ھێزێن ئەولەھیێ یێن ل ناڤ کامپا ھۆلێ یا ل رۆژئاڤایێ کوردستانێ، ٧٠٠ جاران ھەولا رەڤێ یا ژنێن داعشێ ب ھەڤکاریا دەرڤە، تێک برنە.
بەردەڤکێ ھێزێن ئەولەھیا ناڤخوە یا ل رێڤەبەریا خوەسەر عەلی حەسەن ئیرۆ ب داخویانیەکێ راگەھاند: “ژ مەھا ئادارا بۆری حەتا نھا، مالباتێن داعشێ ٧٠٠ جاران ھەول دانە ژ کامپێ برەڤن.”
ناڤبووری سەدەما ڤێ یەکێ ژی ژ بۆ ” ھاتنا ترکیێ بۆ رۆژھلاتێ فەراتێ و داگرکرنا ھەردو باژارۆکێن سەرێ کانیێیێ ھەسەکێ و گرێ سپییێ رەقایێ” زڤراند.
ھەروھا راگهاند: “پشتی ئێریشێن ترکیێ ھەولدان زێدە بوونە و ئەم شیاینە گەلەک ھەولێن رەڤێ یێن ژنێن ھەڤژینێن کەسێن گومانبارێن داعشێ ل گەل زارۆکێن وان تێک ببەین.” وەکی دی دەستنیشان کر: “پرانیا لێکۆلین ئاماژە ب وێ چەندێ دکەن کو نیەتا وان ژنان، چوونا بەر ب ترکیێ بوویە و دانپێدان کرنە کو دخوازن بچن دەڤەرێن ل بن دەستھلاتا چەکدارێن سەر ب ترکیێ ڤە، وەکە جەرابلوس و بابێ و پشترە بچن ترکیێ و ژ ور ژی بەر ب وەلاتێن خوە.”
عەلی حەسەن ئاشکرا دکەت: “ھێزێن ئەولەھیێ کارینە ب رێژەیەکا بلند وان ھەولدانان تێک ببەن. د ئەنجاما لێکۆلین و پشکنینێن ھوورگلی دا ژ لایێ ھێزێن زیرەڤانێن کامپێ ڤە، ئەم شییاینە شانەیێن بەرپرس و چاڤکانیێن پەیوەندیێن وان ئاشکرا بکەین و مە نێزیکی ١٠٠ کەس دەستەسەر کرنە، کو بەشداری ھەولدانێن رەڤاندنا ژن و زارۆکێن داعشێ بوونە و مە ئەو رادەستی دادگەھێن تایبەتێن تاوانا هاریکاریا کارێ رەڤاندنێ کرنە.”
حەسەن ل سەر چاوانیا ھەولدانێن رەڤێ ژی گۆت: “ترۆمبێلێن بارھلگرێن رێخستنێن ناڤدەولەتی و ناڤخوەیی دەرباسی ناڤا کامپێ دبن و جار جاران شۆفێرێن وەساییتان ل بەرامبەر ھندەک پارەیان لگەل گرووپەکێ دەرڤە هاریکار دبن و پشتی دەرخستنا وان ژنان پارەیان وەردگرن، ژ بۆ ڤێ چەندێ ژی جھێن ڤەشارتنێ و نەپەنی ژ بۆ رەڤاندنا وان، ئامادە دکەن.”
بەردەڤکێ ھێزێن ئەولەھیا ناڤخوە عەلی حەسەن دیار دکەت کو ھێزێن ئەولەھیێ یێن سەر ب رێڤەبەریا خوەسەر، خالێن چاڤدێریێ و پشکنینێ زێدە کرنە و ب ئاوایەکی بەردەوام تیمێن گەرۆک ب سەر ھەموو دەریان دا دگەرن.
