ئەندامەکی پۆلیتبورۆیا پارتیا دەمۆکراتا کورد ل سووریێ (پەدەکەسێ) راگھاند، نوونەرێ ئەمریکایێ تایبەت بۆ کارووبارێن سووریێ جێمس جێفری دێ سەردانا رۆژئاڤایێ کوردستانێ کەت و لێڤەگەرا سیاسی د ناڤبەرا ENKSێ و PYNKێ د بن چاڤدێریا وی دا دێ هێتە راگەھاندن.
ئەندامێ پۆلیتبوریا پەدەکەسێ نەشئەت زازا ل سەر دوماهیک پێشھاتێن دیالۆگا کوردی یا د ناڤبەرا ئەنجوومەنا نشتمانی یا کوردی ل سووریێ (ئەنەکەسێ) و پارتیێن یەکتیا نشتمانییا کوردی (پەیەنەکێ) دیار کر، قۆناخا دویەما دانووستاندنان بەر ب دوماهیێ ڤە دچیت.
دیار کر ژی، ھندەک پرسێن قۆناخا سێیەمین ژی گەنگەشە ل سەر وان چێبوونە و لھەڤکرن ل سەر چێ بوونە. لێ ژ بۆ پرسا سەرەکە یا قۆناغا چارەم کو پرسا لەشکەری یە، حەتا نھا چ نێزیکاتی ژ بۆ چێنەبوونە.
نەشئەت زازا: لھەڤکرنەکا باش د پرسا لێڤەگەرا سیاسی دا ھەیە. لێ ھندەک پرسگرێک د وێ پرسێ دا ھەنە، مە پشتگوهـ خستنە، ژ بەر کو ئەم ناخوازین ئەو پرسگرێک ببنە سەدەم کو دلێ خەلکێ مە پێ نەخوەش بیت.”
ھەروھا گۆت: ٢ کێشەیێن سەرەکی د پرسا لێڤەگەرا سیاسی دا ھەبوون. یەک ژ وێ پرسا رێژەیا نوونەراتیا ھەر لایەنەکی، لێ ئەو چارەسەر بوون. لێ پرسگرێکا مای، پرسا گرێبەستا جڤاکی (دەستوور)ە. ئەم دخوازین پێداچوونەک د وێ دەستوورێ دا بهێتە کرن، لێ ھندەک پرسگرێک دەردکەڤن. ھەروھا د پرسا رێڤەبەریێ دا ژی ھندەک تێبینی ھەنە، مە ئەو تێبینی ژی پشتگوهـ ڤە خستنە.
نەشەت زازا ئاشکرا کر: ئەم دشیین ببێژین ل سەر پرسا لێڤەگەرا سیاسی، لھەڤکرنەکا دەمکی ھەیە. د دو رۆژێن بهێت دا دشیین ببێژین ئەم دێ ژێ خەلاس بین. دخوازم گەلێ مە دلخوەش بکەم کو نوونەرێ ئەمریکایێ تایبەت بۆ کارووبارێن سووریێ جیمس جیفری دێ سەرەدانا رۆژئاڤایێ کوردستانێ کەت. دبیت د بن چاڤدێریا وی دا لێڤەگەرا سیاسی بهێتە راگھاندن.
