د هەلیکۆپتەرێ دا هاتنە هاڤێتن و رەوشا وان گەلەک خرابە

د هەلیکۆپتەرێ دا هاتنە هاڤێتن و رەوشا وان گەلەک خرابە

ل باکورێ کوردستانێ و ل ناڤچەیا شاخێ عەسکەران دو هەموەلاتیێن کورد هاتنە بنچاڤکرن و ئیشکەنجەدان پاشێ ئەو ژ هەلیکۆپتەرێ دا هاتنە هاڤێتن. برایێ شیبان، جەنگیز شیبان دیار کر کو رۆژا بوویەر قەومی ئەو ل گوندێ خوە بوون و عەسکەران گەفێن کوشتنێ ل وان کرنە.

ل ناڤچەیا شاخێ یا باژارێ وانێ ل باکورێ کوردستانێ عەسکەرێن دەولەتا ترک کو دەرکەتبوون ئۆپەراسیۆنێ د 11ێ ئیلۆنێ دا عۆسمان شیبانێ 50 سالی، بابێ ٨ زارۆکان و سەرڤەت توورگووتێ 55 سالی بابێ 7 زارۆکان بنچاڤ کربوو. ژ بەرکو عەسکەران ئەو دو هەموەلاتی گەلەک ئیشکەنجە دانە، وان دبەنە بەشا چاڤدێرییا چر و تێن دەرمانکرن. عۆسمان شیبان دوھی ژ نەخوەشخانەیێ ھاتبوو دەرئێخستن و د راپۆرتا شیبان دا ھاتە دەستنیشانکرن کو ئەو د ھەلیکۆپتێرێ دا ھاتنە هاڤێتن.

پشتی بەلاڤبوونا وێنەیێن ڤان دو هەموەلاتیێن کورد ل باکورێ کوردستانێ د سۆسیال میدیایێ دا کو عەسکەرێن دەولەتا ترکیێ ئەو گەلەک ئێشکەنجە دانە و پاشێ ژ ھەلیکۆپتێرێ ھاتنە ‌هاڤێتن د رۆژەڤێ دا جھ گرتن. پارێزەران ژ بەر ئێشکەنجەدانا وان گلی کرن.

وێنەیێ عۆسمان شیبانێ ئێشکەنجە لێ ھاتبوو کرن پشتی رۆژا کو وێنەیێ وی بەلاڤبووی د رایا گشتی دا بوو جھێ نەرازیبوونێ. ھەر وەھا پشتی وێنە د راپۆرا نەخوەشخانەیێ دا ھاتە دیارکرن کو ئەو ژ ھەلیکۆپتێرێ ھاتیە هاڤێتن و سەر و چاڤ لێ رەش و شین کرنە. هات زانین کو هەرچەند ڤان ولاتیان دەستیر ژ رایەدارێن دەولەتێ وەرگرتیە ژ بۆ کو بچنە گوندێن خوە و کارێ چاندنیێ بکەن و دەستیری ب وان هاتیە دان و ب وان هاتی راگەهاندن تەنگاسی نینە و چوونا گوندی سەربەستە لێ دەما کو چوویە گوندی، ئۆپەراسیۆنا عەسکەران ل دژی پەکەکێ دەستپێکر و ئەو ب سوچا هاریکارییا پەکەکێ هاتنە بنچاڤکرن.

رەوشا هەر ئێک ژ ڤان دو هەموەلاتییان نها نەجێگیرە و د رەوشەکا خراب دانە.

گوندێن ڤان هەموەلاتیێن کورد ل سالێن 90ێ ژ بەر پەڤچوونێن دناڤبەرا پەکەکێ و دەولەتا ترکیێ دا هاتینە ڤالاکرن و هیچ کەسەک ل وان گوندان نەمایە، د نها دا خەلکێ گوند ب ستاندنا دەستیریێ ژ رایەدارێن ئەسکەری یێن ترکیێ سەرەدانا گوندێن خوە دکەن ژ بۆ کارێ چاندنیێ لێ بەلێ گەلەک جاران ئەو راستی پرسگرێکێن ب ڤی رەنگی دهێن و ژیان ل وان دبیتە جەهەنەم.