ئێریشا ده‌وله‌تا تركیێ یا ل سه‌ر گوندێن باشوورێ كوردستانێ ب ئه‌گه‌را په‌كه‌كێ به‌رده‌وامه و ئیرۆ گونده‌كێ سنۆرێ پارێزگه‌ها دهۆكێ كه‌ت به‌ر مووشه‌كێن باله‌فران.
چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره كر، ئیرۆ رۆژا سێشه‌می 6/10/2020ان، باله‌فرێن جه‌نگ یێن ده‌وله‌تا تركیێ، خالێن په‌كه‌كێ ل ئاقارێ گوندێ بێشیلێ یێ گرێدای ناڤچه‌یا كانی ماسێ ل ده‌ڤه‌را به‌رواری بالا بۆردۆمان كر.
ده‌ست نیشان كر، باله‌فران ل ده‌مژمێر 11:20 به‌ری نیڤرۆژا ئیرۆ، دوو مووشه‌ك ل گه‌لیێ دێرا یێ ئاقارێ گوندێ بێشیلێ دانه.
هه‌ر چه‌ند زیانێن په‌كه‌كێ نه‌هاتینه زانین، لێ به‌لێ ل گۆر دیمه‌نێن بۆردۆمانێ كو ژ بۆ پێگه‌ها مه هاتینه هنارتن، دۆمانه‌كه پر ل جهێ كه‌تنا مووشه‌كا به‌رز بوویه.
پارتییا كاركه‌رێن كوردستانێ و پاش ده‌ستپێكرنا ئێریشا تركیێ ل سه‌ر باشوورێ كوردستانێ كو ل ناڤه‌راستا مه‌ها خزیرانا ئیسالێ بوو، لڤ و ته‌ڤگه‌رێن گه‌ریلایێن خوه نێزیكی گوند و باژارۆكان دكه‌ت، ئه‌ڤ ژی پیلانه‌كه ژ بۆ كو ئه‌ڤ گوند و ناڤچه ببنه مه‌یدانا شه‌ر و ژ وه‌لاتییان بهێنه ڤالا كرن.
خه‌لكێ گوندێن باشوورێ كوردستانێ، ژ په‌كه‌كێ دلگرانن و ئه‌و دخوازن گه‌ریلا نێزیكی گوندێن وان نه‌بن داكو نه‌كه‌ڤنه به‌ر ئێریشان.
