ل جۆلەمێرگێ د ناڤبەرا پەکەکێ و لەشکەرێن ترکیێ دا شەر دەرکەت

ل جۆلەمێرگێ د ناڤبەرا پەکەکێ و لەشکەرێن ترکیێ دا شەر دەرکەت

وەزارەتا ناڤخوەیا ترکیێ راگھاند کو، ل گوندەوارێن جۆلەمەرگێ د ئێریشەکا ھێزێن وان دا 2 گەریلایێن پەکەکێ جانێ خوە ژ دەست دانە. ھەپەگێ ژی بەلاڤ کریە د شەر و پەڤچوونێن ل جھێن جیاواز دا “5 ژێ خوەدی پلە گەلەک سەربازێن ترکیێ ھاتنە کوشتن.”

ل گۆر داخویانیا وەزارەتا ناڤخوەیا ترکیێ، د چارچۆڤەیا ئۆپەراسیۆنا جیلۆ دا، ل گوندەوارێن پارێزگەھا جۆلەمەرگا باکورێ کوردستانێ، د ئێریشەکا ھێزێن وان یێن ب سەر فەرمانداریا جەندرمەیان و ھێزێن ئەولەکاریێ ب پشتگریا ئەسمانی، ٢ گەریلایێن پەکەکێ جانێ خوە ژ دەست دانە.

لێ ھەتا نھا ژ ئالیێ پەکەکێ ڤە دەربارێ ئۆپەراسیۆنا ناڤبۆری دا هیچ داخویانیەک نەھاتیە دایین.

ھەر ل گۆر داخویانیەکا وەزارەتا بەرەڤانیا ترکیێ، رۆژا پێنجشەما بۆری 17ئیلۆنێ، د ئێریشەکا گەریلایێن پەکەکێ دا ل سەر بنکەیەکا ھێزێن وان ل ناڤچەیا حەفتەنینا ھەرێما کوردستانێ، 2 سەرباز ھاتنە کوشتن.

ھێزێن پاراستنا گەل (ھەپەگە) کو باسکێ چەکدارییێ پەکەکێ یە دەربارێ شەر و پەڤچوونێن ل گەل ئارتێشا ترکیێ ل ھەرێمێن جودا دخویانیەک بەلاڤ کر.

ھەپەگێ ئاشکرا کریە کو رۆژا 15ێ ئیلۆنێ گەریلایێن وان ل “گرێ شەھید شیلانا قادا کارتالێ”یا حەفتەنینێ بنکەیێن ترکیێ کرنە ئارمانج و “ل ڤی گری چەپەرەکا کو لەشکەر تێ دابوون ھاتە ژناڤبرن. ھەژمارا لەشکەرێن مری و بریندار نەھاتە زانین.” ھەپەگێ بەلاڤ کریە کو رۆژا 17ێ ئیلۆنێ ژی ھێزێن وان ل حەفتەنینێ ئێرشەک برنە سەر لەشکەرێن ترکیێ و د ئەنجامێ دە 5 لەشکەر ھاتن کوشتن و 3 لەشکەر بریندار بوون.

ل گۆر داخویانیا ھەپەگێ 17ێ ئیلۆنێ د ئێرشا گەریلایێن وان دا ل چەلێ یا جۆلەمێرگێ 3 لەشکەر، 11ێ ئیلۆنێ ل ئەلکێجیا شرنەخێ 5 ژێ ب پلە گەلەک لەشکەر ھاتنە کوشتن.

ھەروھا ھەپەگێ راگەھاند کو 5ێ ئیلۆنێ ل شاخا وانێ د ئێرشەکا لەشکەرێن ترکیێ دا گەریلایێن ب ناڤێن “عەگید و مەزلووم” جانێ خوە ژ دەست دانە و ھاتیە گۆتن کو زانیاریێن زێدەتر ل سەر ناسناما وان گەریلایان دێ پاشێ هێنە بەلاڤکرن.

ھەپەگێ دەربارێ شەرێ ل قادا گوندێ بانێ یا ل ھەرێما چیایێ گابارا شرنەخێ کو 30ێ تیرمەھێ پێک ھاتبوو داخویانی دا و ئاشکرا کر کو د وی شەری دا گەریلایێ ب ناڤێ ئەمین تورھان ب ناسناڤ بۆتان ھەزەخ جانێ خوە ژ دەست دایە.

پوستێن ھەمان بەش