وه‌لاتیێ تركیێ د باله‌فرێ دا هاڤێتی مر

وه‌لاتیێ تركیێ د باله‌فرێ دا هاڤێتی مر

سه‌روه‌ت تورگوت، ئه‌و وه‌لاتیێ ل رۆژێن بووری ئارته‌شا تركیێ د باله‌فرێ دا هاڤێتی، ئیرۆ سپێدێ جانێ خوه‌ ژ ده‌ست دا.

سه‌روه‌ت تورگوت، وه‌لاتیێ باژارێ شرنه‌خێ یێ باكورێ كوردستانێ ئیرۆ رۆژا چارشه‌می 30/9/2020ێ جانێ خوه‌ ژ ده‌ست دا، پشتی كو نۆژداران نه‌شیایی خوینبه‌ربوونا وی راوه‌ستینن.

سه‌روه‌ت تورگوت ل ناڤه‌راستا ڤێ مه‌هێ د ئۆپه‌راسیۆنه‌كا ئارته‌شا تركیێ دا، ل دۆربه‌را باژارێ ئه‌لكێ یێ گرێدای شرنه‌خێ ل گه‌ل وه‌لاتییه‌كێ دی ب ناڤێ ئۆسمان شیبان هاتبوو بن چاڤ كرن، پاش سێ رۆژان ژ بێسه‌روشوونبوونا وان، ئه‌و ل نه‌خوه‌شه‌خانه‌یه‌كا وانێ هاتبوو دیتن.

سه‌روه‌ت ب مالباتا خوه‌ گۆتبوو كو ئارته‌شا تركیێ ئه‌و د باله‌فرێ دا هاڤێتییه‌، لێ به‌لێ پارێزگه‌هییا وانێ دبێژیت ل وه‌ختا بن چاڤ كرنا وی، سه‌روه‌ت د زناره‌كا بلند دا كه‌تییه‌.

ل ڤێ ده‌ربارێ دا و ل رۆژێن بووری رێخستنا لێبۆرینا ناڤده‌وله‌تی، ژ ده‌وله‌تا تركیێ خوه‌ست بوو لێكۆلینه‌كا بله‌ز و سه‌ربخوه‌ ل ده‌ربارا بوویه‌رێ ده‌ست پێ بكه‌ن.