری ئێمن تێ ناس كرن، له‌وما كه‌سوكارێن مالباتا شیلانێ دبێژن كو ئه‌ڤ تاوان كاره‌كێ ته‌رۆری یه ل دژی شێنیێن كورد یێن به‌غدایێ.
