پارتییا كاركه‌رێن كوردستانێ، دانانا بۆمبێن ب ده‌ست چێكری ل سه‌ر رێیا خه‌لكێ سڤیل، كرییه ئاوایه‌كێ نوو یێ ته‌رزێ وێ به‌رخودانا ب ناڤ ل دژی ئارته‌شا تركیێ ل باشوورێ كوردستانێ.
چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره كرن، ل ده‌ما مه‌ها رابووری هێزێن ئه‌وله‌هیێ كارینه ل پتری جهه‌كی بۆمبێن ب ده‌ست چێكری یێن په‌كه‌كێ كو ل سه‌ر رێیا گوندان هاتبوونه دانان ژ ناڤ ببه‌ن، لێ به‌لێ ل هنده‌ك ناڤچه‌یان ژی ئه‌ڤ بۆمبه په‌قینه و زیان گه‌هاندییه خه‌لكێ سڤیل.
ده‌ست نیشان كر، یه‌ك ژ وان بۆمبان كو په‌كه‌كێ ل رۆژا 7/9/2020ێ ل ناڤچه‌یا لێر سماق ل نێزی ناڤچه‌یا كۆپی هاجه‌ر یا گرێدای باژارێ سیده‌كانێ بوو كو ل وی ده‌مێ ب ئۆتۆمبێلا وه‌لاتییه‌كێ سڤیل ڤه په‌قی بوو، لێ به‌لێ ته‌نێ زیان ب ئۆتۆمبێلا وی كه‌تبوون.
ئه‌ڤ كه‌سێ كو بۆمبا په‌كه‌كێ پێڤه په‌قی، ناڤێ وی خۆشه‌ڤی ئیسماعیله، خه‌لكێ گوندێ ئاله‌دوایه و ل خنێره ئاكانجی یه.
پاش ڤێ بوویه‌رێ ب چه‌ند رۆژه‌كان و ب تایبه‌ت ل رۆژا 24 مه‌ها رابووری، پیلانەکا پەکەکێ ل دەڤەرا دۆسکییان راستی شکەستنێ هات، وه‌ختا كو پەکەکێ دوو گوللـه‌یێن ((ئار پی جی)) وه‌كه بۆمب ل به‌ر جاده‌یا گوندێ سه‌یداڤا داناین.
یا راست په‌كه‌كێ ته‌نێ یه‌ك ئارمانج ژ ڤان هه‌نگاڤا هه‌یه، ئه‌و ژی زیان گه‌هاندنه ژ بۆ خه‌لكێ گوندان و ژ بۆ كو ره‌وشه‌كا وه‌ها دروست بكه‌ت كو نه‌ئارامی بكه‌ڤیته گوندێن باشوور، په‌كه‌كه ڤان كارێن كو دچنه د خانه‌یا ته‌رۆرێ دا ب ((چالاكیێن به‌رخودانێ)) ب ناڤ دكه‌ت و ئیدیعا دكه‌ت كو ل دژی له‌شكرێ تركیێ دهێنه ئه‌نجام دان.
