په‌كه‌كه‌: «ئه‌ز یان پشتی من بلا تۆفان رابیت»

په‌كه‌كه‌: «ئه‌ز یان پشتی من بلا تۆفان رابیت»

پارتییا كاركه‌رێن كوردستانێ، ده‌ست ژ پیلانێن خوه‌ بۆ ژ ناڤ برنا پێڤاژۆیا ئاشتیێ ل رۆژئاڤا كوردستانێ به‌رناده‌، رازی نابیت‌ رۆژئاڤا ب جهـ بهێلیت، ژ به‌ر كو ئه‌و رۆژئاڤا وه‌ك مه‌سه‌له‌یا مان و نه‌مانێ ژ بۆ رێخستنا خوه‌ دبینیت‌، لێ به‌لێ مانا وێ ته‌نێ ژ بۆ یه‌ك ئارمانجێ یه‌، ئه‌و ژی به‌هانه‌یان بده‌ته‌ ده‌ستێ تركیێ كو سیاسه‌تێن خوه‌ یێن قڕكرنێ ل دژی گه‌لێ كورد بدۆمینیت.

پاش ده‌ستپێكرنا گۆتوبێژێن ئاشتیێ ل نێڤبه‌را پارتیێن رۆژئاڤا كوردستانێ، پارتییا یه‌كێتییا ده‌مۆكراتیك په‌یه‌دێ و ئه‌نجوومه‌نا نشتیمانییا كوردی ئه‌نه‌كه‌سێ كو ئه‌مه‌ریكا و باشوورێ كوردستانێ سه‌رپه‌رشتییا ڤێ پێڤاژۆیێ دكه‌ن، ل سه‌ر په‌یه‌دێ هاته‌ فه‌رز كرن كو په‌كه‌كێ ل رۆژئاڤا بێ باندۆر بكه‌ت‌، پشتره‌ ب یه‌ك جار ژ رۆژئاڤا بهێته‌ ده‌رێخستن، لێ به‌لێ په‌كه‌كه‌ ب چ ئاوا رازی نابیت رۆژئاڤا ب بجهـ بهێلیت‌ و ئه‌و دبێژیت: «ئه‌ز یان پشتی من بلا تۆفان رابیت».

جه‌نه‌رال مه‌زلووم عه‌بدی ژ بۆ كو پێڤاژۆیا ئاشتیێ سه‌ربكه‌ڤیت و رۆناهیێ ببینت‌، ل ژێر زه‌ختا ئه‌مه‌ریكایێ هه‌نگاڤێن پر باش ل دژی په‌كه‌كێ ل رۆژئاڤا هاڤێتن و د یه‌كه‌م هه‌نگاڤ دا‌، سه‌بری ئۆك رێڤه‌به‌رێ ئیستخباراتا په‌كه‌كێ ل رۆژئاڤا ده‌رێخست و ناچار كر ڤه‌گه‌ریته‌ قه‌ندیلی، ل گه‌ل لهه‌ڤهاتنا ل گه‌ل كۆمپانیێ ئه‌مه‌ریكی یێن په‌ترۆلێ و جڤینێن ل گه‌ل ئه‌نه‌كه‌سێ، ئه‌ڤان هه‌نگاڤان رێڤه‌به‌رییا قه‌ندیلی دلگران كر و هه‌ر ئه‌ڤه‌ بوو سه‌ده‌م كو په‌كه‌كێ پیلانێن خوه‌ یێن ل دژی مه‌زلووم و ژ ناڤ برنا پێڤاژۆیا رۆژئاڤا بهێزتر بكه‌ت‌.

ل ده‌ما برێڤه‌چوونا نیقاشێن پارتیێن رۆژئاڤا، ب فه‌رمانا جه‌میل باییك هه‌ژماره‌كا ئێریشان ل رۆژئاڤا هاتن پێكئانین، وه‌ك ئێریشا ل سه‌ر باره‌گه‌ها په‌ده‌كه‌سێ، یا راست په‌كه‌كێ مه‌زلووم ب كاركرنا ل گه‌ل ئه‌مه‌ریكایێ ل دژی په‌كه‌كێ سووچبار كر.

ل ڤێ ده‌ربارێ ده‌ نڤیسكار و رۆژنامه‌ڤان هۆشه‌نگ ئۆسێ دبێژیت: «ژ به‌ر كو كوردێن رۆژئاڤا ب ده‌مارا سه‌ره‌كی یا ژیانێ ژ بۆ رێخستنا په‌كه‌كێ هه‌ر ژ سالێن هه‌شتێیان تێن حه‌ساب كرن، له‌وما په‌كه‌كه‌ ب جهـ هشتنا رۆژئاڤا وه‌ك‌ مه‌سه‌له‌یا مان و نه‌مانا رێخستنێ دبینیت، لێ به‌لێ په‌كه‌كه‌ هه‌ر ل ژێر سلۆگانێن نه‌ته‌وی خوه‌ ل رۆژئاڤا ڤه‌دشێریت، هه‌گه‌ر نه‌ یا راست په‌كه‌كه‌ ته‌نێ ژ بۆ یێك مه‌به‌ستێ ل رۆژئاڤایێ كوردستانێ مایه‌، ئه‌و ژی دانا به‌هانه‌یان ژ بۆ ده‌وله‌تا تركیێ كو داگیركه‌ری و سیاسه‌تا خوه‌ ل دژی گه‌لێ كورد بدۆمینه‌.

ئیسرارا په‌كه‌كێ یا مانێ ل رۆژهلاتا فراتێ ڤێ به‌هانه‌یێ دده‌ته‌ ده‌ستێ تركیێ كو داگیركه‌ری بدۆمه‌، ب گۆتنه‌كا‌ دی دوبار و سێ باره‌كرنا سیناریۆا عه‌فرینێ و وان هه‌موو باژار و باژارۆكێن ب سه‌ده‌ما سیاسه‌تا شاش یا په‌كه‌كێ كه‌تینه‌ ژێر كۆنترۆلا تركیێ.

هۆشه‌نگ ئۆسێ به‌حسا هێزێن سووریایا ده‌مۆكراتیك هه‌سه‌دێ ژی دكه‌ت و دبێژیت: «خوه‌ هه‌سه‌ده‌ ژی نها دخوازیت‌ په‌كه‌كه‌ ب بێ ده‌نگی و بێ شه‌ر رۆژئاڤا بجهـ بهێلیت‌، لێ به‌لێ وا دیاره‌ كو په‌كه‌كه‌ دێ گه‌لێ رۆژئاڤا ناچار بكه‌ت‌ كو چه‌كان ل دژی وێ هه‌لگرن»‌.

هۆشه‌نگ ئۆسێ دبێژیت: «ره‌وش نها ب ڤی ئاوایی یه‌، هه‌ر یێك ژ واشنتۆن، هه‌سه‌ده‌ و لێڤه‌گه‌را كورد ل رۆژئاڤا ژ په‌كه‌كێ دخوازن رۆژئاڤا ب جهـ بهێلیت‌ ژ به‌ر كو رۆلا وێ ل وێرێ نه‌مایه، لێ به‌لێ د به‌رسڤێ ده‌ په‌كه‌كێ ب وان گۆتییه‌: ئه‌ز یان پشتی من بلا تۆفان رابیت»‌.