كۆما جڤاكێن كوردستانێ كه‌جه‌كه، هه‌لوه‌ستا خوه ل ده‌ربارا وان پێڤاژۆیێن بن چاڤ كرنێ راگهاند ئه‌وێن ل رۆژێن رابووری ده‌وله‌تا تركیێ ل دژی رێبه‌رێن پارتییا ده‌مۆكراتیك ئا گه‌لان هه‌ده‌پێ دایه مه‌شاندن، كه‌جه‌كێ به‌یانه‌كه نڤیسكی ل سه‌ر ڤێ مه‌سه‌لێ ده‌رخستییه و تێده ئه‌شكه‌ره ژ ده‌وله‌تا تركیێ خوه‌ستییه هه‌ده‌پێ ژناڤ ببه.
ده‌وله‌تا تركیێ هه‌ر ژ ئاڤابوونا پارتییا ده‌مۆكراتیك یا گه‌لان هه‌ده‌پێ ل سالا 2012ان و هه‌یا رۆژا مه یا ئیرۆ، ڤێ پارتیێ ب كاركرنێ ل ژێر چاڤدێرییا قه‌ندیلێ سووچبار دكه، به‌لكو بێهتر هه‌ر ل ناڤبه‌را چه‌ند مه‌هه‌كان پێڤاژۆیێن بن چاڤ كرنێ ل دژی كادرۆیێن ڤێ پارتیێ ئیلان دكه و ب سووچا په‌كه‌كێ ب ده‌هان پارلمه‌نته‌ر و كادرۆیێن هه‌ده‌پێ خستنه ناڤا زیندان و ل به‌راهییا وان سه‌لاحه‌ددین ده‌میرتاش و فیگه‌ن یۆكسه‌ك یێن هه‌ڤسه‌رۆكێن هه‌ده‌پێ.
هه‌ر چه‌ند كو هه‌ده‌په د ده‌ما چه‌ند سالێن رابووری یێن خه‌باتا خوه ده ل تركیێ هه‌ول دده وه‌كه پارتییه‌كه كوردستانی ل باكورێ كوردستانێ و تركیێ ته‌ڤ بگه‌ره و ره‌د دكه كو پێوه‌ندییا وێ ب په‌كه‌كێ و قه‌ندیلێ ڤه هه‌به، لێ به‌لێ هه‌ركو دچه په‌كه‌كه و رێڤه‌برییا قه‌ندیلێ تێ و ژ بۆ تركیێ ئیسبات دكه كو هه‌ده‌په باسكه‌كی وێ ل باكورێ كوردستانێ، یا راست كه‌جه‌كه ب ڤان داخویانییان به‌هانه‌یان دده ده‌ستێ تركیێ كو پێتر ل په‌ی رێبه‌ر و كادرۆیێن هه‌ده‌پێ بگه‌ره و وان بن چاڤ بكه.
ده‌وله‌تا تركیێ ب سووچا په‌كه‌كێ و پرۆباگندایێ ژ بۆ ڤێ رێخستنێ، ل سالا 2016ان سه‌لاحه‌ددین ده‌میرتاش خسته ناڤا زیندانێ، پشتره و پاش هلبژارتنان، هه‌موو شاره‌داریێن كو د ده‌ست هه‌ده‌پێ ده ژ كار لادان و ل شوونا وان قه‌یوومێن ئاكه‌پێ وه‌زیفه دار كرن، ل پارلمه‌نا تركیێ پارێزمه‌ندی ژ پارلمه‌نته‌رێن هه‌ده‌پێ ستاند، ئانكو ئاكه‌پێ هه‌ده‌په ل هه‌ر ده‌رێ بێ باندۆر كر.
ل ده‌ما هلبژارتنێن تركیێ ل سالا 2015ێ هه‌ده‌پێ كاری بۆ یه‌كه‌م جار ده‌لیڤه‌یا به‌شداریێ د حوكمدارییا تركیێ دا بكه، یا راست ئه‌ڤ یه‌ك ده‌رفه‌ت بوو ژ بۆ كوردێن باكورێ كوردستانێ كو ببن خوه‌دی ده‌ستهلات د ده‌وه‌لتا تركیێ ده، ل وێ ده‌مێ ده‌میرتاش و شاندا هه‌ده‌پێ سه‌ردانا باشوورێ كوردستانێ كر و ل گه‌ل سه‌رۆكێ هه‌رێما باشوور مه‌سعوود بارزانی ل وێ ده‌مێ جڤیان، پشتره وان سه‌ردانا قه‌ندیلێ كر.
ده‌میرتاش و هه‌ده‌پێ ل وێ ده‌مێ نه‌چار مان فه‌رمانا قه‌ندیلێ بجی بكن و بریار گرتن كو ته‌ڤلی حكوومه‌تا تركیێ نه‌بن، وه‌كه تۆلهلدانه‌ك تركیێ و پارتییا ده‌ستهه‌لاتدار ئاكه‌پێ بریارا گرت كو هلبژارتن وه‌رن دوباره كرن، پشتره ده‌میرتاش، پارلمه‌نته‌ر و كادرۆیێن هه‌ده‌پێ خستنه ناڤا زیندانان ده، ب گۆتنه‌كه دن په‌كه‌كێ به‌رێ ده‌میرتاش دا زیندانێ.
ل رۆژێن ده‌رباسبوویی ژی وه‌ختا كو تركیێ پێڤاژۆییا بن چاڤ كرنا كادرۆیێن هه‌ده‌پێ ده‌ستپێكری، كه‌جه‌كێ د به‌رسڤێ ده و دوهـ رۆژا یه‌كشه‌می 27/9/2020ان جاره‌كه دن ب داخویانییه‌كه نڤیسكی ئاكه‌په ره‌خنه كر، یا راست كه‌جه‌كێ یه‌ك ئامانج و مه‌به‌ست ژ ڤێ داخویانیێ هه‌یه، ئه‌و ژی ئه‌ڤه كو ببێژه تركیێ هه‌ده‌په باسكێ په‌كه‌كێ یه ل باكورێ كوردستانێ و تركیێ، تركیه ژی ب ڤێ یه‌كێ وێ شه‌رعیه‌تێ ژ بۆ پێڤاژۆیێن خوه یێن بن چاڤ كرنا كادرۆیێن هه‌ده‌پێ ئاڤا بكه.
