ئاژانسا فەرمی یا ترکیێ راگەهاند، تیما ئۆپەراسیۆنێن دەزگەهێ ئیستخباراتی یێ نیشتیمانی یێ ترکیێ “میت”ێ بەرپرسەکی مەزنێ پەکەکێ کو ئێک ژ فەرماندارێن پەکەکێ ل شەنگالێ بوویە ئارمانج کریە و ئەو کوشتیە.
ل گۆرەی نووچەیا هاتیە بەلاڤکرن، فوئاد زەنگین ب کۆد ناڤێ “سەرهات پانتۆس” کو بەرپرسەکی مەزنێ پەکەکێ و ئێک ژ فەرماندارێن هەپەگێ بوویە ل شەنگالی، ئەڤ دەمەک بوو ژ لایێ “میت”ێ ڤە چاڤدێرییا لڤینێن وی دهاتە کرن و ب رێیا تیمەکا تایبەت د بیسەیەکێ دا ل شەنگالێ ئەو کوشتیە.
ڤێ ئاژانسێ هەر وەها ئاشکەرا کر، ئەڤ بەرپرسێ پەکەکێ ئێک ژ وان کەسان بوویە کو سەرپەرشتیا ڤەگوهاستنا چەک و تەقەمەنیان و هنارتنا گەریلایان کریە ژ بۆ باکورێ کوردستانێ و ترکیێ.
ئەڤ د دەمەکی دا یە کو حەتا نها پەکەکێ هیچ داخویانیەک ل سەر کوشتنا ڤی فەرماندارێ خوە بەلاڤ نەکریە.
فۆئاد زەنگین ل سالا 1993ان دە پەیوەندی ب رێخستنێ کریە و بەرپرسیار بوویە ژ پێگەهاندنا گەریلایان و هنارتنا وان ژ بۆ باکورێ کوردستانێ و ترکیێ و ئەنجامدانا چالاکیێن چەکدارێ ل دژی دەولەتا ترکیێ.
