پەکەکە ل شێلادزێ و دێرالۆکێ ھاتن ھەدەف کرن

پەکەکە ل شێلادزێ و دێرالۆکێ ھاتن ھەدەف کرن

بالەفرێن دەولەتا ترکیێ، ئیرۆ حەرەکەتێن پەکەکێ ل باشوورێ کوردستانێ ھەدەف کرن و ئاقارێن دوو گوندان ل سنۆرێ دھۆکێ بۆردۆمان کرن.

چاڤکانیێن پێگەھا دارکا مازی ل باشوورێ کوردستانێ ئەشکەرە کر، ئیرۆ رۆژا ئینی 2020/10/9ان بالەفرێن جەنگ یێن دەولەتا ترکیێ، ئێریشی حەرەکەتا چەکدارێن پەکەکێ ل سینۆرێ ناڤچەیێن دێرالۆکێ و شێلادزێ کر، ھەژمارەکە مووشەکان ل نوقتەیێن وان خستنە.

دەست نیشان کر، بالەفران ل دەمژمێر 1:40ێ پاش نیڤرۆژێ 2 مووشەک ل ئاقارێ گوندێ بێسەپێ یێ گرێدای ناڤچەیا شێلادزێ ل دەڤەرا نێروە رێکان دانە.

ھەروەھا ل دەمژمێر 6:30 ئێڤارێ بالەفران 3 مووشەک ل سەرێ دەرەجا ھێتیتێ ل چیایێ لینکی کو دکەڤیتە ئاقارێ گوندێ ھێتیتا کەڤن ل ناڤچەیا دێرالۆکێ دان.

ھەرچەند کو زرارێن پەکەکێ نەھاتنە زانیـن، لێ بەلێ زرار ب ئاقارێ وان گوندان کەتییە و ترس ل جەم شێنیێن گوندان چێبوویە.

پارتییا کارکەرێن کوردستانێ، ژ دەستپێکا ئێریشا سەر باشوور کو ل ناڤەراستا مەھا خزیرانا ئیسالێ بوو، لڤ و تەڤگەرێن چەکدارێن خوە خستنە ناڤا گوند و نێزی باژارۆکان، ژ بۆ کو ئەڤ گوند ببن مەیدانا شەر و وەرن ڤالا کرن.